MTMda hosil bayrami tadbiri oʻtkazildi

Kuz faslining oʻziga xos gashti, jozibasi bor. Yil boʻyi dehqon-u fermerlar, bogʻbon-u sohibkorlar oʻzlari qilgan mehnatning samarasini aynan shu faslda koʻradilar. Hosil xirmonlaridan, ekin-tikin barakasidan koʻngli toʻq dehqon yil sarhisobidan mamnun holda toʻkin dasturxon atrofida hosil bayramini nishonlaydi. Erishilgan katta muvaffaqiyatlar nafaqat dehqon-u fermerlarga, balki butun xalqimizga koʻtarinki ruh bagʻishlaydi va baland-baland xirmonlar uyilgan dalalardan boshlangan hsoil bayrami har bir xonadonga, ovul va mahallaga, hatto idora va muassasalarga ham koʻchadi.

Mamlakatimizga, shu jumladan tumanimizga ham kuz fasli ana shunday hosil bayramlari bilan yanada fayz-u tarovat baxsh etadi.

Ayni kunlarda tumanimizning qaysi goʻshasiga bormang, 2019-yilda paxtakorlarimiz, pillakor-u bogʻbonlar, chorvador-u sohibkorlarimiz erishgan yutuqlardan shod-u xurram xalqimiz hamjihatlik bilan hosil bayrami tadbirlarini oʻtkazishmoqda.

Ana shunday hosil bayrami tadbiri Bobur nomli ovuldagi 22-sonli  maktabgacha taʼlim muassasasida ham oʻtkazildi. Milliy iftixorimiz va gʻururimiz boʻlgan paxta, yetti xazinaning biri sifatida qadrlanuvchi pilla, zaminimizda yetishtirilgan shirin-shakar meva va sabzavotlar haqida sheʼrlar, ertaklar aytgan bolajonlar oʻzlarining chiqishlari bilan barchani mamnun etdilar.

Ayniqsa, toʻrtta fasl bilan suhbat qurgan, har fasldan oʻziga xos maʼno-mazmunlar topib, yuksak xirmonlar uygan Dehqon bobo bilan bolajonlarning muloqoti, MTM musiqa rahbari Sobir Qurbonboyev tomonidan tayyorlangan jonli sahna koʻrinishlari va bu jarayondagi bolajonlarning ishtiroki hosil bayrami tadbiriga yanada fayz bagʻishladi.

Hosil bayrami tadbirini tayyorlashda MTM xodimlari Marhabo Qodirova, Manzura Kenjaboyeva, Xurshida Toʻliboyevalar 2019-yilda Bobur nomli ovul hududidagi fermer xoʻjaliklari va bu xoʻjaliklarda mehnat qilayotgan bolajonlarning ota-onalari, bobo va buvijonlari mehnatini qadrlash, yetishtirilgan moʻl-koʻl hosil neʼmatini asrab-avaylash, bu neʼmatlarning inson salomatligi uchun qanchalik ahamiyatli ekanligiga alohida ahamiyat berganliklari bois, bolajonlar qalbida Vatanga muhabbat, ona yurt zaminida yetishtirilgan neʼmatlardan faxrlanish, bobodehqonlarimizning  halol va fidoyi mehnatlariga nisbatan hurmat va ehtirom tuygʻulari yanada mustahkamlandi.

- Bu kabi tadbirlar oʻsib kelayotgan yosh avlodni vatanparvarlik, ota-onalari mehnatiga hurmat, tabiat neʼmatlariga ehtiyotkorona munosabatda boʻlish ruhida tarbiyalashga xizmat qiladi, - deydi MTM mudirasi Raʼno Qodirova.

Robiya YOʻLDOShEVA.