DAVLATGA PEJADAGI 208 TONNA OʻPNIGA 210,1 TONNA YuQOPI SIFATLI PILLA TOPShIPILDI

Pillachilik – serdaromad, shu bilan birga oʻta nozik soha. Shuning uchun pillakorlarimiz har yilgi ipak qurti boqish mavsumiga alohida tayyorgarlik koʻrishadi. Mavsum ishlarining eng muhimi, moʻl va sifatli ozuqa bazasini yaratishdir. Pillakorlarning ana shu tomondan koʻngli toʻq boʻlsa, moʻl va sifatli pilla yetishtirish borasidagi rejalarini amalga oshirishlarida hech qanday toʻsiq boʻlmaydi.

Joriy yilda “Jayxun Silk” masʼuliyati cheklangan jamiyati tomonidan 343 ming dona serhosil tut koʻchatlari yetkazib berilib, yangi tutzorlar bunyod etildi va fermer xoʻjaliklari hududlaridagi ariqlar boʻyicha, dala chetlariga sifatli qilib ekildi. Mavjud tutzorlarga agrotexnik ishlov berilib, oziqlantirildi. Avvalgi yillarda ekilgan tut koʻchatlari joriy yilgi mavsumda moʻl ozuqa bazasi vazifasini oʻtadi va ipak qurti parvarishida muammo boʻlmadi.

Yuqori sifatli pilla yetishtirishning birdan-bir omili ipak qurti urugʻini jonlantirish bilan bogʻliq ishlarni agrtexnika qoidalari asosida tashkil etishdir. Shuni inobatga olgan Amudaryo “Agropilla” masʼuliyati cheklangan jamiyati mutaxassislari “Jayxun Silk” masʼuliyati cheklangan jamiyati tomonidan yetkazib berilgan 3768 quti ipak qurti urugʻini 16 ta inkubatoriylarda sifatli jonlantirib, pillakorlarga oʻz vaqtida tarqatdilar. Ipak qurti urugʻini jonlantirish maqsadida tanlangan 16 ta inkubatoriylarning barchasiga malakali mutaxassislar biriktirilib, tun-u kun navbatchiliklar tashkil etildi. Natijada sifatli jonlantirilgan ipak qurti urugʻi 1572 nafar kasanachiga, 266 ta fermer xoʻjaliklari qurtxonalariga tarqatildi. Mavsum davomida malakali mutaxassislar tomonidan ipak qurtini parvarishlash jarayonlari qatʼiy nazorat qilib borildi va jami 3768 quti ipak qurti urugʻi parvarish qilindi. Albatta, mavsum yumushlarini yuqori saviyada olib borish maqsadida ipak qurtini parvarishlovchi kasanachilar va fermer xoʻjaliklari tasarrufidagi qurtxonalarda faoliyat yurituvchi pillakorlarning moddiy manfaatdorligiga alohida ahamiyat berildi.

Pillakorlarga har bir quti ipak qurti urugʻi uchun oldindan boʻnak pullari berildi. Natija esa kutilganidan ziyoda boʻldi. 5-iyun sanasidan boshlab Mangʻit va Xitoy pillani qabul qilish maskanlarida mavsumning ilk hosilini qabul qilish ishlari muvaffaqiyatli boshlab yuborildi. Peshma-pesh taroziga qoʻyilayotgan pilla hosilining choʻgʻi baland boʻldi. Shu barobarida, pillakorlarimizning ham oʻz mehnatlari mahsulidan quvonchlari cheksiz. Chunki pillani qabul qilish maskanining oʻzida rejadan ortiqcha yetishtirilgan har bir kilogramm pilla uchun qoʻshimcha toʻlov amalga oshirildi.

Mashaqqatli mehnatlar samarasi ayni kunda tumanimizning 208 tonnalik yuksak pilla xirmoni bunyod etilgan lahzalarda yanada yorqinroq namoyon boʻldi. Koʻzlangan marra sharaf bilan ado etildi. Davlatga rejadagi 208 tonna oʻrniga 210,1 tonna yuqori sifatli sanoat xom ashyosi topshirildi va bu boradagi shartnomaviy reja 101 foizga uddallandi. Pillakorlarimiz tomonidan “Mangʻit” pilla qabul qilish maskanida 142,8 tonna, “Xitoy” pilla qabul qilish maskanida 67,5 tonna pilla qabul qilib olindi.

Tumanimizning yuksak pilla xirmoniga Kuyuk koʻpir ovulidan kasanachi Jamila Ataboyeva shartnomadagi 102 kilogramm oʻrniga 167 kilogramm, Oʻrta qalʼa ovulidan Ikrom Qoʻchqorov 88 kilogramm oʻrniga 117 kilogramm, Manzura Qoʻshboyeva 112 kilogramm oʻrniga 127 kilogramm pilla topshirishib, zimmalaridagi shartnomaviy rejalarini ortigʻi bilan ado etdilar.

“Oq oltin”lik Tozagul Qalmenova 146, Doʻrman ovulidan Sobir Tojimov 173, Toʻlqin ovulidan Dildor Shomurodova 147 kilogramm pilla topshirib, shartnomaviy rejalarini 130-150 foizga ado etdilar. Ilgʻor pillakor Nafisa Murodova esa barchaga ibrat boʻldi. U shartnomaviy rejasini 216,4 foizga ado etib, tuman pillakorlari orasida eng yuqori natijaga erishdi.

Ayni kunda pilla qabul qilish maskanlarida yetishtirilgan hosilni qabul qilish va qayta ishlash korxonalariga sifatli tarzda yetkazib berish borasidagi ishlar davom  ettirilmoqda. Qurtxonalarda esa pilla terish ishlari jadal olib borilmoqda.

P.NAPIMBETOV, "Amudaryo Agropilla” MChJ raisi.