YuKSAK QADR TOPGAN MEHNAT EʼTIROFI
Men oʻzimning 43 yillik shifokorlik faoliyatim davomida insonlar uchun eng avvalo omonlik, salomatlik zarur ekanligini doimo his qilib kelaman.
Ha, inson uchun sogʻlikdan ulkan boylik yoʻq. Biroq buni koʻpchilik ana shu bebaho boyligiga putur yetganida anglaydi.
Har qanday kasallikning, ayniqsa, yuqumli kasalliklarning bartaraf etilishi maʼlum muddatlarni talab etadi. Shuning uchun ham baʼzi bemorlarimiz boʻlimimizga qabul qilingan kunidanoq “nega tuzalmayapman?” deb soʻray boshlashadi. Baʼzilari esa davolanish muddatiga amal qilmaydi va uyiga borib uch-toʻrt kundan kasali qaytalanib, qaytib keladi.
Men 1975-yilda Oʻrta Osiyo Tibbiyot pediatriya institutini tugatib, shifokorlik faoliyatimni boshlagan boʻlsam, shu davrdan hozirgi kungacha bemorlarni davolash jarayonida ularga kasallikdan saqlanish, sogʻlom yashash sirlarini tushuntirib kelaman.
Tuman markaziy shifoxonasining men rahbarlik qilayotgan yuqumli kasalliklar boʻlimi 30-oʻringa moʻljallangan boʻlib, maxsus qurilgan yangi binoda faoliyat olib bormoqda.
Boʻlimimiz qattiq va yumshoq jihozlar, zarur asbob-uskunalar bilan taʼminlangan, karavotoldi monitori, pulsaksometr, oftomalaskop, laringoskop bemorlarga sifatli tibbiy xizmat koʻrsatilishiga xizmat qiladi.
Yilimizning oʻtgan 10 oyi mobaynida boʻlimimizda ikki yarim mingdan ortiq bemorlar davolanib, sogʻliklarini tiklab, oilasiga qaytdilar. Bu bizning imkoniyatimizdan deyarli ikki baravardan ziyodni tashkil etadi. Shuning oʻziyoq boʻlimimiz tibbiyot xodimlarining oʻz kasbini qanchalik fidoyilik bilan ado etayotganini koʻrsatadi. Dilfuza Jumaniyozova, Muyassar Masharipova, Omonjon Ibrohimova, Roza Shukurullayeva, Dilshoda Norimbetovalar kabi hamshiralarimizning xizmatlari har qancha tahsinga loyiq.
Mamlakatimizda xalqimizning dardiga darmon boʻlayotgan tibbiyot xodimlarining mehnati yuksak qadrlanib, noyabr oyining ikkinchi yakshanbasi Tibbiyot xodimlari kuni deya belgilangani bizning mehnatimizning eʼtirofi deb bilaman va barcha kasbdoshlarimni anʼanaviy bayram bilan qutlayman.
Ozod QURBONBOYeV, tuman Markaziy shifoxonasi
yuqumli kasalliklar boʻlimi mudiri.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
