“Umid nihollari” sport musobaqasining tuman bosqichida qilichboylik Zaynab Otajonova shaxmat boʻyicha gʻolib boʻldi

Shaxmat qadim tarixga ega boʻlgan ommabop  sport turlaridan biri sanaladi. U aql va tafakkurni charxlab, mulohaza yuritishga chorlaydi. Shuningdek, chuqur oʻylashga, har qanday vaziyatda aql va sabr bilan ish tutishga oʻrgatadi. Yosh avlodni barkamol, maʼnan yetuk qilib tarbiyalashda ushbu sport turining ham ahamiyati katta boʻlganligi sababli umumtaʼlim maktablarida toʻgaraklar tashkil qilingan boʻlib, muntazam oʻtkazilayotgan mashgʻulotlarda oʻquvchilar  shaxmat va shashka oʻyini usullarini oʻrganishadi

9-yanvar kuni tumandagi Bolalar va oʻsmirlar sport maktabida “Umid nihollari” sport musobaqasining tuman bosqichi oʻtkazildi. Ushbu musobaqada 7-9, 11-13, 15-17 yosh toifalari boʻyicha oʻgʻil-qizlar sportning shaxmat turi boʻyicha bellashdilar. Shaxmat musobaqasida tumanimizning 8 ta hududidan jamoalar qatnashdi.

Shvetsarcha tizimda elektron soatlardan foydalangan holda oʻtkazilgan mazkur musobaqada 69-sonli maktabning jamoasi ham qatnashib, oʻz iqtidorlarini namoyish etdilar. Oʻgʻil bolalar oʻrtasida oʻtkazilgan musobaqada raqiblaridan ustun kelgan 7-sinf oʻquvchisi Javohir Aminov 3-oʻrinni, Joʻrabek Aminov ham 3-oʻrinni egalladi. Qizlardan  10-sinf oʻquvchisi Zaynab Otajonova 1-oʻrin, 4-sinf oʻquvchisi Xolida Otajonova esa 2-oʻrin gʻoliblari boʻldilar. Shuningdek, Zaynab Otajonova musobaqaning Qoraqalpogʻiston Respublikasi bosqichiga yoʻllanmani qoʻlga kiritdi.

Musobaqa gʻoliblari tashkilotchilar tomonidan diplom va qimmatbaho sovgʻalar bilan taqdirlandilar.

Bahrom Matmurodov, 69-sonli maktabning jismoniy tarbiya fani oʻqituvchisi.