GʻOʻZANI BIRINChI OZIQLANTIRISh, KULTIVATsIYa IShLARI DAVOM ETMOQDA

Gʻoʻza nihollari unib chiqqanidan keyin birinchi kultivatsiya ishlari boshlanadi. Kultivatsiya tuproqdagi namlikni kamaytirib, unib chiqmagan nihollar tezlik bilan unib chiqishini, tuproq orasida havo yaxshi aylanishini, oʻsimlik ildizi yaxshi rivojlanishini taʼminlaydi. Buning natijasida nihollar oʻsishi jadallashadi.

Shu bilan birga gʻoʻzani oʻsish davrida oʻgʻitlash, ozuqa moddalar bilan yetarli darajada taʼminlash,  mineral oʻgʻitni nihollar yaxshi oʻzlashtirilishi uchun oziq moddalar ildiz oʻsish qatlamiga yaqin solinishi zarur. Bunda kultivatsiya jarayoniga alohida eʼtibor qaratish muhim ahamiyatga ega. Yerga oʻz muddatida baraka urugʻini qadagan tumanimizdagi barcha fermer xoʻjaliklari ayni kunlarda chigit unib chiqqan maydonlarda gʻoʻzani birinchi oziqlantirish, gʻoʻza qator oralarini kultivatsiya qilish ishlarini boshlab yubordilar.

Tumandagi Yoʻldosh Oʻrozboyev nomli muqobil mashina traktor parki xizmat koʻrsatuvchi fermer xoʻjaliklari paxta maydonlarida ham koʻchatlar tekis unib chiqishiga erishildi. Ayni paytda kultivatsiya ishlari qizgʻin olib borilmoqda. Xoʻjalik ishchilari mavjud va yaratilgan imkoniyatlardan foydalanib, ish unumini oshirishmoqda.

Shu oʻrinda aytish kerakki, tumanda 2020-yil hosili uchun 362 ta fermer xoʻjaliklari hamda qishloq xoʻjaligi korxonalari tomonidan 15 ming 250 gektar maydondan 34 ming 900 tonna paxta xom-ashyosi yetishtirib berish boʻyicha masʼuliyati cheklangan jamiyat shaklidagi “Amudaryoteks” xorijiy korxonasi klasteri oʻrtasida kontraktatsiya shartnomalari tuzildi. Bu yilgi hosil uchun chigit ekiladigan maydonlarning 3 ming 350 gektariga paxtaning “S-47-27” navi, 8 ming 985 gektariga “Sulton” navi, 2 ming 915 gektariga yangi navdagi urugʻlik chigit ekildi.

Mazkur maydonlarning 9 ming 650 gektarida qator orasi 60 santimetr boʻlgan sxemada, 5 ming 600 gektarida esa qoʻshqator usulida ekildi. Chigit ekish ishlarini optimal muddatlarda amalga oshirish maqsadida tumanda 65 ta otryad tashkil etildi. Ushbu otryadlarga tajribali mutaxassislardan boshchilar tayinlanib, zarur texnika va mexanizmlar biriktirildi.

Unib chiqqan gʻoʻza maydonlarida agrotexnik tadbirlarni sifatli oʻtkazish maqsadida 90 ta otryad tashkil etilib, tumandagi mavjud 365 ta kultivatorlar jalb qilindi. Birinchi kultivatsiya bilan birga har bir gektar maydonga 150 kilogramm ammiyakli selitra mineral oʻgʻiti sarflanib, oziqlantirila boshlandi. Mexanizatorlarning uzluksiz ishlashini taʼminlash maqsadida dala boshlarida 16 ta koʻchma mexanizatorlar uylari tashkil etilib, barcha shart-sharoitlar yaratildi. Mavsum davomida kultivatorlarning faqat “otryad” va “naryad” usulida ishlashi taʼminlanadi va shu bilan birga har bitta otryadga yonilgʻi moylash mahsulotlarini yetkazib beruvchi texnikalar, koʻchma ustaxonalar tashkil qilindi.

Dalalardagi kultivatsiya jarayonida har bir kultivatorga oʻrtacha 42 gektardan yer maydoni toʻgʻri kelayotganligi sababli mazkur tadbirlarni 10-12 kunda sifatli yakunlash reja qilingan.  Mazkur yilgi hosil uchun gʻoʻza maydonlarida oʻtkaziladigan agrotexnik tadbirlardan biri boʻlgan birinchi kultivatsiyani sifatli qilib oʻtkazish maqsadida fermer va qishloq xoʻjaligi korxonalari, otryadlarga 365 nafar mexanizatorlar, 18 nafar fermerlarga yoqilgʻi quyish shoxobchalari xodimlari, 18 nafar “Agrokimyohimoya” aktsiyadorlik jamiyati xodimlari, 18 nafar tijorat banklari xodimlari jalb etildi.

Fermerlarimiz mana shu imkoniyatlardan oqilona foydalanib, hosilga hosil qoʻshish harakatida mehnat qilishmoqda. Zero, agrotexnik tadbirlar samaradorligini oshirish, gʻoʻza qator oralariga keraklicha ishlov berish kabi muhim vazifalar oʻz vaqtida amalga oshirilsa, moʻl hosil toʻplanib, baland xirmon yaratiladi. Buning natijasida davlatimizning iqtisodiy qudrati yanada yuksaladi.

Ozoda Xudoyberganova.