HAMDAMNING OʻQUVChILARI ORASIDA IQTIDORLILARI KOʻP

Hamdam Rajabov 55-sonli maktabda oʻquvchilarga jismoniy tarbiya fanidan dars beradi. Pedagoglik faoliyatini boshlaganiga endigina 5-yil boʻlishiga qaramay, u birgalikda mehnat qilayotgan jamoada oʻz uslubiga ega, intiluvchan oʻqituvchi sifatida tanildi.

 Yoshlar maʼnaviyatini yuksaltirish va ularning boʻsh  vaqtlarini mazmunli tashkil etish boʻyicha Prezidentimiz ilgari surgan 5 ta muhim tashabbusning har bir bandi dars rejalarimizga kirdi, - deydi Hamdam Rajabov. - Oʻsib kelayotgan yosh avlodni jismonan baquvvat, maʼnan barkamol insonlar qilib tarbiyalashda sportning roli gʻoyat muhim.

Aslida katta sportga ilk qadam umumtaʼlim maktablaridagi jismoniy tarbiya fanidan boshlanadi. Buni yaxshi his etgan Hamdam Rajabov har bir oʻquvchining shaxsiy qiziqish, isteʼdodiga alohida eʼtibor beradi. Shu asosda oʻquvchilari bilan alohida shugʻullanishdan aslo charchamaydi.

Darvoqe, maktabda shashka, shaxmat, futbol, voleybol toʻgaraklarining aʼzolari orasida iqtidorli oʻquvchilar koʻp. 2019-2020 oʻquv yilida 1-, 4-, 5-, 6- va 7-8-sinflar oʻquvchilari “Umid nihollari” sport musobaqalarida muvaffaqiyatli ishtirok etdilar. Musobaqaning  shaxmat sporti turida 1-sinf oʻquvchisi Zokirjon Rustamov tumanda faxrli 1-oʻrinni egallab, musobaqaning Respublika bosqichiga yoʻllanma oldi.  Qizlar oʻrtasida 1500 metr masofaga yugurish musobaqalarida 5-sinf oʻquvchisi Dinora Ozodova ham musobaqaning tuman bosqichida 1-oʻrin sohibasi boʻldi.

Joriy yilning 10-yanvar kuni “Umid nihollari” sport musobaqalari dasturidagi sportning badiiy gimnastika turi  boʻyicha 1-4-sinflar oʻquvchi-qizlari oʻrtasidagi bellashuvlarda Asal Arabboyeva ham 1-oʻrinni egallab, musobaqaning Qoraqalpogʻiston Respublikasi bosqichiga yoʻllanma oldi.

Maktabda Hamdam Rajabov kabi oʻz kasbining chinakam fidoyilari koʻp. 5 ta tashabbus doirasidagi ishlarni hamjihatlik bilan oʻquvchi-yoshlar hayotiga tatbiq etish, kitobxon yoshlar safini yanada oshirish, kompyuter savodxonligini oʻstirish, sanʼat va sportga boʻlgan qiziqishlarini doimiy ragʻbatlantirib, oʻz isteʼdodlarini namoyon etishlariga koʻmaklashish – pedagogik jamoaning hamjihatlikdagi ishiga aylangan. Shu bois, Abbos Safarboyev, Odilbek Rahimov kabi ustoz-murabbiylarning har bir darsi oʻquvchilar uchun hamisha qiziqarli.

 Taʼlim tizimiga qaratilayotgan yuksak eʼtibor biz oʻqituvchilarni yanada fidoyilik bilan ishlashga undaydi, - deydi Hamdam Rajabov.

R.YOʻLDOShEVA.