Tuman fermer, dehqon xoʻjaliklari va tomorqa yer egalari Kengashi tomonidan Xolimbeg ovulida tomorqadan unumli foydalanish boʻyicha seminar oʻtkazildi
23-mart kuni tumanimizning Xolimbeg ovulida tomorqaga ekin ekish tartib-taomillari va undan olinadigan daromadlar hajmini oshirish masalasida seminar oʻtkazildi.
Seminarda mamlakatimizda aholining munosib hayot kechirishini taʼminlashga hissa qoʻshayotgan fermer xoʻjaliklari va tomorqa yer egalari uchun qulay ishbilarmonlik muhiti yaratish, faoliyatini har tomonlama qoʻllab-quvvatlash hamda sifatli qishloq xoʻjaligi mahsulotlari yetishtirishni kengaytirish boʻyicha keng koʻlamli ishlar amalga oshirilayotgani taʼkidlandi.
Tomorqadan unumli foydalanib, arzon, sifatli meva-sabzavot va poliz mahsulotlari yetishtirayotgan dehqonlar tajribasini ommalashtirish maqsadida tashkil qilingan seminarda mutaxassislar tomorqaga ekin ekishning yoʻl-yoʻriqlari, moʻl hosil olish sirlari, yetishtirilgan hosilni qayta ishlash, saqlash, tayyor mahsulotlarni sotish kabi koʻp tarmoqli faoliyatni yoʻlga qoʻyish boʻyicha atroflicha maʼlumotlar berildi.
Tuman Fermer, dehqon xoʻjaliklari va tomorqa yer egalari kengashi tomonidan tashkil qilingan seminarda tumanimizda faoliyat yuritayotgan “Tomorqa xizmati” maʼsuliyati cheklangan jamiyati faoliyati toʻgʻrisida ham maʼlumotlar berildi. Tumanimizda “Tomorqa xizmati” masʼuliyati cheklangan jamiyati faoliyati toʻliq yoʻlga qoʻyilganidan keyin oʻnlab yangi ish oʻrinlari yaratiladi. Jamiyat tomonidan shu kungacha kam taʼminlangan oilalar tomorqasini ekishga tayyorlash, ularga qishloq xoʻjaligi ekinlari urugʻini yetkazib berish, turli xil meva koʻchatlari bilan bepul taʼminlash boʻyicha ham bir qator ishlar olib borildi. Tumanimizning usta sohibkor bogʻbonlaridan iborat targʻibot guruhi tashkil etildi. Ular qishloqma-qishloq, xonadonma-xonadon yurib, tomorqa xoʻjaligi bilan tanishib, oʻzlarining maslahatlarini berishmoqda. Shuningdek, jamiyat tomonidan issiqxonalar qurishda aholiga yordam berish borasida ham bir qator loyihalar amalga oshirilmoqda.
Seminarda yerni ekishga tayyorlash, koʻchat va urugʻ ekish, mevali daraxtlarga shakl berish, ularni zararkunandalardan himoya qilish va boshqa koʻplab agrotexnik tadbirlar mutaxassislar tomonidan amaliyotda namoyish qilindi. Tuman fermer, dehqon xoʻjaliklari va tomorqa yer egalari Kengashi bu kabi seminarlarni boshqa hududlarda oʻtkazishni ham rejalashtirmoqdalar. Maqsad esa bitta – bir qarich ham tomorqa yerining boʻsh qolishiga yoʻl qoʻymaslik, shu orqali aholi daromadini oshirish, dasturxonlarimiz toʻkinligini taʼminlash va xalq farovonligini yanada yaxshilashdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
