“SPORT – DOIMIY HAMROHIMIZ” ShIORI OSTIDA MINI FUTBOL BOʻYIChA MUSOBAQALAR OʻTKAZILDI

20-noyabr kuni tuman hokimligi, tuman jismoniy tarbiya va sport boʻlimi, mudofaaga koʻmaklashuvchi “Vatanparvar” tashkiloti tuman Kengashi, tuman Tibbiyot birlashmasi, Oʻzbekiston davlat muassasalari va jamoat xizmati xodimlari kasaba uyushmasi tuman Kengashi, Amudaryo televideniyesi tahririyatlarining 2020-yil 10-noyabrdagi qoʻshma qaroriga asosan davlat muassasalari va jamoat xizmati xodimlari kasaba uyushmasi tuman Kengashiga qarashli tashkilotlar xodimlari ishtirokida sportning mini futbol turi boʻyicha “Sport – doimiy hamrohimiz” shiori ostida sport musobaqalari oʻtkazildi.

Doʻstona, qizgʻin bahslar bilan oʻtgan mazkur musobaqalarda tuman hokimligi, aktsiyadorlik tijorat “Xalq banki”ning tuman filiali, tuman Mahalla va oilani qoʻllab-quvvatlash boʻlimi, mudofaaga koʻmaklashuvchi “Vatanparvar” tashkiloti tuman Kengashi xodimlari oʻzaro bellashdilar.

Toʻrtta jamoadan iborat havaskor futbolchilar oʻrtasida boʻlib oʻtgan mazkur musobaqada 45 nafar xodimlar ishtirok etishdi. Musobaqa jarayoni masʼul mutaxassislar tomonidan kuzatilib, odilona baholab borildi. Unga koʻra, eng yaxshi oʻyin koʻrsatgan aktsiyadorlik tijorat “Xalq banki” tuman filiali xodimlaridan iborat futbolchilar jamoasi 1-oʻrinni egalladilar. 2-oʻrin tuman hokimligining havaskor futbolchilar jamoasiga nasib etdi.

Musobaqada jipslik va faollik namunalarini koʻrsatgan tuman Mahalla va oilani qoʻllab-quvvatlash boʻlimi xodimlaridan iborat jamoa 3-oʻringa, mudofaaga koʻmaklashuvchi “Vatanparvar” tashkiloti tuman Kengashi xoidmlaridan tashkil topgan sportchilar jamoasi esa 4-oʻringa munosib deb topildi.

Shuningdek, musobaqa yakunlariga koʻra, “Xalq banki” tuman filiali xodimi Rajab Saparniyazov “Eng yaxshi murabbiy” deb, “Xalq banki” tuman filiali xodimi Rasul Kenjaboyev “Eng yaxshi oʻyinchi” va tuman hokimligi xodimi Jasur Kalmuradov “Eng yaxshi darvozabon” deb eʼtirof etildilar.

Musobaqada birinchi oʻrinni egallagan Aktsiyadorlik tijorat “Xalq banki” tuman filiali futbol jamoasiga qimmatbaho kubok hamda diplom, musobaqada ishtirok qilgan barcha sportchi xodimlarga faxriy yorliq va qimmatbaho sovgʻalar berildi.

Robiya YOʻLDOShEVA.