Amudaryo tumanida 2016-yilda ijtimoiy-iqtisodiy rivojlantirish yakunlari hamda 2017-yilgi iqtisodiy dasturining eng muhim ustuvor vazifalari haqida tuman hokimi S.Yoʻldashevning HISOBOTI

Assalomu alaykum, hurmatli deputatlar, sessiya ishtirokchilari!

Maʼlumki, 2014-yilda Konstitutsiyamizning 103-moddasiga oʻzgartish va qoʻshimchalar kiritilib, unga muvofiq, viloyat, tuman va shahar hokimi tegishli xalq deputatlari Kengashiga viloyat, tuman, shahar ijtimoiy-iqtisodiy rivojlanishining eng muhim hamda dolzarb masalalari yuzasidan hisobotlar taqdim etishi, ular boʻyicha xalq deputatlari Kengashi tomonidan tegishli qarorlar qabul qilinishi belgilangan edi.

Aytish kerakki, bu oʻzgarishlar davlat hokimiyati va boshqaruvini takomillashtirish hamda yanada demokratlashtirish, mahalliy hokimiyat organlari faoliyatining shaffofligini kafolatlash, deputatlik nazorati institutini mustahkamlash, partiyalararo raqobatni kuchaytirishda muhim ahamiyat kasb etib, mahalliy Kengashlarning hududlarni ijtimoiy-iqtisodiy rivojlantirishdagi rolini yanada oshiradi va ijro organlarining masʼuliyatini kuchaytiradi.

Hammangizga maʼlum, joriy yilning 14-yanvar kuni Vazirlar Mahkamasida yil yakunlariga bagʻishlab oʻtkazilgan yigʻilishda muhtaram Prezidentimiz tomonidan 2017-2021-yillarda Oʻzbekistonni yanada rivojlantirish boʻyicha Harakat strategiyasi loyihasini keng muhokama qilish davomida kelib tushgan takliflar inobatga olingan holda, 2017-yil uchun moʻljallangan iqtisodiy va ijtimoiy dasturning oʻn bitta eng muhim ustuvor vazifasi belgilandi.

Ijozatingiz bilan, 2016-yilda tumanni ijtimoiy-iqtisodiy rivojlantirish yakunlari va 2017-yilgi iqtisodiy dasturning ustuvor yoʻnalishlari toʻgʻrisida batafsil hisobot bersam.

Hisobot davrida tumanda ijtimoiy-iqtisodiy rivojlantirish boʻyicha belgilab olingan makroiqtisodiy koʻrsatkichlarning istiqbolli reja koʻrsatkichlari bajarilishi taʼminlandi.

2016-yilda sanoat mahsulotlari ishlab chiqarish hajmi 179,5 mlrd. soʻmga yetib, oʻtgan yilga nisbatan oʻsish surʼati 116,5 foizni, xalq isteʼmol mollarini ishlab chiqarish hajmi 83,3 mlrd. soʻmga yetib, oʻtgan yilga nisbatan oʻsish surʼati 107,0 foizni tashkil qildi.

Ijtimoiy-iqtisodiy rivojlantirish dasturi doirasida 2016-yilda umumiy qiymati 18,6 mlrd. soʻmlik 220 ta loyiha ishga tushirilib, 826 ta yangi ish oʻrinlari yaratildi.

Tumanda sanoat sohasini rivojlantirish maqsadida 2016 yilda qiymati 6 mlrd. 670 mln. soʻmlik (shundan, oʻz mablagʻi hisobidan 3 mlrd. 390 mln. soʻmlik, tijorat banki kreditlari hisobidan 3 mlrd. 280 mln. soʻmlik) mablagʻlar hisobidan jami 22 ta loyihalar ishga tushirildi hamda ularda 278 ta yangi ish oʻrinlari yaratildi.

Jumladan, yangi korxonalarni tashkil etish boʻyicha 15 ta loyihalar, mavjud ishlab chiqarishni kengaytirish boʻyicha 7 ta loyihalar, shundan:

– yengil sanoat yoʻnalishi boʻyicha 520 mln. soʻmlik 4 ta loyiha;

– qurilish materiallari ishlab chiqarish boʻyicha 4,9 mlrd. soʻmlik 12 ta loyiha;

– farmatsevtika yoʻnalishi boʻyicha 180 mln. soʻmlik 1 ta loyiha;

– oziq-ovqat yoʻnalishi boʻyicha 320 mln. soʻmlik 3 ta loyiha;

– boshqa yoʻnalishlar boʻyicha 750 mln. soʻmlik 2 ta loyiha ishga tushirildi.

