MUOLAJASI HAM, SOʻZI HAM DAVO

Odam keksaygani sari sogʻligida muammolar paydo boʻlaverarkan. Shunday damlarda, yaxshiyamki jonimizga oro kiradigan tajribali shifokorlarimiz bor.

Men yaqinda oshqozon osti bezi kasalligiga chalinib, tuman Tibbiyot birlashmasi 1-terapiya boʻlimida yotib davolandim. Avval menga oʻzimni qiynab turgan dardning davosi yoʻqday tuyulgandi. Biroq   toʻliq tekshiruvlardan oʻtib, muolaja ola boshlagach, hademay oʻzimni  yaxshi his qila boshladim, ogʻriqlar pasaydi.

Boʻlim mudiri Bekimmat Ollaberganov, davolovchi shifokor Otabek Xalillayev, hamshira qizlar Nilufar Ismoilova, Moʻʼtabar Tilovboyeva, Feruza Shomurodovalarning  shirin muomalasi, bemorlarning sogʻayib ketishi uchun yelib-yugurib xizmat qilishlari ham koʻnglimni togʻday yuksaltirdi.

Boʻlimda yotib davolanishim davomida shifokorlarning turli kasalliklardan saqlanish yoʻllari, sogʻlom yashashning ahamiyati haqidagi suhbatlarini tinglab, sogʻ-salomat yurishga koʻnglimda intilish kuchaydi. Ularning faoliyatini kuzatar ekanman, hazrat Alisher Navoiyning:

Odami ersang, demagil odami,

Onikim, yoʻq xalq gʻamidin gʻami, – degan satrlari xayolimga keldi.

Ha, xalqimiz sogʻligi yoʻlida malakali tibbiy xizmat koʻrsatayotgan shifokorlarimiz, hamshira qizlarimizdan har qancha minnatdor boʻlsak arziydi. Bu faqat mening emas, boʻlimda yotib, davolanib, sogʻligini tiklab, oilasiga qaytayotgan koʻpchilikning fikri.

Mamlakatimizda fuqarolarga tibbiy xizmat koʻrsatish  sifati kun sayin oshayotgani, aniq tashxis qoʻyish va davolash uchun yangidan-yangi jihozlar bilan taʼminlanayotgani barcha uchun quvonarlidir. Axir ota-bobolarimiz: "issiq jon – isitmasiz boʻlmas”, deb bekorga aytishmagan. Baxtimizga shunday damlarda dardimizga darmon boʻladigan shifokorlarimiz omon boʻlishsin, qoʻllari dard koʻrmasin!

Ibrohim ISMOILOV, xalq taʼlimi faxriysi.

(Foto - http://www.uza.uz)