Amudaryolik qizlar - Oʻzbekiston vitse-chempioni!

Yaqinda 22-27-mart kunlari davomida Qashqadaryo viloyatining Qarshi shahrida 14 yoshgacha boʻlgan oʻsmir qizlardan iborat jamoalar oʻrtasida sportning mini-futbol turi boʻyicha Oʻzbekiston chempionati musobaqalari oʻtkazildi. Chempionat musobaqalari 3 turda oʻtkazilib, ularda Qashqadaryo, Navoiy, Xorazm, Andijon, Sirdaryo, Jizzax viloyatlari hamda Qoraqalpogʻiston Respublikasidan tashrif buyurgan 7 ta futbol jamoalari qizlari ishtirok etdilar.
Qoraqalpogʻiston Respublikasi bosqichida oʻtkazilgan musobaqada ishtirok etib, 1-oʻrinni qoʻlga kiritgan Amudaryo tumani futbol jamoasi qizlari Oʻzbekiston chempionligi uchun oʻtkazilgan musobaqalarning birinchi turida Sirdaryo viloyatining “Guliston” jamoasi bilan oʻyinda qatnashib, gʻoliblikni qoʻlga kiritdilar. Ikkinchi tur oʻyinlarida Xorazm viloyatidan tashrif buyurgan futbol jamoasi qizlari bilan maydonga tushib, ularni ham oʻz gollari bilan ortda qoldirdilar. Uchinchi turga chiqqan tuman futbol jamoasi qizlari Andijon viloyati futbol jamoasini 4:2 hisobida yutib chiqib, musobaqaning final bosqichiga yoʻlllanma oldilar.
Final bosqichda amudaryolik futbolchi qizlar Qarshi shahrining “Sevinch” futbol jamosi qizlari bilan maydonda toʻp surishdilar. Futbol maydonida qizgʻin oʻtgan musobaqalarda Amudaryo tumani futbol jamoasi qizlariga Oʻzbekiston Respublikasi chempionatining 2-oʻrin gʻolibi boʻlish nasib qildi. Jamoa qizlari kubok, kumush medal, diplom va sovgʻalar bilan taqdirlandilar.
Chempionatdan sovrinli oʻrin va medallar bilan qaytgan Amudaryo tumanining Xolimbeg ovuli futbol jamoasini tuman hokimligi, tuman sport qoʻmitasi, tuman Bolalar-oʻsmirlar sport maktabi murabbiylari va sportchi yoshlari hamda ota-onalar tantanali kutib oldilar. Kutib olish marosimida tuman hokimi Sultonboy Yoʻldashev, tuman hokimi oʻrinbosari Maryam Ahmedova, tuman Bolalar va oʻsmirlar sport maktabi direktori Chorsham Tojimurodov hamda ota-onalar soʻzga chiqib, qizlarni qizgʻin qutladilar. Tuman hokimi Sultonboy Yoʻldashev mini futbol boʻyicha oʻtkazilgan Oʻzbekiston chempionati musobaqalarida ishtirok etib, 2-oʻrin gʻolibi boʻlgan qizlar va ularning murabbiylarining har biriga bittadan, jami 13 ta velosiped sovgʻa qildi.

Ozoda Xudoyberganova, jurnalist.