TUMANIMIZDA BOLALAR SPORTI TOBORA OMMALAShMOQDA

Soʻnggi yillarda mamlakatimizda jismoniy tarbiya va sportga, ayniqsa, bolalar sportini rivojlantirishga, ommaviyligiga erishishga ulkan eʼtibor qaratilayapti, bolalarning oʻzlari qiziqqan sport turlari bilan muntazam shugʻullanishlari uchun keng imkoniyat va sharoitlar yaratilmoqda. Natijada sportchi oʻgʻlonlar va qizlar safi tobora koʻpaymoqda.

Tumanimizdagi Bolalar-oʻsmirlar sport maktabida tashkil etilgan 20 ta sport turlari boʻyicha shugʻullanuvchilar isteʼdodi murabbiylar tomonidan tarbiyalanib, katta sport sari yoʻnaltirilmoqda, mamlakat terma jamoasi tarkibiga munosib nomzodlar tayyorlanmoqda. Shularning 14 tasi olimpiya sport turlaridir.

Hozirgi kunda sport maktabda tumanimizning 1442 nafar yosh oʻgʻil-qizlari sportning oʻzlari qiziqqan turlari bilan shugʻullanib, mahoratlarini oshirishmoqda, 254 nafarini qizlar tashkil etadi.

Respublikamizdagi barcha sport maktablari, toʻgaraklari qatori shu yil 20-avgustdan tuman Bolalar-oʻsmirlar sport maktabida ham yana mashgʻulotlar boshlandi.

Dzyu-do – sportning oʻsmir yoshlar eng koʻp qiziqadigan, mashgʻulotlarga sidqidildan qatnashadigan turidir. Dzyu-do kurashi bilan qator yillar mobaynida ushbu maskanda shugʻullanib, nomdor sportchi boʻlib yetishganlar, Osiyo, Yevropa chempioni boʻlgan, mamlakat terma jamoasi safida yurtimiz sharafini yuqori koʻtarayotganlar koʻpchilikni tashkil etadi. “Mard oʻgʻlon” davlat mukofotiga ilk sazovor boʻlganlarning biri – Elyor Masharipov shularning biri.

Hozirgi kunda ushbu maskandan uning munosib izdoshlari yetishib chiqmoqda. Yaqindagina maktab faoliyati qayta yoʻlga qoʻyilganidan soʻng qabul qilingan bolalarga boshlangʻich mashgʻulotlarni oʻtayotgan Hakimjon Nurimbetov ilk kunlardanoq ular orasida iqtidori sezilib turgan bolalar koʻpligidan quvonadi.

Ushbu bazada chiniqish mashqlari olib boriladigan ochiq maydoncha tashkil etilib, jihozlanganligi pandemiya davom etayotgan kunlarda juda asqotmoqda. Chunki shugʻullanuvchilar orasida masofa saqlashdek muhim qoida asosida mashgʻulot oʻtish uchun maydoncha juda qulay. Tajribali murabbiy Poʻlat Koʻmekov sport maktabga harorati oʻlchanib, shifokor koʻrigidan oʻtib, maxsus sport formasi kiyib chiqqan bolalar bilan avval chiniqish mashqlarini shu yerda, keyinchalik dzyu-do elementlarini oʻrganish mashqlarini esa maxsus jihozlangan zalda olib boradi. Uning shogirdlari orasida Oʻzbekiston chempionlari, nufuzli musobaqalar gʻoliblari bor. Sambo, dzyu-do, kurash turlari bilan bir necha yildan beri shugʻullanib kelayotgan Mustafo Oʻrozboyev sportda erishgan natijalari tufayli joriy yilda Qoraqalpoq davlat universitetiga test sinovlarisiz imtiyozli ravishda talabalikka qabul qilindi.

Ishga tushirilganiga qisqa vaqt oʻtgan boʻlsa-da, yopiq suzish suv havzasida shugʻullanuvchilarning mahorati tobora ortib, quvonarli natijalar qoʻlga kiritilayapti.

Bu yerda shugʻullanuvchilarga murabbiy Javohir Matirzayev  erkin, chalqancha, delfincha suzish mahoratini oʻrgatayotir.

Bolalar-oʻsmirlar sport maktabining Chordara mahallasida joylashgan bazasining 12x24 metrli kurash, boks boʻyicha mashgʻulotlar olib boriladigan zali, 9x14 metrli moslashtirilgan stol tennisi zali mavjud.

Shuni alohida taʼkidlash joizki, mashgʻulotlar olib boriladigan barcha zallar zamonaviy talablarga toʻliq javob beradi, “Jismoniy tarbiya va sportni rivojlantirish” jamgʻarmasi mablagʻlari evaziga barcha xonalar sport inventarlari bilan jihozlangan.

Filial asosiy zalida Jasur Nurimbetov qoʻli ostida shugʻullanayotgan uch guruhdagi 40 nafardan ziyod yosh bokschilar orasida ham mahorati oshib, koʻpgina musobaqalarda gʻoliblikka erishayotganlari bor.

– Filialimizda sportning tennis, boks, futbol, kurash, erkin kurash turlari boʻyicha mashgʻulotlar yoʻlga qoʻyilgan. Pandemiya davrida faoliyatimizdagi uzilishlar, musobaqalar, bolalarga motivatsiya beradigan tadbirlar oʻtkazilmay turgani oz boʻlsa-da, ishimizga salbiy taʼsir qildi. Mana, yana avvalgi sport holatimizni tiklab, mashgʻulotlarni boshlab yubordik, – deydi yoʻriqchi Ernazar Jumaniyozov.

