MASʼULIYaTLI MAVSUM – GʻALLA OʻRIM-YIGʻIMIGA PUXTA HOZIRLIK KOʻRILMOQDA

Tumanimiz fermer xoʻjaliklarida 3350 gektar maydonda 6 navdagi bugʻdoy parvarish qilinmoqda. Joriy yil koʻklami bugʻdoy maysalarining yaxshi rivojlanishi uchun qulay keldi, namlik yetarli darajada boʻldi.

Shu boisdan ham barcha bugʻdoy ekilgan dalalarda hosil barvaqt va boʻliq boʻlib yetildi. Yaqin kunlar ichida agrar soha xodimlari uchun yana bir masʼuliyatli va qiyin-qistovli mavsum – gʻalla oʻrim-yigʻim boshlanadi.

Tumanimizda dehqonlarimizning qalb qoʻri, peshona teri evaziga yetishtirilgan gʻalla hosilini nest-nobud qilmasdan yigʻishtirib olish, qabul  punktlariga tashish va sifatli saqlash uchun puxta hozirlik koʻrildi.  Mavsum ishlarida qatnashadigan oʻrim-yigʻim kombaynlari va qabul punktiga tashuvchi texnikalar boshqaruvchilarining bu boradagi masʼuliyatlari keng tushuntirildi, gʻallazorda, tashish va qabul punktida saqlash davomida yongʻin kelib chiqishiga yoʻl qoʻymaslik choralari bilan tanishtirildi.
Mavsumga “Taxiatosh don” don mahsulotlari aktsiyadorlik jamiyatiga qarashli “Mangʻitdon” filialida ham qizgʻin hozirlik koʻrildi. Filialga keltirilgan gʻalla hosilidan darvoza oldidayoq namuna olinib, asosan 2 xil mezon – chegaralangan va bazis normalari boʻyicha tekshirilib, taroziga tortiladi va mahsulot sifatiga qarab, maxsus tayyorlangan uchta omborga va uchta maydonchaga toʻkiladi. Har bir ombor va maydonchaga alohida-alohida navdagi va sifat koʻrsatkichli hosil joylashtirilishi uchun hozirlik koʻrildi. Shu kungacha omborxonalar va maydonchalar sifatli taʼmirlanib, qanday sifat koʻrsatkichli va navli bugʻdoy joylashtirilishi belgilab qoʻyildi.

Filialda tashkil qilingan laboratoriya zamonaviy hosil sifatini aniqlaydigan uskuna va jihozlar bilan taʼminlangan. Agarda keltirilgan bugʻdoy belgilangan meʼyordan ziyod iflos yo nam boʻlsa, alohida qabul  qilinadi va topshiruvchi quritib, tozalab beradi.

Joriy yilda filial omborxonalari va gʻalla saqlash maydonchalarida faqat sara urugʻ uchun ajratilgan 838 tonna 6 navdagi hosilni qabul qilish va saqlash rejalashtirilmoqda. Tovar don uchun yetishtirilgan hosil esa Qipchoq paxta qabul qilish punktida vaqtincha tashkil etilayotgan saqlov hududida qabul qilinadi. Buning uchun transportyorlar, tarozilar taʼmirlanib, maxsus tekshiruvdan oʻtkazildi. Vaqtincha mavsumiy ishchilar ishga qabul qilindi. Ularning unumli ishlashlari uchun barcha qulayliklar yaratilgan boʻlib, tushlikda issiq ovqat berilayapti.

Filialga qabul qilingan gʻallaning sifatli saqlanishi uchun barcha chora-tadbirlar amalga oshirildi.

Yozning jazirama issigʻi saqlanib turgan ayni kunlar oʻrim-yigʻim mavsumini yanada yaqinlashtirmoqda.

Ha, yaqin kunlar ichida hazrati dehqonlarimizning qalb qoʻri, halol mehnati tufayli dalalarda yetilgan bugʻdoy hosili xirmonlarga toʻkiladi. Neʼmatlar ichra tengsiz, totli nonlarga aylanib, elimiz dasturxonlarini toʻldiradi.

Oygul RAJABOVA.