ENG ULUGʻ, ENG AZIZ BAYRAM ARAFASIDA YaNGI INShOOTLAR FOYDALANIShGA TOPShIRILDI

Xalqimiz eng ulugʻ, eng aziz bayram – mamlakatimiz mustaqilligining 29 yilligini qarshi olmoqda. Garchi bayramga bagʻishlangan ommaviy sayillar, koʻngilochar tadbirlar oʻtkazilmayotgan boʻlsa-da, har bir fuqaroning  koʻnglida shunday dorilomon kunlarga yetganiga, oʻz erki, inon-ixtiyori oʻz qoʻlida, ozod va farovon yashayotganidan faxr-iftixor, shukronalik hukmron, odamlar sogʻligiga  tahlika solib turgan koronavirus pandemiyasi tezroq bartaraf etilishini, yurtimizda yana bexavotir, tinch hayot tarzi barqaror boʻlishini tilab duo qilmoqdalar.

Xalqimiz azal-azaldan qutlugʻ kunlar, muhim sanalarni oʻziga xos tadoriklar bilan qarshi olishgan. Joriy yilda ham bu umrboqiy anʼanaga amal qilinmoqda va quvonchli voqealarga guvoh boʻlayapmiz.

Bayram arafasida Mangʻit shahri markazida tadbirkorlar tomonidan shahar koʻrkiga koʻrk qoʻshadigan, muhtasham, uch qavatli zamonaviy meʼmoriy uslubda qurilgan savdo va xizmat koʻrsatish majmuasi qurib bitkazildi va foydalanishga topshirildi.

28-avgust kuni bino ochilishiga bagʻishlangan tantanali marosimda tuman hokimi Sultonboy Yoʻldoshev soʻzga chiqib, yigʻilganlarni, tumanimiz xalqini mustaqillikning 29 yilligi hamda bayram arafasida shunday koʻrkam va barcha qulayliklarga ega savdo, xizmat koʻrsatish majmuasining foydalanishga topshirilishi munosabati bilan qizgʻin qutladi.

“Amu-Mangʻit shirinliklari”, “Boyovul poyafzali” va “Mangʻit raduga savdo” masʼuliyati cheklangan jamiyatlari tomonidan qurilgan ushbu binolarga jami 4 mlrd. soʻmlikdan koʻproq mablagʻ sarflangan.

Bugungi kunda ushbu obʼektlarda oʻndan ortiq yoʻnalishdagi savdo va xizmat koʻrsatish obʼektlari, yaʼni supermarket, kafe, oziq-ovqat, kiyim-kechak, maishiy texnika, telefon, mebel, gilam, velosiped va bolalar oʻyinchoqlari doʻkonlari, “Mikrokreditbank”ning shoxobchasi va stomatologiya markazi hamda boshqa savdo nuqtalari joylashtirildi. Binoning foydalanishga topshirilishi bilan 30 ta yangi ish oʻrinlari tashkil qilindi. Hozirgi vaqtda binoning faqat birinchi va ikkinchi qavati ishga tushirildi, uchinchi qavati ham foydalanishga topshirilib, bino toʻliq quvvatda ish boshlasa, ellikdan ortiq yurtdoshlarimiz ish bilan taʼminlanadi.

Qolaversa, ushbu zamonaviy bino oʻzining tashqi koʻrinishi bilan Mangʻit shahrining koʻrkiga koʻrk qoʻshib, tumanimiz ahli va mehmonlarga shinam xonalarda sifatli savdo xizmati va maishiy xizmat koʻrsatish imkonini beradi.

Bino ochilish marosimiga yigʻilganlar mazkur binolarda yangi ish boshlayotgan va faoliyatini davom ettirayotgan tadbirkorlarimizning ishlariga rivoj tiladilar, quruvchilarimizga ham bunday zamonaviy koʻrinishdagi muhtasham imoratni qisqa fursatda qurib, foydalanishga topshirgani uchun minnatdorchilik bildirishdi.

Ishonamizki, bu yerda koʻrsatilayotgan xizmatlar, sotilayotgan va ishlab chiqarilayotgan mahsulotlar xaridorlarga maʼqul boʻladi hamda tumanimizda savdo va xizmat koʻrsatish sohalari yanada rivojlanib, mamlakatimiz iqtisodiyoti rivojiga, xalqimiz farovonligiga munosib hissa boʻlib qoʻshiladi. 

Shuningdek, bayram arafasida Nazarxon ovulida “Asilbek” oilaviy korxonasiga qarashli oziq-ovqat doʻkoni, Toshqaʼla mahallasida tozalangan ichimlik suvi ishlab chiqarish shoxobchasi, Bogʻ mahallasida Ulugʻbek Otajonovning xususiy oziq-ovqat doʻkoni, Oʻrta qalʼa ovulida “Toʻlqin Rustam” oilaviy korxonasiga qarashli non va non mahsulotlari ishlab chiqarish tsexi, Xizr eli mahallasida yakka tadbirkor Baxtiyor Sobirovning xususiy oziq-ovqat doʻkoni, Uyshin mahallasida Nurullaboy Xidirovning davlat xususiy sheriklik asosidagi 50-oʻringa moʻljallangan maktabgacha taʼlim tashkiloti, Qilichboyda “Bahromboyev Elmurod” masʼuliyati cheklangan jamiyatiga qarashli savdo va xizmat koʻrsatish majmuasi, Beshovul mahallasida mini futbol maydonchasi ham foydalanishga topshiriladi.

Buningdek, bunyodkorliklar, yangilanishlar tumanimizda aholi turmush sifati yanada oshishiga xizmat qiladi.

O.RAJABOVA.