ДАВЛАТГА PЕЖАДАГИ 208 ТОННА ЎPНИГА 210,1 ТОННА ЮҚОPИ СИФАТЛИ ПИЛЛА ТОПШИPИЛДИ

Пиллачилик – сердаромад, шу билан бирга ўта нозик соҳа. Шунинг учун пиллакорларимиз ҳар йилги ипак қурти боқиш мавсумига алоҳида тайёргарлик кўришади. Мавсум ишларининг энг муҳими, мўл ва сифатли озуқа базасини яратишдир. Пиллакорларнинг ана шу томондан кўнгли тўқ бўлса, мўл ва сифатли пилла етиштириш борасидаги режаларини амалга оширишларида ҳеч қандай тўсиқ бўлмайди.

Жорий йилда “Jayxun Silk” масъулияти чекланган жамияти томонидан 343 минг дона серҳосил тут кўчатлари етказиб берилиб, янги тутзорлар бунёд этилди ва фермер хўжаликлари ҳудудларидаги ариқлар бўйича, дала четларига сифатли қилиб экилди. Мавжуд тутзорларга агротехник ишлов берилиб, озиқлантирилди. Аввалги йилларда экилган тут кўчатлари жорий йилги мавсумда мўл озуқа базаси вазифасини ўтади ва ипак қурти парваришида муаммо бўлмади.

Юқори сифатли пилла етиштиришнинг бирдан-бир омили ипак қурти уруғини жонлантириш билан боғлиқ ишларни агртехника қоидалари асосида ташкил этишдир. Шуни инобатга олган Амударё “Агропилла” масъулияти чекланган жамияти мутахассислари “Jayxun Silk” масъулияти чекланган жамияти томонидан етказиб берилган 3768 қути ипак қурти уруғини 16 та инкубаторийларда сифатли жонлантириб, пиллакорларга ўз вақтида тарқатдилар. Ипак қурти уруғини жонлантириш мақсадида танланган 16 та инкубаторийларнинг барчасига малакали мутахассислар бириктирилиб, тун-у кун навбатчиликлар ташкил этилди. Натижада сифатли жонлантирилган ипак қурти уруғи 1572 нафар касаначига, 266 та фермер хўжаликлари қуртхоналарига тарқатилди. Мавсум давомида малакали мутахассислар томонидан ипак қуртини парваришлаш жараёнлари қатъий назорат қилиб борилди ва жами 3768 қути ипак қурти уруғи парвариш қилинди. Албатта, мавсум юмушларини юқори савияда олиб бориш мақсадида ипак қуртини парваришловчи касаначилар ва фермер хўжаликлари тасарруфидаги қуртхоналарда фаолият юритувчи пиллакорларнинг моддий манфаатдорлигига алоҳида аҳамият берилди.

Пиллакорларга ҳар бир қути ипак қурти уруғи учун олдиндан бўнак пуллари берилди. Натижа эса кутилганидан зиёда бўлди. 5 июнь санасидан бошлаб Манғит ва Хитой пиллани қабул қилиш масканларида мавсумнинг илк ҳосилини қабул қилиш ишлари муваффақиятли бошлаб юборилди. Пешма-пеш тарозига қўйилаётган пилла ҳосилининг чўғи баланд бўлди. Шу баробарида, пиллакорларимизнинг ҳам ўз меҳнатлари маҳсулидан қувончлари чексиз. Чунки пиллани қабул қилиш масканининг ўзида режадан ортиқча етиштирилган ҳар бир килограмм пилла учун қўшимча тўлов амалга оширилди.

Машаққатли меҳнатлар самараси айни кунда туманимизнинг 208 тонналик юксак пилла хирмони бунёд этилган лаҳзаларда янада ёрқинроқ намоён бўлди. Кўзланган марра шараф билан адо этилди. Давлатга режадаги 208 тонна ўрнига 210,1 тонна юқори сифатли саноат хом ашёси топширилди ва бу борадаги шартномавий режа 101 фоизга уддалланди. Пиллакорларимиз томонидан “Манғит” пилла қабул қилиш масканида 142,8 тонна, “Хитой” пилла қабул қилиш масканида 67,5 тонна пилла қабул қилиб олинди.

Туманимизнинг юксак пилла хирмонига Куюк кўпир овулидан касаначи Жамила Атабоева шартномадаги 102 килограмм ўрнига 167 килограмм, Ўрта қалъа овулидан Икром Қўчқоров 88 килограмм ўрнига 117 килограмм, Манзура Қўшбоева 112 килограмм ўрнига 127 килограмм пилла топширишиб, зиммаларидаги шартномавий режаларини ортиғи билан адо этдилар.

“Оқ олтин”лик Тозагул Қалменова 146, Дўрман овулидан Собир Тожимов 173, Тўлқин овулидан Дилдор Шомуродова 147 килограмм пилла топшириб, шартномавий режаларини 130-150 фоизга адо этдилар. Илғор пиллакор Нафиса Муродова эса барчага ибрат бўлди. У шартномавий режасини 216,4 фоизга адо этиб, туман пиллакорлари орасида энг юқори натижага эришди.

Айни кунда пилла қабул қилиш масканларида етиштирилган ҳосилни қабул қилиш ва қайта ишлаш корхоналарига сифатли тарзда етказиб бериш борасидаги ишлар давом  эттирилмоқда. Қуртхоналарда эса пилла териш ишлари жадал олиб борилмоқда.

P.НАPИМБЕТОВ, "Амударё Агропилла” МЧЖ раиси.