AMUDARYo TUMANINI KOMPLEKS RIVOJLANTIRIShGA ALOHIDA EʼTIBOR QARATILMOQDA

Davlatimiz rahbarining Qoraqalpogʻiston Respublikasiga tashrifi davomida hududlarni har tomonlama ijtimoiy-iqtisodiy rivojlantirish borasida belgilab bergan vazifalari ijrosini taʼminlash maqsadida “Agrobank” aktsiyadorlik tijorat banki Boshqaruv raisi oʻrinbosari Azamat Toʻrayev rahbarligidagi ishchi guruh Amudaryo tumaniga tashrif buyurdi.  

8-oktyabr kuni tashrif buyurgan ishchi guruh tuman Mahalla va oilani qoʻllab-quvvatlash boʻlimi binosida tumanimizdagi mahalla fuqarolar yigʻinlari raislari hamda ijtimoiy himoyaga muhtoj aholi vakillari bilan uchrashib, mavjud muammo hamda kamchiliklar bilan tanishdi. Uchrashuvda tumanda kambagʻallikni qisqartirish, ayniqsa, kam taʼminlangan, ehtiyojmand aholi qatlamini tadbirkorlikka keng jalb qilish, ishsiz fuqarolar bandligini taʼminlash boʻyicha masalalar muhokama qilindi.

Yigʻilishda tumandagi band boʻlmagan, “Ayollar daftari”ga kiritilgan xotin-qizlarning bandligini taʼminlash maqsadida tikuv mashinalari berildi. Shuningdek, tadbirkorlik faoliyati bilan shugʻullanish istagida boʻlgan ayol-qizlarga kredit mablagʻlari olishda amaliy yordam beriladigan boʻldi. Xususan, Qipchoq ovulida yashovchi kam taʼminlangan, boquvchisini yoʻqotgan Manzura Oʻrozboyevaning bandligini taʼminlash maqsadida tadbirkorlik faoliyati bilan shugʻullanishi uchun “Agro bank” tuman boʻlimi tomonidan 5 mln. soʻm kredit mablagʻi ajratildi hamda yangi tikuv dastgohi berildi. Shuningdek, Boyovul mahallasida yashovchi Shahlo Rajabova hamda Dilfuza Yoʻldoshevalarga yangi tadbirkorlik faoliyatini boshlashi uchun kredit mablagʻi olishiga amaliy yordam beriladigan boʻldi.

Shundan soʻng, masʼullar “Agro bank”ning tuman boʻlimidan kredit mablagʻi olib, tadbirkorlik faoliyatini yuritayotgan Feruza Jubatirovaning ish faoliyati bilan tanishdilar. Tadbirkor bankdan 200 mln. soʻm kredit mablagʻi olib, “Feruza-Guli-Med” ultratovushli diagnostika markazini ochgan boʻlib, hozirda aholiga sifatli tibbiy xizmatlar koʻrsatib kelmoqda.

Shu oʻrinda qayd etish joizki, Oʻzbekiston Respublikasi Prezidentining Qoraqalpogʻistonga tashrifi davomida berilgan topshiriqlarning ijrosini taʼminlash maqsadida tumanga biriktirilgan “Oʻztoʻqimachiliksanoat” uyushmasi raisi Ilhom Haydarov ham 3-oktyabr kuni tumanga tashrif buyurib, tumanda tekstil sohasi obʼektlari, amalga oshirilishi rejalashtirilgan loyihalar, tumandagi sharoiti nisbatan ogʻir boʻlgan mahallalarda amalga oshirilishi lozim boʻlgan chora-tadbirlar bilan tanishdi hamda  taklif va tavsiyalar berdi.

4-8-oktyabr kunlari Aktam Haitov rahbarligida Oʻzbekiston fermer, dehqon xoʻjaliklari va tomorqa yer egalari Kengashi xodimlari hamda “Agro bank” Boshqaruv raisi oʻrinbosari Azamat Toʻrayev rahbarligida ishchi guruhlar tumanni kompleks rivojlantirish boʻyicha oʻrganish ishlarini olib bordilar. 

Shu maqsadda biriktirilgan tashkilotlarning Qoraqalpogʻiston  Respublikasi hamda tumandagi boʻlimlari xodimlari ishtirokida kichik ishchi guruhlar tuzilib, ogʻir hududga kiritilgan 3 ta mahallani rivojlantirish, tumanning “oʻsish nuqta”larini aniqlash, qishloq xoʻjaligi sohasini jadal rivojlantirish boʻyicha amalga oshiriladigan chora-tadbirlar rejasi ishlab chiqilib, salmoqli ishlar amalga oshirilmoqda.

Charos Arslonova, tuman hokimligining Axborot xizmati rahbari.