AMUDARYo TUMANIDA PAXTA YeTIShTIRISh REJASI ORTIGʻI BILAN BAJARILDI

Amudaryolik paxtakor va gʻallakorlar, bogʻbon-u dehqonlar, pillakor hamda chorvadorlar oʻzlarining fidoyi mehnatlari bilan qishloq xoʻjaligi taraqqiyotiga munosib hissa qoʻshib kelmoqdalar. Bu yil ham mehnatsevar dehqonlarimiz erta bahordan chigit ekib, unib chiqqan nihollarni astoydil parvarishlab, yuqori hosil yetishtirishga, “oq oltin” xirmonini yuksaltirishga erishdilar. Hamjihatlikdagi mehnat evaziga paxtakorlarimiz bu yil ham respublikamizda birinchilardan boʻlib paxta yetishtirish rejasini ortigʻi bilan bajardilar. Tumanimiz paxtakorlari 19-oktyabr kuni kontraktatsiya shartnomalarida koʻrsatilgan 34 900 tonnadan ziyod paxta yigʻib-terib olib, mehnat gʻalabasiga erishdilar.

Eʼtiborli jihati, bu yil yetishtirilgan hosil toʻligʻi bilan tumanimizda tashkil qilingan klaster korxonasi tomonidan harid qilinib, shu tizimda toʻliq qayta ishlanadigan boʻldi. Klaster tizimi nafaqat paxtachilik, shuningdek, qishloq xoʻjaligining barcha yoʻnalishlarida eng samarali va foydali tizim boʻlib, undan mahsulot yetishtiruvchilar – dehqon va fermerlardan tortib, qayta ishlovchilargacha barcha birdek manfaat koʻrmoqda.

Qishloq xoʻjaligi sohasida klaster tizimining joriy qilinishi boshqa sohalarning keng taraqqiy etishiga zamin yaratmoqda. Ilgari hokimiyat rahbarlari butun diqqat-eʼtiborini, bor kuch-salohiyatini agrar sohaga qaratgan boʻlsa, klaster tizimi joriy qilinishi bilan hokimlar oʻz vaqtlarining oʻndan bir qisminigina qishloq xoʻjaligiga, qolgan barcha qismini ijtimoiy soha, taʼlim, madaniyat, kambagʻallikni qisqartirish, tadbirkorlikni rivojlantirishga sarflamoqdalar. Shu orqali mahsulotlarni bozor tamoyillari asosida xarid qilish tizimiga bosqichma-bosqich oʻtilmoqda. Fermer va dehqonlarimiz mahsulot yetishtirishda erkin boʻlib, ular oʻzlari kutganlaridek manfaat koʻrishmoqda, hokimlarning ish uslublari tubdan oʻzgarib, agrar sohada davlat aralashuvi keskin kamaytirilishi bilan birga reja ortidan quvish va majburiy mehnatga jalb qilish amaliyotiga butunlay chek qoʻyilmoqda.

Bu yil erta bahordan 362 ta fermer xoʻjaliklarimiz tomonidan 15 ming 250 gektar maydonga chigit ekilgan edi. Tekis unib chiqqan gʻoʻza nihollari agrotexnika qoidalari asosida parvarish qilinib, moʻl hosilga zamin hozirlandi.

Paxta yigʻim-terimi mavsumiga ham puxta  tayyorgarlik koʻrildi. Shu maqsadda 290 ta terim otryadlari tashkil qilinib, ularga jami  23 ming 266 nafar terimchilar jalb qilindi. Shundan 9283 nafarini fermer xoʻjaligi ishchilari tashkil etgan boʻlsa, qolgan 13 ming 983 nafari uyushmagan aholi boʻlib, ular shartnoma asosida paxta terimida ishtirok etdilar. Terimchilar uchun barcha sharoitlar yaratilib, aholini majburiy mehnatga jalb qilmaslik boʻyicha nazorat tadbirlari muntazam olib borildi.

Bugungi yuksak xirmonni bunyod qilishda Qilichboy, Oʻrtaqalʼa, Toshyop, Oq oltin, Namuna kabi ovul va mahallalardagi fermer hoʻjaliklar munosib hissa qoʻshdilar. Jumladan, Oq oltin ovulidagi “Gavhar Yakubova”, Toshyop ovulidagi “Bekmon Allaberganov” hamda Doʻrman ovulidagi “Pirnazarov Toʻraboy”, Oʻrta qalʼa ovulidagi “Ermonov Oʻrozboy” fermer xoʻjaliklari paxta rejalarini eng oldingilar qatorida ortigʻi bilan bajardilar.

Fursatdan foydalanib, bugungi mehnat zafariga erishishda jonkuyarlik koʻrsatgan dehqon va fermerlarni, pudratchi va hasharchilarni, qishloq xoʻjaligi sohasi mutaxassislarini erishilgan mehnat gʻalabasi bilan tabriklayman!

Sultonboy Yoʻldashev, Amudaryo tumani hokimi.