Sanoat yoʻnalishida yangi loyihalarni joriy qilish, salohiyatli loyihalarni har tomonlama moliyaviy qoʻllab-quvvatlash va yangi ish oʻrinlarni yaratish maqsadida 2017-yil sanoat salohiyatini rivojlantirish dasturiga 37 ta loyihalar kiritilgan boʻlib, jami 27 mlrd. 655 mln. soʻmlik, shundan oʻz mablagʻi 3 mlrd. 493 mln. soʻm hamda tijorat bank kreditlari hisobidan 24 mlrd. 162 mln. soʻm mablagʻlari evaziga 526 yangi ish oʻrinlari yaratilishi belgilab olindi. Bunda oziq-ovqat va nooziq-ovqat yoʻnalishi boʻyicha 2 mlrd. 680 mln. soʻmlik 7 ta loyiha, qurilish materiallari ishlab chiqarish boʻyicha 4 mlrd. 365 mln. soʻmlik 18 ta loyiha, yengil sanoat va boshqa nooziq-ovqat mahsulotlari ishlab chiqarish boʻyicha 20 mlrd. 610 mln. soʻmlik 12 ta loyiha kiritilgan.

Kelgusi yillarda sanoat sohasiga tubdan oʻzgarishlar kiritish, yangidan-yangi loyihalar tashkil qilish borasida izlanishlar olib borilmoqda.

Tumanda sanoat salohiyatini 2017-2021-yillarda rivojlantirishda investitsiya loyihalari ishlab chiqilib, bu dasturga hozircha jami qiymati 57 mlrd. 712 mln. soʻmlik 63 ta loyihalar kiritilib, ularda 865 ta yangi ish oʻrinlarini tashkil qilish belgilandi. Bunga yil davomida oʻzgarishlar va qoʻshimchalar kiritib boriladi.

Mahalliylashtirish dasturi doirasida 3 ta korxonada  loyiha boʻyicha 650 ming AQSh dollarlik mablagʻlar hisobidan import oʻrnini bosuvchi mahsulotlar ishlab chiqarish, dastur doirasida 32 ta ish oʻrinlari yaratish belgilab olindi.

Qishloq xoʻjaligi sohasi boʻyicha dasturdagi 8 ta yoʻnalish boʻyicha loyihalarni ishga tushirish yuzasidan oziq-ovqat xavfsizligini taʼminlash, aholiga sifatli mahsulotlar yetkazib berish va bozorlarda narx-navolarning barqarorligini taʼminlash maqsadida 2016-yilda qiymati  2 mlrd. 890 mln. soʻmlik 58 ta loyihalar ishga tushirilib, ularda 197 ta yangi ish oʻrinlari yaratildi.

2017-yilgi davlat dasturiga ushbu 8 ta yoʻnalishlarni rivojlantirish boʻyicha jami qiymati 11 mlrd. 121 mln. soʻmlik 105 ta loyiha kiritilgan.

Bugungi kunda tumanda qishloq xoʻjaligini rivojlantirish borasida olib borilayotgan oʻrganishlar va yangi loyihalar boʻyicha izlanishlar natijasida 2017-yilgi qishloq xoʻjaligini rivojlantirish dasturiga qoʻshimcha 3 mlrd. 38 mln. soʻmlik 41 ta loyihalar kiritildi. Natijada loyihalarning umumiy soni 105 taga yetkazilib, ularda jami 289 ta yangi ish oʻrinlari yaratilishi belgilab olindi.

Tumanda servis va xizmat koʻrsatish boʻyicha 2016-yilda 140 ta obʼektlar tashkil qilinib, 338 ta yangi ish oʻrinlari yaratildi.

2017-yilda xizmat koʻrsatish va servis sohasini rivojlantirish boʻyicha davlat dasturiga 107 ta loyihalar kiritildi. Loyihalarning umumiy qiymati 10 mlrd. 514 mln. soʻmni tashkil qiladi. Ushbu loyihalarni ishga tushirish hisobidan 268 ta yangi ish oʻrinlar yaratilishi belgilangan.

Tadbirkorlik subʼektlariga "Yagona darcha” markazi tomonidan 16 turdagi davlat xizmatlari koʻrsatib kelinmoqda va 2016-yilda 139 ta yuridik korxonalar va 351 ta yakka tartibdagi tadbirkorlik subʼektlari yangidan tashkil qilinib, davlat roʻyxatidan oʻtkazilgan.

