“Faxriy fuqaro” unvonini berish tartibi joriy etilishi mumkin

Ayni kunlarda "Oʻzbekiston Pespublikasida investitsion muhitni tubdan yaxshilash chora-tadbirlari toʻgʻrisida"gi Oʻzbekiston Pespublikasi Prezidentining Farmoni loyihasi qizgʻin muhokama qilinmoqda.

Farmonga loyihasida aytilishicha:

1. 2018-yil 1-avgustdan:

investor va tadbirkorlik subʼektiga davlat organi tomonidan qabul qilingan hujjat natijasida yetkazilgan mulkiy zarar qoplanadi;

davlat organining hujjatini bekor qilish yoki oʻzgartirish masalasi sud tartibida koʻrib chiqiladi.

2. 2018-yil 1-sentyabrdan boshlab:

yer uchastkalarini olib qoʻyish haqidagi qaror faqat aholi bilan ochiq muhokamadan keyin yoʻl qoʻyiladi;

koʻchmas mulkning buzilishiga uning bozor qiymati toʻliq qoplangandan keyin yoʻl qoʻyiladi;

3. Davlat va jamoat ehtiyojlari uchun yer uchastkalarini olib qoʻyishning 6 ta holati belgilab qoʻyilmoqda.

4. Bundan tashqari quyidagilar taklif etilmoqda:

chet el investitsiyasi ishtirokidagi korxonalar ustav fondida chet el investitsiyalarining minimal miqdori 30 foizdan 15 foizgacha tushirish;

chet el investitsiyasi ishtrokidagi korxona ishtirokchilaridan biri albatta xorijiy yuridik shaxs boʻlishi shartligi haqidagi talabni bekor qilish;

chet el nvestitsiyasi ishtirokidagi korxonalar ustav fondining minimal miqdorini 600 mln soʻmdan 400 mln soʻmgacha tushirish;

chet el investitsiyalar ishtirokidagi korxonalarni davlat roʻyxatidan oʻtkazish uchun davlat boji miqdorini uch baravargacha tushirish;

aktsiyadorlik jamiyatlari ustav kapitalida chet ellik investor ulushining mavjud boʻlish shartini bekor qilish;

aktsiyadorlik jamiyatlari ustav fondining minimal miqdorini 400 mln soʻm qilib belgilash;

eksport kontraktlarini kontrakt tuzilgan kunda “Oʻzagroeksport” AJ eʼlon qilgan narxlardan past boʻlmagan narxlar boʻyicha tuzish tartibini bekor qilish.

5. Chet el fuqarolari Oʻzbekiston Pespublikasida kamida 200 ming AQSh dollari miqdorida investitsiyani:

koʻchmas mulk sotib olish tariqasida kiritsa, soddalashtirilgan tartibda Oʻzbekiston Pespublikasida istiqomat qilish uchun yashash guvohnomasini olish;

aktsiya va ulushlarini sotib olish, shuningdek xorijiy korxona tashkil qilish shaklida kiritsa, koʻp martalik vizalarni 3-yilgacha boʻlgan muddatda, amal qilish muddatini cheklanmagan miqdorda uzaytirish imkoniyati bilan olish huquqini berish belgilangan.

Bundan tashqari, iqtisodiyotining ustuvor yoʻnalishlariga katta miqdorda investitsiya kiritgan chet el fuqarolariga “Faxriy fuqaro” unvonini berish tartibi joriy etiladi.