AMUDARYoLIK IJODKOR YoShLAR BILAN UChRAShUV OʻTKAZILDI

Yoshlarga oid davlat siyosatini amalga oshirish borasida erishilgan natijalarni tahlil qilish, yoshlarning bugungi faoliyati va qiziqishlari bilan yaqindan tanishish, ularni qiynayotgan muammolarni aniqlash va hal qilish maqsadida Pespublika ishchi guruhi 16-yanvar kuni Amudaryo tumanida boʻlib, tumanning turli sohalarida faoliyat yuritayotgan yoshlar bilan uchrashdilar va yoshlarning oʻz sohalari boʻyicha erishayotgan yutuqlari, shu barobarida ular hayoti va faoliyati bilan bogʻliq muammolari bilan yaqindan tanishdilar. Orzu-intilishlari, muammolari yuzasidan bergan savollariga atroflicha javob berdilar.

Shuningdek, ishchi guruh aʼzolari OʻzMTDP Toshkent shahar Kengashi raisining Oila va ayollar masalalari boʻyicha oʻrinbosari Vasila Fayziyeva boshchiligida amudaryolik ijodkor yoshlar bilan ham uchrashdilar.

Darvoqe, Amudaryo tumanida oʻz uslubi, oʻz ovoziga ega ijodkor yoshlar talaygina. Tumanning ijtimoiy-siyosiy nashri – “Taraqqiyot koʻzgusi” va uning ilovasi “Mening oilam” gazetalari tahririyati qoshidagi “Jayxun ilhomlari” NNT faoliyatida faol ishtirok etayotgan Iroda Yerdosheva, Aziza Oʻrozboyeva, Qunduzoy Yusupova, Begzod Allaqulov, Javohir Yoʻldoshev, Umida Yerdosheva, Aziza Madrahimova, Shahlo Qurolova, Shokir Hayit kabi ijodkor yoshlarning ilk sheʼriy toʻplamlari chop etilib, allaqachon oʻz muxlislarini topgan.

Aziza Madrahimova, Qunduzoy Yusupova va Iroda Yerdoshevalar oʻz ijodlari bilan Qoraqalpogʻiston Respublikasi adabiy jamoatchiligiga yaxshi tanish.

Vasila Fayziyeva boshchiligidagi Ishchi guruh aʼzolari amudaryolik ijodkor yoshlar ishtirokidagi mushoira kechasida qatnashib, ularning ijodiy faoliyatlari bilan yaqindan tanishdilar. Ijodkor yoshlar oʻzlarining ona Vatanni, mehr-oqibat, millatlararo totuvlik, tinchlikni madh etuvchi sheʼrlarini oʻqib berdilar, kuy va qoʻshiqlar ijro etdilar. Shu bilan birga oʻzlarini qiziqtirgan savollarga ishchi guruh tomonidan qoniqarli javoblar olishdi.

Robiya YOʻLDOShEVA.