Tadbirkorlik subʼektlari tomonidan tuman "Yagona darcha” markaziga 2016-yilda jami 384 ta murojaat kelib tushgan, ushbu murojaatlardan 368 tasi ijobiy hal qilinib,  shundan 16 ta murojaat davlat organlari hamda davlat xizmatlarini koʻrsatadigan boshqa tashkilotlar tomonidan tegishli qonun xujjatlari asosida rad qilingan.

Tadbirkorlikni rivojlantirish va qoʻllab-quvvatlash maqsadida 2016-yilda tadbirkorlik subʼektlariga tumandagi tijorat banklari tomonidan 35 mlrd. 120 mln.soʻm miqdorida kredit mablagʻlari ajratilgan. Shundan kichik biznes subʼektlariga jami 14 mlrd. 520 mln. soʻm kredit mablagʻlari ajratilgan.

Tumanda faoliyat koʻrsatayotgan yuridik korxonalarning umumiy soni bugungi kunga kelib 2089 tani tashkil qiladi. Fermer va dehkon xoʻjaliklaridan tashqari 913 ta kichik biznes subʼektlari roʻyxatdan oʻtgan.

Amudaryo tumanida "2016-yilda yangi ish oʻrinlarini tashkil etish va aholi bandligini taʼminlash Dasturi” boʻyicha 4814 ta yangi ish oʻrinlari yaratish rejalashtirilgan boʻlib, amalda 4831 ta ish oʻrinlari yaratilib, reja 100,4 foizga bajarildi.

Tumanimizda 2015-2016 oʻquv yilida kasb-hunar kollejlarini 2652 nafar oʻquvchi, shundan 1228 nafar qizlar oʻz yoʻnalishlari boʻyicha bitirdilar. Bitiruvchilar ishga joylashishlarini taʼminlash maqsadida toʻrt tomonlama  shartnomalarning sifatliligiga eʼtibor qaratgan holda mos yoʻnalishdagi ishlab chiqarish korxonalari bilan hamkorlik tashkil etilib, oʻz mutaxassisliklari boʻyicha amaliyot oʻtashlari uchun tumanda faoliyat koʻrsatayotgan korxonalar, tashkilotlar va      muassasalarga biriktirildilar.

2016-yil davomida Bandlikka koʻmaklashish markaziga 1281 nafar faol ish qidiruvchi fuqarolar murojaat qilib, ulardan 1275 nafari ishga joylashtirildi.

2016-yil davomida tuman boʻyicha sanoat mahsulotlari eksporti 2519,6 ming AQSh dollarini, hududiy mahsulotlar eksporti 1202,9 ming AQSh dollarini, qishloq xoʻjaligi mahsulotlari eksporti 1057,1 ming AQSh dolllarini tashkil qildi.

Afsuski, hududiy eksportyor korxonalar tomonidan 2016 yilga belgilangan eksport rejasi toʻliq bajarilmadi. Jumladan, "Agat invest prom” MChJ eksport rejasini 131 foizga bajargan boʻlsa, masʼuliyati cheklangan jamiyat shaklidagi "Mangit invest plys” Oʻzbekiston-Xitoy qoʻshma korxonasi 76 foizga, "Mega Amudaryo” MChJ 13,2 foizga, "Amudaryo buyan” MChJ esa bor-yoʻgʻi 2,8 foizga bajargan. "Jumamurod Nonvoy” fermer xoʻjaligi tomonidan esa umuman mahsulotlar eksporti amalga oshirilmagan.

Kelgusida eksport xajimini oshirish maqsadida MChJ shaklidagi "Mangit invest plyus” Oʻzbekiston-Xitoy qoʻshma korxonasidagi 400 tonnalik zamonaviy muzlatkichli omborxona 900 tonna sigʻimga kengaytirildi. Korxona tomonidan meva-sabzavot mahsulotlarini yetishtirishni yoʻlga qoʻyish uchun 42 gektar yer maydoni ajratildi. 2017-yilda 500 ming AQSh dollari miqdoridagi valyuta krediti hisobiga 1 gektar maydonda zamonaviy issiqxona qurilishi rejalashtirilmoqda.

"Mangʻit tezkor savdo” MChJda 700 tonnalik zamonaviy muzlatkichli omborxona mavjud. Ushbu jamiyatga yangi tokzor barpo qilish, 2 ta avtorefrijerator va 1 ta mini traktor xarid qilish maqsadida 550 mln. soʻm kredit mablagʻlari ajratildi.

