Amudaryo tumanida 2019-yilda qanday ishlar amalga oshirildi?

Bugungi kunda mamlakatimiz taraqqiyotda dunyoning rivojlangan mamlakatlari sari ilgarilab bormoqda. Xalqimizning fidokorona mehnati bilan 2019-yil – “Faol investitsiyalar va ijtimoiy rivojlanish yili”da barcha sohalarda salmoqli natijalarga erishildi.

Tumanimizning asosiy iqtisodiy koʻrsatkichlari yuqori boʻlib, 2019-yilda qishloq xoʻjalik yalpi mahsuloti 1 trillion 435 mlrd. soʻmni tashkil qilib, oʻtgan yilga nisbatan 103 foizga oshgan. Tumanimiz qishloq xoʻjalik yalpi mahsulotining Qorqalpogʻiston Pespublikasidagi ulushi 17,7 foizni tashkil qiladi. Shuningdek, oʻtgan yilga nisbatan sanoat mahsulotlarini ishlab chiqarish hajmi 102,7 foizga, xalq isteʼmoli mollari ishlab chiqarish 100 foizga, investitsiya 100,1 foizga, qurilish ishlari 104,7 foizga, chakana savdo 107,3 foizga, xizmat koʻrsatish 106,9 foizga oshdi.

Kichik biznesning sanoatdagi ulushi 44,2 foizni, qishloq va baliq xoʻjaligida 99,8 foizni, investitsiyada 64,9 foizni, qurilish ishlarida 95,6 foizni, chakana savdoda 94,6 foizni, xizmatlarda 94,6 foizni, eksportda 31,8 foizni va importda 99,6 foizni tashkil qildi.

Eksportyor korxonalar tomonidan 7,7 mln. AQSh dollarilik mahsulotlar eksport qilindi, eksport hajmi 2018-yilga nisbatan 116 foizga koʻpaydi.

Davlatimiz tomonidan tadbirkorlik subʼektlarini qoʻllab-quvvatlash boʻyicha olib borilayotgan  islohotlar natijasida oʻtgan yili 251 ta yoki 2018-yilga nisbatan qariyb 1,6 barobar koʻp yangi tadbirkorlik subʼektlari tashkil etildi.

Tadbirkorlikni keng rivojlantirish va bu soha uchun yangi sharoitlar yaratishga barcha imkoniyatlar safarbar etilmoqda. Jumladan, “Har bir oila – tadbirkor” dasturi doirasida oʻz biznesini boshlayotgan 1410 ta oilalarga 35,3 mlrd. soʻm, fermer, dehqon xoʻjaliklari va tomorqa yer egalarini qoʻllab-quvvatlash dasturi doirasida 41 ta fuqaroga 4,2 mlrd. soʻm, hunarmandchilikni rivojlantirish dasturi boʻyicha 74 ta hunarmandga 2,6 mlrd. soʻm, Bandlikka koʻmaklashish dasturi doirasida 29 ta fuqaroga 1,1 mlrd. soʻm, xotin-qizlar va oilalarni qoʻllab-quvvatlash dasturi boʻyicha 18 nafar xotin-qizlarga 800 mln. soʻm va “Yoshlar – kelajagimiz” davlat dasturi doirasida 33 nafar yoshlarga 9,6 mlrd. soʻmlik imtiyozli kreditlar ajratildi.

2019-yilda mahalliy byudjetga soliqlar va majburiy toʻlovlar 129,4 mlrd. soʻmni tashkil qildi yoki 25,9 mlrd. soʻmga ortigʻi bilan bajarildi. 2018-yilga nisbatan tushum 64,9 mlrd. soʻmga yoki 2 barobarga oshdi. Mahalliy byudjetdagi transfert salmogʻi 56,6 foizni yoki 139,2 mlrd. soʻmni tashkil qildi.

Shuningdek, ijtimoiy-iqtisodiy rivojlantirish dasturlari boʻyicha qiymati 74 mlrd. 153 mln.soʻmlik 59 ta loyihalar amalga oshirilib, 266 ta yangi ish oʻrinlari yaratildi.  Shundan sanoat sohasida 45 mlrd. 735 mln. soʻmlik 16 ta loyihalarda 102 ta yangi ish oʻrinlari yaratildi. Jumladan, “Yunusjon Trans Servis” MChJ tomonidan qiymati 2,9 mlrd. soʻmlik shagʻal ishlab chiqarish loyihasi ishga tushirildi va 14 ta yangi ish oʻrinlari yaratildi. Qishloq xoʻjaligi sohasida 7 mlrd. 648 mln. soʻmlik 17 ta loyihalarda 59 ta yangi ish oʻrinlari yaratildi. Masalan, “Amudaryo sohili” fermer xoʻjaligi tomonidan 1,1 mlrd. soʻmlik chorvachilik xoʻjaligini kengaytirish maqsadida 66 bosh zotli qoramollar olib kelindi va 4 ta yangi ish oʻrinlari yaratildi.

Xizmat koʻrsatish sohasida ham yuqori koʻrsatkichlarga erishildi. Sohada qiymati 20 mlrd. 770 mln. soʻmlik 26 ta loyihalarda 105 ta yangi ish oʻrinlari yaratildi. “Amudaryo Farma Tabobat” MChJ tomonidan qiymati 800  mln. soʻmlik zamonaviy uskunalar bilan jihozlangan xususiy dorixona va sogʻlomlashtirish markazi ishga tushirildi, bu yerda 5 ta yangi ish oʻrinlari tashkil etilib, hozirda aholiga sifatli tibbiy xizmat koʻrsatib kelmoqda.

Yangi ish oʻrinlarini tashkil etish va aholi bandligini taʼminlash Dasturi  doirasida 1326 ta yangi ish oʻrinlari yaratildi, shundan 589 nafar ayollar hamda 822 nafar yoshlarning bandligi taʼminlandi.

Joriy yilda tumanni iqtisodiy jihatdan yanada rivojlantirish borasida salmoqli ishlar amalga oshirilmoqda.

Tuman hokimligining Axborot xizmati.