Olimlar va yoshlar uchrashuvi bulib utdi

Davlatimiz rahbarining 2019-yil 27-dekabrdagi yoshlar bilan boʻlib oʻtgan uchrashuvida yoshlar siyosatiga oid belgilab qoʻyilgan maqsad va vazifalarning ijrosini taʼminlash yuzasidan yurtimiz boʻylab barcha sohalar boʻyicha mutasaddilar yoshlar bilan uchrashuvlar tashkil qilishmoqda.

Shuningdek, yoshlarning qiziqishlari, qobiliyatlarini yaqindan oʻrganish, ular orasidan iqtidorli yoshlarni aniqlab, toʻgʻri yoʻnalishlar berish hamda hududlardagi barcha sohalardan faoliyat yuritayotgan xodimlar bilan oʻzaro tajriba almashinish maqsadida ham uchrashuvlar oʻtkazilmoqda.

Shu maqsadda tabiiy hamda aniq fanlar boʻyicha bir guruh professor, olimlar 20-yanvar kuni tumanimizga tashrif buyurishdi.
Ishchi guruh oʻz ishini Qilichboy OFYda joylashgan 15-sonli umumtaʼlim maktabidagi oʻqituvchi hamda oʻquvchilar bilan uchrashishdan boshladi.

OʻzMU akademigi Azimboy Saʼdullayev, NDPI rektori Bayram Oʻtemuratov, UrDU pedagogika fakulteti dekani Jumanazar Yormatov, OʻzMU katta oʻqituchisi Karimboy Rahimov hamda matematika fani boʻyicha xalqaro olimpiyada gʻolibi, "Mard oʻgʻlon" mukofoti sohibi Sardor Bozorboyevlardan iborat ishchi guruh aʼzolarini maktab oʻquvchilari iliq kutib oldilar.

Oʻquvchilar tomonidan aytilgan Vatan, ona, tinchlik haqidagi sheʼrlar, shu bilan bir qatorda maktabning musiqa toʻgaragi aʼzolari boʻlgan oʻquvchilar ijrosida kuylangan qoʻshiqlar barchaga xush kayfiyat ulashdi.

Shundan keyin professorlar sinflarda oʻqituvchilar hamda oʻquvchilar bilan suhbat, ayni paytda oʻqituvchilar uchun mahorat darslarini oʻtkazdilar. Oʻqituvchilar taʼlim sohasidagi oʻzlarini qiziqtirgan barcha savollarga javoblar oldilar.
Suhbat chogʻida oʻquvchilarning komil inson boʻlib yetishlari, hayotda oʻz oʻrnini topishi, Vatan koriga yaraydigan shaxs sifatida shakllanishlarida ustoz va murabbiylarning oʻrni beqiyos ekanligi alohida eʼtirof etildi.

Suhbat mobaynida taʼkidlanganidek, ijtimoiy-iqtisodiy, siyosiy, madaniy sohalarda boʻlayotgan tezkor oʻzgarishlar taʼlim tizimini ham tubdan isloh qilishni taqozo etmoqda, chunki mukammal taʼlim tizimi orqali yurtimizning kelajak intellektual imkoniyatlarini va uni gullab-yashnashi hamda rivojlanishini belgilab beruvchi yoshlarni har tomonlama ijodkor, mustaqil faoliyat yuritadigan qilib tarbiyalashda asosiy omil boʻlib xizmat qiladi. Shuning uchun taʼlimda eng muhim yoʻnalish taʼlim muassasalarining innovatsion faoliyati hisoblanadi. Bu esa barcha taʼlim muassasalarida innovatsion texnologiya koʻrinishida faoliyat olib borish dolzarb masalalardan biri boʻlib kelmoqda.
Xususan, hozirgi kunda taʼlim jarayonida innovatsion texnologiyalar, pedagogik va axborot texnologiyalarini oʻquv jarayonida qoʻllashga boʻlgan qiziqish, eʼtibor kuchayib bormoqda. Ustozlar esa davr talabidan kelib chiqqan holda taʼlim jarayonlariga yondashishlari maqsadga muvofiq sanaladi.

Shuningdek, oʻqituvchilar dars jarayonlarini toʻgʻri tashkil qilish borasida savollar berib, oʻzlariga kerakli maʼlumotlarga ega boʻldilar. Oʻquvchilar esa olimpiyadalarga hamda OTMlarga kirish imtihonlariga tayyorgarlik koʻrish sir-asrorlari bilan tanishdilar.
Shundan keyin mehmonlar 82-sonli umumtaʼlim maktabining faollar zalida yoshlar bilan uchrashdilar. Uchrashuvda tashrif buyurganlar, oʻzlarining hayot tajribalari, ilm-fanning inson hayotidagi oʻrni haqida yigʻilganlar bilan suhbatlashdilar.

Tashrif chogʻida mehmonlar maktablar kutubxonalariga bir qancha qiziqarli kitoblar hamda televizor sovgʻa qildilar.

Yoshlar oʻzlarini qiziqtirgan savollarga javoblar oldilar.

Tuman hokimligi axborot xizmati.