“Нукус Дилиша” МЧЖга қарашли корхонада кунига 20 тонна ун ишлаб чиқарилмоқда

Мамлакатимизда озиқ-овқат хавфсизлигини таъминлаш масаласи давлат сиёсатининг устувор йўналишларидан бири саналади. Айниқса, ун маҳсулотларига бўлган эҳтиёж ортиб бораётган бир шароитда, бозорларимизда тақчилликка йўл қўймаслик ва нархлар барқарорлигини таъминлаш мақсадида амалга оширилаётган чора-тадбирлар алоҳида аҳамиятга эга. Амударё туманининг Жайхун овул фуқаролар йиғинида жойлашган “Нукус Дилиша” МЧЖга қарашли ун ишлаб чиқариш корхонаси шу йўналишда самарали фаолият юритмоқда.

Ҳозирги кунда корхона тўлиқ қувватда ишламаса-да, замонавий технология асосида кунлик ишлаб чиқариш ҳажми 20 тонна 1-навли ун ва 6 тоннадан ортиқ кепакни ташкил этмоқда. Буғдой маҳаллий фермер хўжаликларидан харид қилинади ва корхона маҳсулотлари асосан маҳаллий ишбилармонлар томонидан улгуржи нархларда харид қилинади.

Заводда 20 нафарга яқин доимий ишчи турли лавозим ва вазифаларда меҳнат қилмоқда. Бу эса нафақат ишлаб чиқариш салоҳиятини белгилайди, балки аҳоли бандлигига ҳам ижобий таъсир кўрсатмоқда.

Ишлаб чиқариш жараёни буғдойни заводга махсус юк машиналарида олиб келишдан бошланади. Буғдой аввал лаборатория шароитида синчковлик билан сифат назоратидан ўтказилади — намлик даражаси, бегона аралашмалар ва зарарли моддалар мавжудлиги текширилади. Текширувдан сўнг буғдой тарозидан ўтказилиб, хом ашё омборига жойлаштирилади.

Кейинги босқичда буғдой махсус тозалаш ускуналарида қайта ишланади. Сепараторлар ёрдамида тош, чанг, бегона уруғлар ва металл парчалари каби аралашмалар ажратиб олинади. Ҳаво орқали тозалаш жараёни эса энг оддий зарарли моддаларни йўқотишни таъминлайди. Бу босқич ун сифатини белгилайдиган муҳим омиллардан биридир.

Тозаланган буғдойга муайян миқдорда сув пуркалади ва маълум вақт аралаштирилган ҳолда қўйилади. Бу жараён буғдой донининг кепак қаватини юмшатиб, кейинги босқични енгиллаштиради. Шундан сўнг буғдой тегирмонларда бир неча марта эзилиб, ҳар бир босқичда элакдан ўтказилади. Жараёнда кепак, ёрма ва енгил ун заррачалари кетма-кет ажратилади. Якуний босқичда эса ун заррача ҳажми ва рангига қараб навларга бўлинади, сифатли унлар аралаштирилиб, 25 ёки 50 килограммлик қопларга жойлаштирилади.

Маълумот ўрнида таъкидлаш жоизки, Президентимиз томонидан белгилаб берилган янги тизим асосида аҳолининг томорқа ва ижара ерларидан самарали фойдаланиш орқали даромадларини ошириш чора-тадбирлари бўйича 2025 йил 28 февраль куни Амударё туманида ўтказилган кўргазмали семинар доирасида мазкур корхонанинг очилиш маросими бўлиб ўтган эди.

Мазкур лойиҳа Қорақалпоғистон Республикасидаги муҳим саноат ташаббусларидан бири ҳисобланиб, маҳаллий ун маҳсулотларига бўлган талабни қондириш, аҳоли фаровонлигини ошириш ва янги иш ўринлари яратиш каби вазифаларни амалга оширишга хизмат қилмоқда.

Президентимизнинг тегишли Фармонига мувофиқ, корхона учун қишлоқ хўжалигига мўлжалланмаган 1,5 гектар ва қишлоқ хўжалигига мўлжалланган 40,6 гектар ер майдонлари тўғридан-тўғри ажратиб берилган. Лойиҳанинг умумий қиймати 11 миллиард сўмни ташкил этиб, шундан 7,9 миллиард сўми банк кредити ҳисобидан молиялаштирилган.

Завод тўлиқ ишга туширилгандан сўнг, унинг йиллик ишлаб чиқариш қуввати 2 минг тоннани ташкил этиши режалаштирилган. Бу ҳажм маҳаллий эҳтиёжни тўлиқ қондиришга етарли ҳисобланади. Шунингдек, яна 30 нафар янги иш ўрни яратилиши кутилмоқда. Бу эса туман аҳолисининг бандлигини таъминлаш ва уларнинг даромад манбаини оширишда муҳим аҳамият касб этади.

Қисқа муддат ичида туманда йирик ишлаб чиқариш лойиҳасининг амалга оширилиши, аҳоли бандлигини таъминлаш ва озиқ-овқат маҳсулотлари нархининг барқарорлигини сақлашда муҳим аҳамиятга эга бўлди. “Нукус Дилиша” МЧЖ томонидан амалга оширилаётган бу лойиҳа хусусий секторнинг мамлакат иқтисодий тараққиётидаги ўрни нақадар улкан эканини яна бир бор намоён этди.

Шоҳзод Қурбонбоев.