Tuman markazida vaqtinchalik bozorlar faoliyat yuritmoqda

Ayni kunlarda butun mamlakatimizda koronavirus epidemiyasi keng tarqalishining oldini olish yuzasidan amalga oshirilayotgan chora-tadbirlar yanada kuchaytirilmoqda. Bu borada tumanimizda ham jadal ishlar qilinmoqda.

Amudaryo tumanida aholining sanitariya-epidemiologik osoyishtaligini va xavfsizligini taʼminlash, koronavirus infektsiyasi tarqalishini oldini olishda tegishli davlat va jamiyat boshqaruv organlari hamda tashkilotlarning faoliyatini muvofiqlashtirish, fuqarolarning hayoti va sogʻligini muhofaza qilish maqsadida tuman hokimining maxsus qarori qabul qilindi.

Qarorga asosan Amudaryo tumani hududida karantin davrida avtomototransport vositalari, velosiped va skuterlarning harakatlanishini vaqtinchalik toʻxtatildi. Qolaversa, insonlar bir joyga toʻplanishining oldini olish, kasallikning tarqalish zanjirini bartaraf qilish maqsadida Mangʻit Dehqon bozori vaqtincha yopilib, shahar hududida alohida vaqtinchalik bozorlar tashkil qilindi.

Mazkur bozorlarga hududiy jihatdan bir-biriga yaqin joylashgan ovul mahallalar aholisiga xizmat qiladi. Mangʻit shahridagi Xotira maydoni oldida tashkil qilingan bozor shaharning Chordara, Boyovul, Durunki mahallalari va Oʻrta qalʼa ovulidagi Bogʻ mahallasi aholisining uzogʻini yaqin qilmoqda.

Aytish joizki, bozorlar faoliyati sanitariya talablari asosida yoʻlga qoʻyilgan boʻlib, sotuvchilar uchun maxsus oʻrindiqlar bilan taʼminlangan.bozorga keluvchi xaridorlar uchun ham sanitariya talablariga asosan sharoitlar yaratilgan.

Amudaryo tumangaz filiali binosi yon tomonidagi bolalar sport maydonchasida tashkil qilingan bozor tumandagi Olmazor, Gulzor, Beruniy mahallalari aholisiga xizmat koʻrsatadi. Shuningdek, 1-sonli maktab oʻyingohida tashkil qilingan bozordan esa Oybek, Boʻston, Navoiy nomli mahallalar hamda Amir Temur ovuli aholisi kundalik ehtiyoj mollarini xarid qilishlari mumkin.

Taʼkidlash kerakki, avvalo bunday bozorlar tashkil qilinishda avvalo koronavirus epidemiyasi tarqalishining oldini olish, kasallikning odamdan odamga yuqish ehtimolligini kamaylitirish nazarda tutilgan. Qolaversa, karantin davrida avtotransport vositalari qatnoviga cheklovlar oʻrnatilgani va jamoat transporti toʻxtatilgani bois odamlarning shahar markazidagi bozorga qatnashida yuzaga keladigan qiyinchiliklarning oldi olinmoqda. Yurtdoshlarimiz esa oʻz mahallalari hududida, xonadonlariga yaqin joyda bozorlar faoliyati yoʻlga qoʻyilganidan xursand boʻlmoqda.

Shunday bozorlardan biri "Saparboy ota" toʻyxonasi orqa tarafidagi oʻyingohda ham tashkil qilindi. Mazkur bozordan Mangʻit shahridagi Doʻstlik, Yangiobod, Farovon mahallalari hamda Toshyop ovuli aholisi oʻzlari uchun zarur boʻladigan kundalik ehtiyoj mollarini va oziq-ovqat mahsulotlarini xarid qilmoqda.

Shu oʻrinda aytish joizki, shahardan olis, chekka hududlarda ham aholi uchun tadbirkorlar tomonidan koʻchma bozorlar tashkil qilinmoqda. Bozorlarda aholi ehtiyoji uchun zarur boʻlgan barcha turdagi mahsulotlar mavjud boʻlib, sanitariya-gigenik talablarga toʻla javob beradi.

Bunday chora-tadbirlar mamlakatimizda joriy qilinayotgan karantin qoidalari buzilishining oldini olishga hamda mazkur vaziyatda qoidalarga qatʼiy rioya qilinishiga xizmat qiladi. Yurtdoshlarimizdan oʻrnatilayotgan tartib-qoidalariga amal qilgan holda, oʻzlariga yaqin joylarda tashkil qilinayotgan bozorlardan mahsulotlar xarid qilishlarini hamda zarurat boʻlmaganda koʻchaga chiqmay, uyda qolishlarini soʻragan boʻlar edik.

Charos APSLONOVA.