“Oʻzdek tilim – Oʻzbek tilim”

(baxshiyona)

Koʻz ochib yorugʻ jahonga

Kelganda har bir insonga

Onaning allasi aziz,

Allaning tili eng laziz.

Muqaddas azon aytilib,

Qoʻyilgach ism bitilib,

Quloqqa har kun quyilgan,

Qalbdan joy olib suyilgan

Otamning ravon tili bu,

Onamning biyron tili bu!

Mixli tuyoq-la Boychibor

Yoʻrtganda chopolmay nochor,

Barchin “Qur-rey!”i qizdirgan,

Gʻanim tulpordan oʻzdirgan!

Jumanbulbulning jigʻasi,

Qahhor baxshi doʻmbirasi,

Mehnatkashning zafaridan,

Butun dunyo xabaridan

Soʻzlagan latif tildir bu,

Kuylagan zarif tildir bu!

Qoshgʻariyning devonida,

Xos Hojibning javonida,

Rabgʻuziy rivoyatlari,

Boqirgʻon hikoyatlari,

Yassaviy hikmatlarida,

Lutfiyning suhbatlarida,

Mir Alisher dunyosida,

Mirzo Bobur “Urho!”sida

Yangragan aziz tildir bu,

Jon kabi laziz tildir bu!

Mashrabning “Yo-hu!”shiddati,

Nodirabegimning tiynati,

Choʻlponning oh-nolasida,

Usmon Nosir jolasida,

Fitrat, Botu figʻonida,

Behbudiyning zabonida,

Qodiriy tugʻyonlarida,

Hamzaning isyonlarida

Qaynagan, pishgan tildir bu,

Ilohdan tushgan tildir bu!

Qahhor rostligi shu tilda,

Shayxzoda doʻstligi shu tilda.

Oybek, Hamidlar jilosi,

Zulfiyaxonim nolasi,

Abdullaning gʻururlari,

Halimaning sururlari,

Muhammadning nigohlari,

Erkinlarning “E, voh!”lari

Ifoda topgan tildir bu,

Iroda topgan tildir bu!

Oʻgʻlimning ehtirosini,

Qizimning pinhon rozini,

Rafiqamning inja dilin,

Nevaramning sujji tilin,

Doʻstlarimning hurmat azmin,

Millat qadri-qimmat ramzin,

Hayoti, mamotlarini –

Barini, barin, barini

Mujassam etgan tildir bu,

Mukarram etgan tildir bu!

Gʻayri tilin boy-boʻston deb,

Nodonlar koʻrganida ep,

Qilib koʻksini qalqonlar,

Jon fido qilgan Omonlar,

Turfa goʻzal shevasidan,

Muhabbatning mevasidan,

Istiqlolning kelishini,

Qadri baland boʻlishini

Sabr bilan kutgan til bu,

Zafar tugʻin tutgan til bu!

Ona tilim – oʻzdek tilim,

Boqiy mening Oʻzbek tilim!

Gʻirkoʻk tulpor qanotinday oʻzgʻir til,

Boychiborning tuyogʻinday qizgʻir til,

Goʻroʻgʻlining qilichinday keskir til,

Barchinoyning juraginday sezgir til,

Zamaxshariy quvonch bilgan tildir bu,

At-Termiziy tayanch bilgan tildir bu!

Haz etadi shirin jonim soʻylasam,

Doʻmbiram shoʻx sayrab ketar kuylasam.

Salomchi ogʻamnan kelgan noma bu,

Baxtiyor baxshidan bir toʻyona bu!

Ona tilim – oʻzdek tilim,

Boqiy mening Oʻzbek tilim!

Tursunboy Abdullayev.