38 nafar patronaj hamshiralariga velosipedlar topshirildi

Mamlakatimizda barcha sohalar qatori sogʻliqni saqlash tizimi ham yangilanib, takomillashib bormoqda. Bugungi kunda bu yoʻnalish boʻyicha Prezidentimiz tomonidan qabul qilingan muhim qarorlar hamda kiritilayotgan ilgʻor texnologiyalar tibbiy xizmat sifatini yuksaltirib, kasalliklarni erta aniqlash, samarali davolash imkoniyatini yanada kengaytirmoqda. Ayniqsa, aholining tibbiy madaniyatini oshirish, sogʻlom turmush tarzini targʻib etish, har bir hududda kasallanish darajasini pasaytirish, profilaktika ishlarini yanada yaxshilashda tibbiy patronaj xizmati alohida ahamiyat kasb etmoqda.

Bosuv mahallasi hududiga patronaj xizmati boʻyicha biriktirilgan Gulbahor Yangiboyeva tajribali va bilimli, shu qatorda masʼuliyatli, fidoyi hamshiralardan biridir. U oʻrta tibbiyot xodimi vazifasida 22-yildan beri xizmat qilib kelmoqda. Oʻz hududidagi aholi xonadonlaridan rejaga muvofiq, tez-tez xabar olib turadi. Parvarishga muhtoj yolgʻiz keksalar, nogironlar va boshqa shu toifaga kiruvchilar, homiladorlar, bir yoshga toʻlmagan bolalar, yaqinda farzand koʻrgan ayollar salomatligini muntazam kuzatib boradi. Tibbiy profilaktika koʻrigiga jalb etish, bola­larni emlashga toʻliq qamrab olish, emlash natijalarini kuzatib borish, oilalarga tibbiy maʼrifat tarqatishdek muhim vazifani astoydil bajarayotgan patronaj hamshirasidan hududdagi aholi ham nihoyatda mamnun.

Patronaj xizmati homiladorlar, goʻdaklar, yosh oilalar, keksalar, yangi farzand koʻrgan ayollar va parvarishga muhtoj yolgʻiz qariya, nogiron hamda oʻzgalar parvarishiga muhtoj shaxslarga uy sharoitida tibbiy xizmat koʻrsatish tizimidir. Aholi salomatligiga javobgar yoʻnalish boʻlgan patronaj xizmati rivojidan, avvalo, onalar va bolalar sogʻligʻini mustahkamlash, ularni toʻliq patronaj tizimi bilan qamrab olish kabi maqsadlar koʻzda tutilgan.

Amudaryo tumanida bugungi kunda 33 ming 877 ta xonadonda yashovchi  197 mingdan ziyod aholiga 1 ta koʻp tarmoqli markaziy poliklinika, 7 ta Qishloq oilaviy poliklinikasi va  2 ta Qishloq vrachlik punkti orqali birlamchi tibbiy sanitariya yordami va  patronaj  xizmati  koʻrsatiladi. Qishloq oilaviy poliklinikalari va Qishloq vrachlik punktlariga biriktirilgan  23 ming 287 ta xonadonda yashovchi 132 ming 500 nafardan ziyod aholi salomatligiga 54 nafar umumiy amaliyot shifokori, 253 nafar oʻrta tibbiyot xodimi va shundan 150 nafar patronaj hamshiralar masʼul hisoblanadi.

Tuman markazidagi 10 ming 590 ta xonadonda yashovchi  64 mingdan ortiq aholi esa koʻp tarmoqli markaziy poliklinikadagi 29 nafar umumiy amaliyot shifokori va 103 nafar oʻrta tibbiyot xodimi,  shundan 71 nafar patronaj hamshiralari tibbiy xizmatidan foydalanadi.  

Birlamchi tibbiy sanitariya muassasalarida aholiga patronaj xizmati koʻrsatish boʻyicha tumanda 221 nafar patronaj hamshiralar oʻz xizmat vazifalari, bilimi, mahorati va tibbiy madaniyati boʻyicha toʻliq tayyorgarlikdan oʻtib, el salomatligi yoʻlida fidoyilik qilmoqda.

Ana shunday oʻz kasbining fidoyilariga 4-oktyabr kuni tuman Tibbiyot birlashmasida oʻtkazilgan tadbirda xizmat velosipedlari topshirildi.

Tadbirda soʻzga chiqqan tuman hokimi oʻrinbosari  Alisher Yoʻldoshev, tuman Tibbiyot birlashmasi boshligʻi Endirboy Abdullayev va boshqalar tibbiy patronaj xizmati aholining sogʻlom hayot kechirishini taʼminlashga xizmat qilayotganligini, eng chekka hududlardagi oilalarni ham toʻliq qamrab olishda muhim oʻrin tutayotganligini, hamshiralarga ham oʻz vazifalarini toʻla ado etishlari uchun yetarli sharoitlar yaratilayotganligini taʼkidlab oʻtishdi. Shundan soʻng, 38 nafar patronaj xizmati hamshiralariga olis qishloqlardagi aholi xonadonlariga qatnovni amalga oshirishlari uchun velosi­pedlar topshirildi.

Shu oʻrinda aytish kerakki, patronaj hamshiralari yosh oilalar, fertil yoshdagi ayollar, bolalar va oʻsmirlar salomatligini oʻz vaqtida kuzatib borish bilan birga oʻzlariga biriktirilgan aholi xonadonlariga muntazam ravishda borib, turmush tarzi, sanitariya holatlarini ham oʻrganishmoqda. Xonadonlarda shaxsiy gigiyena qoidalari, ovqatlanish madaniyati, hovlidagi chiqindilarni yigʻish va chiqarish tartiblari boʻyicha suhbatlar oʻtkazishmoqda. Har bir uydagi oshxona, hojatxona, yuvinish xonalarini toza tutish, ularni belgilangan tartibda saqlash qoidalarini tushuntirishmoqda.

Endilikda tibbiy muassasalar tomonidan aholiga yanada sifatli va tezkor tibbiy xizmat koʻrsatish yoʻlga qoʻyiladi. Bu esa kasalliklarning oʻz vaqtida oldini olish, onalik va bolalikni tibbiy-ijtimoiy muhofaza qilishda muhim ahamiyat kasb etadi. Bunday eʼtibor va ragʻbat oʻrta tibbiyot xodimlariga oʻz faoliyatini rivojlan­tirish, patronaj xizmatini yanada yuksaltirishda katta koʻmak boʻladi.

O.Xudoyberganova.