DAVO ChORALARINING AVVALI – SAMIMIYLIK

Shifokorlik – oʻta masʼuliyatli, shu bilan birga sharafli kasb. Insonlar koʻngliga yoʻl topib, dardlariga malham boʻlib yashash – shifokorning hayot mazmuni. Rustam Jumaniyozov har gal oʻzi rahbarlik qilayotgan rejali jarrohlik boʻlimida davolanayotgan bemorlar bilan suhbatlashganida, ularning umid toʻla nigohlariga boqqanida doimo koʻnglidan bir oʻy kechadi: “inson – aziz, uning sogʻligi yanayam aziz, shu aziz insonlar koʻzlaridagi umid hech qachon soʻnmasligi kerak”.

Tuman Tibbiyot birlashmasining rejali jarrohlik boʻlimi shifokorlari uchun kun-u tun ish jarayonlari qizgʻin kechadi. 30 ta oʻringa moʻljallangan boʻlim tarkibida 20 ta jarrohlik va 10 ta urologik koykalar mavjud. Asosan rejali jarrohlik xizmatini amalga oshirishga moʻljallangan boʻlim uzluksiz issiqlik taʼminotiga ega. Barcha xonalar tibbiy qoplamalar va zamonaviy funktsional anjomlar bilan jihozlangan. Boʻlim toza va yiringli sektorlarga ajratilib, bogʻlash xonalari ham alohida joylashtirilgan. Jarrohlik boʻlmasida anesteziolog, material tayyorlash, jarrohlik amaliyotidan oldingi yuvinish xonalari hamda jarrohlik zali joylashgan boʻlib, mazkur boʻlma eng zamonaviy tibbiy anjomlar bilan taʼminlangani boʻlimda davolanishni istovchi bemorlarda mamnuniyat hissini uygʻotmoqda.

Rejali jarrohlik boʻlimida barcha shart-sharoitlar mavjudligi nafaqat shifokorlar uchun, balki bemorlar uchun ham ancha qulayliklar yaratadi.

Bemorlar koʻngliga yoʻl topib, mehrini qozonayotgan boʻlim shifokorlarining mehnatlari tahsinga loyiq. Oliy toifali shifokorlar – boʻlim mudiri Rustam Jumaniyozov, ordinator shifokor-jarroh Baxtiyor Yavidov, malakali jarroh Komiljon Bobojonov, bolalar jarrohi Shukurulla Ismoilov, urolog-shifokor Sh.Jumaniyozovlarni xalqimiz “qoʻli yengil shifokorlar”- deya olqishlaydilar. Aynan shu shifokorlar va boʻlimda faoliyat olib borayotgan barcha oʻrta va kichik tibbiyot hamshiralarining fidoyiliklari tufayli 2018-yil boshidan beri 481 ta jarrohlik amaliyotining barchasi muvaffaqiyatli amalga oshirilib, turli xil jarrohlik kasalliklari bilan davolangan 1085 nafar bemorning sogʻligi tiklanib, sogʻlom hayotga qaytarildi.

– Maqtanish emas-u, boʻlimimiz shifokorlari sifatli tibbiy yordam koʻrsatish, davolash ishlarini olib borishda har qanday malakali mutaxassislardan kam emas. Sababi, shifokorlarimizning barchasi oʻz ustlarida tinimsiz ishlaydilar, uzluksiz ravishda malakalarini oshirib bormoqdalar. Bundan ham muhimi, boʻlimimiz jamoasi har qanday vaziyatda ham qalblarida katta hurmat va samimiyat hissi bilan mehnat kunlarini boshlaydilar, – deydi boʻlim mudiri Rustam Jumaniyozov. – Men fursatdan foydalanib, ana shunday samimiy qalbli kasbdoshlarimizni, hurmatli ustozlarimizni anʼanaviy kasb bayramlari bilan chin dildan tabriklayman. Tilagim, insonlar xoh u bemor boʻlsin, xoh shifokor – hamisha sogʻlom, samimiy boʻlsinlar!

Robiya YOʻLDOShEVA.