AMUDARYoLIK SANʼATKORLARGA LITsENZIYaLAR TOPShIRILDI

Xalqimizning qutlugʻ kunlari, toʻy-tantanalarni sanʼatkorlarsiz tasavvur qilib boʻlmaydi. Ular ijro etgan kuy-qoʻshiqlar koʻngillardagi shodu xurramlikning, ezgu niyatlarning, tilaklarning ifodachisidir.

Keyingi yillarda toʻy-marosimlarni oʻtkazishda milliy urf-odatlarimizni, umrboqiy anʼanalarimizni mensimaslik holatlariga duch kelayotgan edik. Toʻylar xuddi kimlarningdir “bori”ni koʻz-koʻz qilishi uchun oʻtkazilayotganday edi. Shuningdek, sanʼatkorlarning xizmat koʻrsatishida ham kamchiliklarga yoʻl qoʻyilayotgan edi.

Shu yilning 14-sentyabrida Oʻzbekiston Respublikasi Oliy Majlisi Qonunchilik palatasi va Senati Kengashlarining “Toʻylar, oilaviy tanatanalar, maʼraka va marosimlar oʻtkazilishini tartibga solish tizimini yanada takomillashtirish toʻgʻrisida” qoʻshma qarori qabul qilindi. Ushbu qarorga muvofiq “Toʻylar, oilaviy tantanalar, maʼraka va marosimlar oʻtkazilishini tartibga solish toʻgʻrisida” Nizom tasdiqlandi. Nizomda toʻy-marosimlarni oʻtkazishdagi kamchiliklarni bartaraf etish choralari belgilangan. Xususan, kelgusi yilning 1-yanvaridan boshlab bu borada qatʼiy tartib amal qila boshlaydi.

Shu munosabat bilan toʻy-maʼrakalarda xizmat koʻrsatuvchi toʻyxonalar, avtotransport vositalari egalari, sanʼatkorlar xizmat koʻrsatish huquqini beruvchi litsenziya olmoqdalar.

Albatta, jamiyatimizda amal qilayotgan qonun-qoidalarni hurmat qilish, ularga boʻysunish har bir fuqaroga daxldor vazifadir. Buni tumanimiz sanʼatkorlari ham sidqidildan his qilmoqdalar.

Shu yilning 14-dekabrida tuman Madaniyat boʻlimida boʻlib oʻtgan tantanali yigʻilish ham fikrimizning isbotidir. Yigʻilishda “Oʻzbekkontsert” davlat muassasasi Qoraqalpogʻiston Respublikasi boʻlimining litsenziyalash boʻlimi mudiri Allambergan Oʻtepov tumanimizga tashrif buyurib, oʻz soʻrovlariga koʻra, tumandagi bir guruh sanʼatkorlarga toʻylar va oilaviy tantanalarda qonun hujjatlariga muvofiq shartnoma asosida xizmat koʻrsatish huquqini beruvchi litsenziyani tantanali suratda topshirdi.

Yigʻilishda sanʼatkorlar orasida bu borada  keng tushuntirish ishlarini olib borgan tuman Madaniyat boʻlimi maʼmuriyatiga, Amudaryo televideniyesiga va suxandon Ergash Otayevga “Oʻzbekkontsert” davlat muassasasi Qoraqalpogʻiston Respublikasi boʻlimining Tashakkurnomalari ham topshirildi.

O.RAJABOVA.