Hunarli yoshlar yurtimiz kelajagi

Qoraqalpogʻiston Respublikasi Amudaryo tumanida "Yurtimiz kelajagi bilimli, hunarli yoshlar qoʻlida” deb nomlangan kasblar festivali oʻtkazildi.

Vatanimiz mustaqilligining 22 yilligiga bagʻishlab "Qadr-qimmatim, tayanchim va iftixorimsan, mustaqil Oʻzbekiston!” shiori ostida oʻtkazilgan ushbu tadbir yosh hunarmandlar, xususiy tadbirkorlar tomonidan ishlab chiqarilgan mahsulotlar koʻrgazmasi bilan boshlandi.

Joriy yilda tumandagi 7 kasb-hunar kollejini 2 ming 544 nafar yigit-qiz muvaffaqiyatli tamomladi. Ularning 777 nafari oʻqishni davom ettirish uchun oliy oʻquv yurtiga hujjat topshirgan boʻlsa, 41 nafari tadbirkorlik bilan shugʻullanish maqsadida oʻz biznes rejasini taqdim qilgan. Yosh tadbirkorlarga banklar tomonidan jami 123 million soʻmlik imtiyozli kredit mablagʻlari ajratildi.

Kollej bitiruvchilarini ish bilan taʼminlash maqsadida tuzilgan uch tomonlama shartnomaga koʻra, "Boyovul poyafzali” koʻptarmoqli korxonasi aʼzolari safiga 10 nafar yigit-qiz kelib qoʻshildi. Bu yerda asosan kattalar va bolalar poyafzali tayyorlanadi. Shuningdek, qoʻshimcha tarmoqda kiyim-kechak, qandolatchilik mahsulotlari ham ishlab chiqarilmoqda.

Mahsulotlarni qadoqlash uchun polietilen xaltachalari ishlab chiqarilayotgan "Alisher Saʼdullayev” xususiy korxonasida ham ikki nafar kollej bitiruvchisi ish boshladi. Xitoy texnologiyasi asosida oyiga 10 tonna mahsulot ishlab chiqarib, bozorda oʻz xaridorini topgan mazkur jamoada ham yoshlar kollejda olgan bilimlari evaziga tezda oʻz oʻrniga ega boʻlishdi.

Yiliga ikki yarim ming tonna pillani qayta ishlash quvvatiga ega "Aziya silk” qoʻshma korxonasida ishlab chiqarish amaliyotini oʻtagan Nigora Allaniyozova oʻnga yaqin tengdoshlari qatori shu yerda doimiy ish bilan taʼminlandi.

– Ustozlarimdan koʻp narsa oʻrganayapman, – deydi N.Allaniyozova. – Kollejda olgan bilimlarim qoʻl kelmoqda. Bu yerda biz yoshlarga boʻlgan eʼtibor yuqori, "ustoz-shogird” anʼanasi yaxshi yoʻlga qoʻyilgan.