“Amudaryo paxta tozalash” AJ 18 ming tonnadan ortiq paxta hosilini qabul qildi

Tumanimiz qishloq xoʻjaligining asosiy tarmogʻi boʻlgan paxtachilikda yangi agrotexnologiyalarni qoʻllash, iqlim sharoitimizga mos, hosildor va tezpishar navlar urugʻlarini ekish, yetishtirilgan hosilni qabul qilish punktlarida sifatli qayta ishlash, saqlash moʻl daromad olinishiga zamin yaratadi.

Bizning “Amudaryo paxta tozalash” aktsiyadorlik jamiyatimiz tumanimizdagi 181 ta paxtachilik fermer xoʻjaliklari bilan yetishtirilgan hosilni qabul qilish, qayta ishlash, saqlash yuzasidan shartnoma tuzgan. Mazkur xoʻjaliklarda yetishtirilgan hosil “Qilichboy”, “Paxtakor”, “Zavod qoshi” qabul punktlari orqali qabul qilinayapti.

Qabul qilish, tozalash, qayta ishlash jarayonlariga zamonaviy axborot-kommunikatsiya texnologiyalari joriy etilgan boʻlib, olib kelingan hosil elektron tarozilarda oʻlchanadi va quritilib, tozalanib, buntlanadi.

Mavsum davomida qabul punktlarimizda jamiyatimiz bilan shartnoma tuzgan 181 ta fermer xoʻjaliklaridan shu kungacha 17345 tonnadan ziyod hosil qabul qilindi. Qabul vaqtida texnologiyalar betoʻxtov ishlashi taʼminlanayapti. Yaʼni ertalabki soat 8 dan kechki 19 gacha urugʻlik chigit olish uchun ekilgan paxta hosili, soat 19 dan 24 gacha esa texnik paxta hosili qabul qilinayapti. Qabul qilish Agroinspektsiya tuman boʻlimi xodimi ishtirokida, laboratoriyada sifat koʻrsatkichlari tekshirilib, amalga oshiriladi. Natijada olib kelingan hosil peshma-pesh qabul qilinadi va salmogʻi haqqoniyligi taʼminlanadi.

Mavsum davomida qabul punktlariga paxta hosilini topshirayotgan fermer xoʻjaliklari bilan oʻz vaqtida mahsulot hisob-kitobini amalga oshirib, tegishli pullarini ularning bankdagi hisob raqamlariga oʻtkazib berayapmiz.

Paxta – oqlik, begʻuborlik timsoli. Boisi, u halol va fidoyi mehnatdan yaraladi. Bugun tumanimiz paxtakorlari kuzgi sarhisobda yuzlari yorugʻ boʻlib, yillik paxta tayyorlash rejalarini ortigʻi bilan bajardilar, 32 ming 250 tonnalik sarbaland xirmon bunyod etildi. Albatta, bu ulkan yutuq zamirida dehqonlarimizning yil-oʻn ikki oy dalada, qishning izgʻirini-yu, yozning jaziramasida qilgan beminnat mehnatlari mujassam.

Shunday quvonchli lahzalarda tumanimizning barcha qishloq xoʻjaligi xodimlarini, pudratchilarni erishgan yutugʻi bilan tabriklayman. Xirmonlaringiz yanada yuksalaversin, deyman.

Suhrob BOBOJONOV, “Amudaryo paxta tozalash”

AJ tayyorlov boʻlimi boshligʻi.