TUMANIMIZDA QURILISh IShLARI QIZGʻIN DAVOM ETTIRILMOQDA

Barchamizga maʼlumki, karantin cheklovlari natijasida butun mamlakatimizda barcha sohalar qatorida qurilish sohasidagi ishlar ham maʼlum darajada toʻxtatildi. Ammo yurtimizdagi epidemiologik vaziyat tobora yaxshilanib borayotgani Respublika maxsus komissiyasi va Maxsus shtabning 2020-yil 14-apreldagi qoʻshma yigʻilishi qaroriga asosan qurilish ishlarini davom ettirishga ruxsat berildi. Shunga koʻra tumanimizda ham yirik qurilish inshootlaridagi ishlar davom ettirilmoqda. Qurilish ishlarida xodimlarning sanitariya va gigiyena qoidalariga toʻliq rioya qilishlari taʼminlangan.

Ayni paytda Yangiobod va Gulzor mahallalarining har birida 5 ta obʼektdan koʻp qavatli uy-joylar, Oʻrta qalʼa ovulidagi Yusuf xoʻja aholi punktida ichimlik suv tarmoqlari, Sanitariya epidemiologiya osoyishtalik markazi ombori, Qipchoq ovuli hududida 20-sonli maktabgacha taʼlim muassasasi va Toshyop ovuli hududidagi 13-sonli maktabgacha taʼlim muassasalari, shuningdek, 2019-yildan bu yilga oʻtgan Gulzor mahallasidagi namunaviy uy-joylar qurilishi davom etmoqda.

Ayni paytda “Qurilish xizmat” va “Amudaryo Maxsus Qurilish” masʼuliyati cheklangan jamiyatlari pudratchi tashkilotlari tomonidan 2019-yildan bu yilga oʻtgan Gulzor mahallasidagi namunaviy uy-joylar qurilishida ish yuqori surʼatlarda tashkil qilingan.

Obʼektlardagi qurilish ishlari qurilish-pudrat tashkiloti tomonidan qonunchilik hujjatlarida belgilangan tartibda amalga oshirilayapti. Qurilish-montaj ishlarini amalga oshirishning barcha bosqichlarida shaharsozlik normalari va qoidalariga rioya etilishi yuzasidan nazorat oʻrnatilgan.

Tuman mahalliy byudjeti hisobidan barpo qilinayotgan Xotira maydonida ham qurilish ishlari avjida. Ajdodlarni xotirasini eʼzozlash, ularni yod etib turish uchun sharoit yaratish, yosh avlod qalbida yurt uchun fido boʻlgan insonlarga ehtirom va vatanparvarlik tuygʻularini mustahkamlash maqsadida barpo etilayotgan mazkur maydon kelgusida tumanimiz aholisi uchun oʻziga xos ziyorat majmuasi boʻlishi kutilmoqda. Tuman hokimining qarori asosida Olmazor mahallasi hududida 1 gektarlik maydonda qad rostlayotgan majmuada “Amudaryo SKB” (eskb deb oʻqiladi) masʼuliyati cheklangan jamiyati quruvchilari mehnat qilmoqda.

Xotira maydonini barpo etish uchun mahalliy byudjet hisobidan 3 mlrd. soʻmdan ortiq mablagʻ ajratiladi. Zamonaviy maydonda “Motamsaro ona” haykali qad rostlagan boʻlib, ayni paytda pardozlash ishlari boshlangan. Hududda tarix muzeyi uchun ham alohida bino quriladi. Undan tashqari, zamonaviy arxitektura va meʼmorlik anʼanalarini mujassam etgan keng ayvon barpo etilib, maxsus Xotira kitoblari joylashtiriladi.Ushbu kitoblarga Ikkinchi jahon urushida halok boʻlgan amudaryoliklarning ism-familiyalari bitiladi.

Maydonga yanada koʻrk bagʻishlash uchun 2 ta favvora oʻrnatilib, manzarali daraxtlar, turfa xil va anvoyi gullar koʻchiriladi.

Yangidan barpo etilayotgan zamonaviy qiyofadagi Xotira maydoni tumanimizga yanada koʻrk bagʻishlaydi va ajdodlar xotirasi mangu muhrlangan fayzli maskanga aylanadi.

Amalga oshirilayotgan qurilish va bunyodkorlik ishlari tumanimizni zamonaviy qiyofaga keltirish, koʻrkiga koʻrk qoʻshish va aholi farovon turmush kechirishi uchun qulaylik yaratish kabi ezgu maqsadlarga xizmat qiladi.

Charos Arslonova, tuman hokimligining Axborot xizmati.