2016-yilda "Sogʻlom ona va bola yili” Davlat dasturi ijrosini taʼminlash uchun 30 mlrd. soʻmdan ortiq va 230 ming AQSh dollaridan oshiqroq mablagʻ sarflanishi rejalashtirilgan boʻlsa, yil yakunida "Sogʻlom ona va bola yili” tuman hududiy dasturi tadbirlarini amalga oshirish uchun jami harajatlar 41 mlrd. 759,3 mln. soʻm va 233,5 ming AQSh dollarini tashkil etdi.

Ijtimoiy soha, muhandislik-kommunikatsiya obʼektlarini oʻz vaqtida foydalanishga topshirish boʻyicha tumanda 2016-yilda barcha manbalar hisobidan jami 85 mlrd. 317,1 mln. soʻmlik qurilish va montaj ishlari amalga oshrildi.

Shundan xususiy qurilish ishlari hajmi 23 mlrd. 99 mln. soʻmni tashkil qiladi. Jumladan, 2 mlrd. 792 mln. soʻmlik jami 11,1 km. uzunlikdagi yoʻllar taʼmirlandi.

Hurmatli deputatlar va sessiya ishtirokchilari!

Oʻtgan 2016-yilda pudrat tashkilotlari tomonidan  investitsiya dasturiga asosan byudjet mablagʻlari hisobidan jami  qiymati 6 mlrd. 794 mln. soʻm boʻlgan 11 ta obʼektda qurilish-montaj ishlari bajarildi hamda barchasi foydalanishga topshirildi.

Qoʻshimcha dastur asosida Mangʻit shahri "Gulzor” mahallasidagi 40-sonli (140-oʻrinli), "Oʻrta qalʼa” ovulidagi 13-sonli (140 oʻrinli) hamda "Xitoy” ovulidagi 18-sonli maktabgacha taʼlim muassasalari kapital taʼmirlandi. Tender qiymati 7 mlrd. 817,0 mln. soʻm boʻlgan tuman ichki ishlar boʻlimi maʼmuriy binosi rekonstruktsiya qilinib, foydalanishga topshirildi.

2016-yilda tumanda 90 ta namunaviy loyihalar asosida uy-joylar qurildi. Lekin, shunga qaramasdan pudratchi tashkilot "Amudaryo qurilish” MChJ (T.Yadgarov) tomonidan qurilgan 4 ta namunaviy uy-joylar shu kungacha oʻz egalariga foydalanishga topshirilmagan.

2016-yil davomida 2015-yilda qurilgan namunaviy uy-joylar massivlarida umumiy qiymati 1 mlrd. 240,2 mln. soʻmlik 2,537 km. uzunlikdagi beton qoplamali yoʻllar qurilishi, 3,2 km. sipprovod elektr tarmoqlari, transformatorlar oʻrnatilishi, 1,3 km. gaz tarmogʻi qurish ishlari amalga oshirildi.

Davlat va mahalliy ahamiyatdagi yoʻllarni toʻla va joriy taʼmirlash boʻyicha 2016-yilga jami 2 mlrd. 792 mln. soʻm mablagʻ ajratilib, keng koʻlamli ishlar amalga oshirildi.

2017-yilda 4K6 "Mangʻit shahar katta aylanma yoʻli” mahalliy ahamiyatdagi yoʻlining 7,0 km. qismida 7,3 mlrd. soʻmlik toʻla taʼmirlash ishlari rejalashtirilgan.

Shuningdek, Osiyo taraqqiyot banki mablagʻlari hisobidan 1 mln. 402 ming AQSh dollari hisobiga 20,7 km. asosiy suv tarmogʻi va 11,2 km. ichki koʻchalarga suv tarmogʻi yotqizilib, 424 xonadon toza ichimlik suvi bilan taʼminlandi. "Oʻrta qalʼa” ovulidagi RU-1 suv inshooti rekonstruktsiya qilindi.

Tumanda aholini uzluksiz elektr energiyasi bilan taʼminlash maqsadida 12,0 mlrd. soʻm mablagʻ hisobiga yangidan 23,9 km. "Qoratov-Mangʻit” zahira liniyasi ishga tushirildi. Shahar aholisini sifatli elektr energiyasi bilan taʼminlash maqsadida 750 mln. soʻm mablagʻ hisobiga quvvati 630 kVa boʻlgan transformator punkti qurildi.

Mangʻit shahrini tungi yoritish tizimi bilan taʼminlash maqsadida 3 km. uzunlikdagi sipprovod elektr tarmoqlari tortildi.

