“Nukus Dilisha” MChJga qarashli korxonada kuniga 20 tonna un ishlab chiqarilmoqda

Mamlakatimizda oziq-ovqat xavfsizligini taʼminlash masalasi davlat siyosatining ustuvor yoʻnalishlaridan biri sanaladi. Ayniqsa, un mahsulotlariga boʻlgan ehtiyoj ortib borayotgan bir sharoitda, bozorlarimizda taqchillikka yoʻl qoʻymaslik va narxlar barqarorligini taʼminlash maqsadida amalga oshirilayotgan chora-tadbirlar alohida ahamiyatga ega. Amudaryo tumanining Jayxun ovul fuqarolar yigʻinida joylashgan “Nukus Dilisha” MChJga qarashli un ishlab chiqarish korxonasi shu yoʻnalishda samarali faoliyat yuritmoqda.

Hozirgi kunda korxona toʻliq quvvatda ishlamasa-da, zamonaviy texnologiya asosida kunlik ishlab chiqarish hajmi 20 tonna 1-navli un va 6 tonnadan ortiq kepakni tashkil etmoqda. Bugʻdoy mahalliy fermer xoʻjaliklaridan xarid qilinadi va korxona mahsulotlari asosan mahalliy ishbilarmonlar tomonidan ulgurji narxlarda xarid qilinadi.

Zavodda 20 nafarga yaqin doimiy ishchi turli lavozim va vazifalarda mehnat qilmoqda. Bu esa nafaqat ishlab chiqarish salohiyatini belgilaydi, balki aholi bandligiga ham ijobiy taʼsir koʻrsatmoqda.

Ishlab chiqarish jarayoni bugʻdoyni zavodga maxsus yuk mashinalarida olib kelishdan boshlanadi. Bugʻdoy avval laboratoriya sharoitida sinchkovlik bilan sifat nazoratidan oʻtkaziladi — namlik darajasi, begona aralashmalar va zararli moddalar mavjudligi tekshiriladi. Tekshiruvdan soʻng bugʻdoy tarozidan oʻtkazilib, xom ashyo omboriga joylashtiriladi.

Keyingi bosqichda bugʻdoy maxsus tozalash uskunalarida qayta ishlanadi. Separatorlar yordamida tosh, chang, begona urugʻlar va metall parchalari kabi aralashmalar ajratib olinadi. Havo orqali tozalash jarayoni esa eng oddiy zararli moddalarni yoʻqotishni taʼminlaydi. Bu bosqich un sifatini belgilaydigan muhim omillardan biridir.

Tozalangan bugʻdoyga muayyan miqdorda suv purkaladi va maʼlum vaqt aralashtirilgan holda qoʻyiladi. Bu jarayon bugʻdoy donining kepak qavatini yumshatib, keyingi bosqichni yengillashtiradi. Shundan soʻng bugʻdoy tegirmonlarda bir necha marta ezilib, har bir bosqichda elakdan oʻtkaziladi. Jarayonda kepak, yorma va yengil un zarrachalari ketma-ket ajratiladi. Yakuniy bosqichda esa un zarracha hajmi va rangiga qarab navlarga boʻlinadi, sifatli unlar aralashtirilib, 25 yoki 50 kilogrammlik qoplarga joylashtiriladi.

Maʼlumot oʻrnida taʼkidlash joizki, Prezidentimiz tomonidan belgilab berilgan yangi tizim asosida aholining tomorqa va ijara yerlaridan samarali foydalanish orqali daromadlarini oshirish chora-tadbirlari boʻyicha 2025-yil 28-fevral kuni Amudaryo tumanida oʻtkazilgan koʻrgazmali seminar doirasida mazkur korxonaning ochilish marosimi boʻlib oʻtgan edi.

Mazkur loyiha Qoraqalpogʻiston Respublikasidagi muhim sanoat tashabbuslaridan biri hisoblanib, mahalliy un mahsulotlariga boʻlgan talabni qondirish, aholi farovonligini oshirish va yangi ish oʻrinlari yaratish kabi vazifalarni amalga oshirishga xizmat qilmoqda.

Prezidentimizning tegishli Farmoniga muvofiq, korxona uchun qishloq xoʻjaligiga moʻljallanmagan 1,5 gektar va qishloq xoʻjaligiga moʻljallangan 40,6 gektar yer maydonlari toʻgʻridan-toʻgʻri ajratib berilgan. Loyihaning umumiy qiymati 11 milliard soʻmni tashkil etib, shundan 7,9 milliard soʻmi bank krediti hisobidan moliyalashtirilgan.

Zavod toʻliq ishga tushirilgandan soʻng, uning yillik ishlab chiqarish quvvati 2 ming tonnani tashkil etishi rejalashtirilgan. Bu hajm mahalliy ehtiyojni toʻliq qondirishga yetarli hisoblanadi. Shuningdek, yana 30 nafar yangi ish oʻrni yaratilishi kutilmoqda. Bu esa tuman aholisining bandligini taʼminlash va ularning daromad manbaini oshirishda muhim ahamiyat kasb etadi.

Qisqa muddat ichida tumanda yirik ishlab chiqarish loyihasining amalga oshirilishi, aholi bandligini taʼminlash va oziq-ovqat mahsulotlari narxining barqarorligini saqlashda muhim ahamiyatga ega boʻldi. “Nukus Dilisha” MChJ tomonidan amalga oshirilayotgan bu loyiha xususiy sektorning mamlakat iqtisodiy taraqqiyotidagi oʻrni naqadar ulkan ekanini yana bir bor namoyon etdi.

Shohzod Qurbonboyev.