Bu yerda shugʻullanuvchilar orasida Qoraqalpogʻiston, Oʻzbekiston terma jamoasi aʼzolari bor. Murabbiylar shugʻullanuvchilarga qunt bilan sport sirlarini oʻrgatish bilan bir qatorda oʻz ustlarida ham ishlaydilar, turli musobaqalarda ishtirok etishadi. Joriy yilda Qoraqalpogʻiston, Oʻzbekiston chempionatlarida, xalqaro musobaqalarda erishgan yutuqlari tufayli filialning toʻrt nafar oʻrta maxsus maʼlumotli murabbiylari oʻz ixtisosliklari boʻyicha Qoraqalpogʻistondagi oliygohlarga imtiyozli ravishda talabalikka qabul qilindilar.

Hamida Rajabova Bolalar-oʻsmirlar sport maktabining tajribali murabbiylaridan biri. Oʻzining ham, shogirdlarining ham stol tennisi boʻyicha erishayotgan yutuqlari salmoqli. U hozir filialda stol tennisi bilan shugʻullanuvchilarga erinmay sportning ushbu turi mahoratlarini oʻrgatib kelayotir.

Uning mashgʻulotlar olib borayotgan 2 guruhdagi 24 nafar bolalarning hammasi ham iqtidorli.

Filial qoshida tadbirkor bunyod etgan sunʼiy qoplamali kichik mini futbol maydonchasida Temur Rajabov rahbarligida yosh futbolchilar mashgʻulot olib borishadi. Agar murabbiy mehnati natijasini shogirdlari yutuqlari orqali baholaydigan boʻlsak, Temurning faoliyatini juda samarali boʻlayotir, deyish mumkin. Turli musobaqalarda muvaffaqiyatli qatnashib, qobiliyatini yaqqol namoyish etgan ikki shogirdi – Jasur Otajonov, Suhrob Ochilovlar Qoraqalpogʻiston terma jamoasi safida Ozarbayjonda boʻlib oʻtgan Xalqaro ochiq turnirda qatnashib, jamoaning faxrli uchinchi oʻrinni egallashiga munosib hissa qoʻshdi. Jahongir Rajabov, Sardor Xidirboyevlar esa respublika terma jamoasi safida Oʻzbekiston birinchiligi musobaqalarida munosib ishtirok etdi.

Shunisi eʼtiborliki, Bolalar-oʻsmirlar sport maktabining yosh futbolchilari murabbiylar – Rufat Bobojonov, Bayram Eshimovlardan oʻyin qoidalari, usullarini qunt bilan oʻrganib, yaqinda boʻlib oʻtgan Qoraqalpogʻiston chempionati hududiy bosqichida 2004-yilda tugʻilgan bolalar orasida birinchi oʻrinni, 7-sentyabr kuni Toʻrtkoʻl shahrida boʻlib oʻtgan 2007-yilda tugʻilgan bolalar orasida ham birinchi oʻrinni egalladilar. Qoraqalpogʻiston chempionatida esa ikkinchi oʻrinni yengib oldilar. Sport turlari boʻyicha turli yillarda jahon, Osiyo, Yevropa, Oʻzbekiston chempionati chempionlari, nomdor polvonlar tarbiyalanib voyaga yetgan beshik – tuman Bolalar-oʻsmirlar sport maktabidan bugungi kunda ham yurtimiz sharafini munosib himoya qilishga qodir boʻlgan sportchilar yetishib chiqmoqda. Ularning erishgan natijalari hisobga olinib, tegishli razryadlar berib borilmoqda. Ayni kunda 824 nafar razryadli, 3 nafar sport ustaligiga nomzod sportchilar bor.

Bolalarni sportga ommaviy jalb etishga qaratilayotgan saʼy-harakatlar tufayli 21-sonli maktabda tashkil etilgan ogʻir atletika guruhida ushbu hududning 40 nafardan ziyod farzandlari murabbiy Anvar Boboniyozov rahbarligida mahorat sirlarini oʻrganishmoqda. Shularning 5 nafari qizlardir. Oʻtgan davr mobaynida Baxtiyor Murodov, Jahongir Toʻxtasinov, Madina Omonova, Nilufar Jumaboyevalar Qoraqalpogʻiston birinchiligi chempioni va sovrindorlari boʻlishdi. Oltinoy Shukurullayeva esa Oʻzbekiston chemionatida birinchi oʻrinni yengib olib, ustozi, sport maktab rahbarlari va barcha murabbiylarini quvontirdi.

Xulosa qilib aytganda, tuman Bolalar-oʻsmirlar sport maktabida sogʻlom avlodni shakllantirishning muhim sharti boʻlgan bolalar sportining ommaviyligiga erishish, oʻsmir yoshlarning sport qobiliyatini rivojlantirib, nomdor sportchilar, chempionlar tarbiyalab voyaga yetkazishdek ezgu maqsadlar yoʻlida saʼy-harakatlar olib borilmoqda.

Chorsham TOJIMURODOV,

tuman Bolalar-oʻsmirlar sport maktabi direktori.