STOL TENNISI BOʻYIChA QOPAQALPOGʻISTON ChEMPIONATI OʻTKAZILDI

Sport - bu sogʻlom hayot kechirishning birlamchi omilidir.  U taʼlim va tarbiyaning ajralmas boʻlagi hamda sogʻlom va barkamol avlodni shakllantirishning asosiy tayanchidir.   Chu sababli ham yurtimizda sogʻlom avlodni tarbiyalash davlat siyosatining ustuvor yoʻnalishlaridan biri hisoblanib,  jismoniy tarbiya va sport rivojiga katta eʼtibor qaratilmoqda.  Bu esa oʻz navbatida sportchilarimizning erishayotgan yuksak yutuqlari va jahon darajasidagi sport inshootlarining barpo etilayotganida aks etmoqda.   Davlatimiz tomonidan yoshlarni sportga jalb qilish,  ularni sport sohasida yurtimiz ravnaqini yanada yuksaltirishlari uchun koʻplab imkoniyatlar yaratilmoqda.   Ushbu imkoniyatlardan samarali foydalangan holda sportchilarimiz nafaqat Respublikamizda,   balki jahon arenalarida yurtimiz bayrogʻini yuqori koʻtarishmoqda. 

Sportchilarning imkoniyatlarini yuzaga chiqarishlari,  oʻz qobiliyatlarini namoyon qilishlari uchun turli xil sport musobaqalari tashkil qilinayotgani esa sportchi yoshlar safining oshishiga xizmat qilmoqda.  

Tumanimizda 23-26-oktyabr kunlari Bolalar va oʻsmirlar sport maktabida sportning stol tennis turi boʻyicha 7 yoshdan 14 yoshgacha boʻlgan oʻgʻil bolalar va qizlar oʻrtasida Qoraqalpogʻiston Respublikasi Chempionati oʻtkazildi.  Musobaqada Nukus shahri,   Amudaryo,   Beruniy,   Toʻrtkul,   Taxyatosh,   Qoʻngʻirot,   Taxtakoʻpir,   Xoʻjeyli tumanlari sportchilari ishtirok etdilar. 

Musobaqa natijalariga koʻra oʻgʻil bolalar oʻrtasida faxrli 1-oʻrinni Nukus shahridan Erniyaz Oʻtepbergenov,   2-oʻrinni Davlet Muratboyev,   3-oʻrinni esa Amudaryo tumanidan Dastonbek Jumanazarov va Jonibek Baxtiyorovlar egalladilar.   Qizlar oʻrtasida faxrli 1-oʻrinni Nukus shahridan Aygul Atabayeva,  2-oʻrinni amudaryolik Sevinch Rajapova,   3-oʻrinni esa Nukus shahridan Kunsuluv Qoʻshmuratova va Taxiyatosh tumanidan Munisa Jalgʻasova egalladilar.  

Chempionatda bahslar aralash juftlik va juftlik jamolar oʻrtasida ham oʻtkazildi.   Aralash juftlik musobaqalari natijalarida koʻra faxrli 1-oʻrinni Nukus shahridan Salomat Qadrimbetov va Laylo Allaberganovalar egalladilar.   Chuningdek,   oʻgʻil bolalar oʻrtasida juftlik bahslarda Amudaryo tumanidan Akbar Qurbonboyev va Ruslanbek Marksovlar faxrli 1-oʻrinni egalladilar.  Chempionat gʻoliblariga medallar va qimmatbaho sovgʻalar topshirildi.

Mazkur chempionat yurtimizda bolalar sportini rivojlantirish borasida amalga oshirilayotgan islohotlarning samarasi sifatida koʻplab yosh iqtidor egalarini kashf qildi.  Unda ishtirok etgan oʻsmirlar va yoshlar esa nafaqat kuch va mahoratlarini sinovdan oʻtkazishdi,  balki sogʻlom turmush tarzi sari qadam tashlab,  salomatliklarini mustahkamladilar.  Darhaqiqat,  farzandi kamolini koʻrish,   uning hayotda oʻz oʻrniga ega boʻlishini oliy maqsad deb biladigan har bir ota-ona uchun oʻgʻil-qizining salomatligi,   jismoniy etukligi – barkamolligidan ortiq baxt boʻlmasa kerak.   Bu baxtga erishish,   ezgu orzu-umidlarning ushalishida sport muhim ahamiyat kasb etadi.   Har tomonlama etuk,   yurtimiz shaʼnini koʻklarga koʻtaradigan,   barkamol avlodning shakllanishiga oʻz hissasini qoʻshayotgan tuman bolalar-oʻsmirlar sport maktabi jamoasiga esa ulkan zafarlar va muvaffaqiyatlar tilaymiz.

Charos Arslonova

Amudaryo tumani hokimligi

axborot xizmati rahbari.