Mangʻit shahrining Boʻston, Navoiy, Chordara mahallalarida yashovchi aholini tabiiy gaz bilan taʼminlashni yaxshilash boʻyicha uzunligi 5,5 km. gaz tarmogʻi ichki imkoniyatlar hisobiga rekonstruktsiya qilindi.

Hurmatli sessiya ishtirokchilari!

Shu oʻrinda bugungi kunda tumanda iqtisodiyotning barcha tarmoqlarida faoliyat koʻrsatib kelayotgan korxona va tashkilotlarning mavjud debitor va kreditor qarzdorliklarini qisqartirish borasida amalga oshirayotgan ishlarga ham toʻxtalib oʻtmoqchiman.

Joriy 2017-yilning 1-yanvar holatiga qishloq xoʻjaligi korxonalarining xizmat koʻrsatuvchi va taʼminotchi korxonalardan jami qarzdorligi 9 mlrd. 299 mln. soʻmni tashkil qiladi. Jumladan, qishloq xoʻjaligi korxonalarining neft mahsulotlaridan 2 mlrd. 557,2 mln. soʻm, mineral oʻgʻitlardan 5 mlrd. 818,8 mln. soʻm, elektr taʼminoti korxonasidan 646,0 mln. soʻm, mashina-traktor parklaridan 276,8 mln. soʻm qarzdorligi mavjud boʻlib, 2016-yilning 1-yanvar holatiga nisbatan mavjud qarzdorlik 1768,8 mln. soʻmga oʻsgan.

Isteʼmolchilarga yetkazib berilayotgan yoqilgʻi-energetika resurslaridan (tabiiy gaz va elektr energiyasi) boʻlgan qarzdorlik yildan yilga ortib bormoqda. Jumladan, tabiiy gaz yetkazib berish boʻyicha qarzdorlik oʻtgan yilning shu davriga nisbatan 2 mlrd. 75,3 mln. soʻmga oʻsib, umumiy qarzdorlik bugungi kunda 21 mlrd. 15,1 mln. soʻmni (aholi 20 mlrd. 896,1 mln. soʻm, ulgurji isteʼmolchilar 119 mln. soʻm) tashkil qilmoqda.

Elektr energiyasi boʻyicha umumiy qarzdorlik 1 mlrd. 421,6 mln. soʻmni (aholi 25,2 mln. soʻm, ulgurji isteʼmolchilar 1 mlrd. 421 mln. soʻm) tashkil qilib, oʻtgan yilning shu davriga nisbatan 554,2 mln. soʻmga oʻsgan.

Ichimlik suvi boʻyicha qarzdorlik 343,5 mln. soʻmni tashkil qilib, qarzdorlikni oʻtgan yilga nisbatan 53,2 mln. soʻmga kamaytirishga erishilgan.

Shu oʻrinda tabiiy gaz va elektr energiyasi taʼminoti korxonalari tomonidan debitor qarzdorlikni kamaytirish boʻyicha amalga oshirilayotgan ishlari qoniqarsiz, deb hisoblayman.

Hurmatli sessiya ishtirokchilari!

Mamlakatimizda taʼlim tizimini isloh qilish mustaqilligimizning dastlabki yillaridanoq boshlangan edi.

Bugungi kunda tumanda 37 ta maktabgacha taʼlim muassasalari mavjud. Ularda 3389 nafar bolalar taʼlim-tarbiya olishadi. Bu tumandagi maktabgacha yoshdagi jami 18155 nafar bolalarning 18,7 foizini tashkil qiladi.

Mavjud maktabgacha taʼlim muassasalarining 16 tasi zamonaviy loyihalar asosida qurilgan, bugungi kun talablariga javob beradigan moddiy bazaga ega taʼlim muassasalaridir. Qolgan 21 tasining esa binolari muassasa ishga tushgandan buyon kapital taʼmirlanmasdan qolgan. Ularni toʻliq taʼmirlab, zamonaviy shart-sharoitlar yaratish eng dolzarb muammo boʻlib kelgan.

Oʻzbekiston Respublikasi Prezidentining 2016-yil 29 dekabr kungi "2017-2021-yillarda maktabgacha taʼlim tizimini yanada takomillashtirish chora-tadbirlari toʻgʻrisida”gi qarorining qabul qilinishidan asosiy maqsad ham ana shu muammolarni oʻz vaqtida hal qilishdan iborat edi.

Ushbu yoʻnalishda tumanda 2017-2021-yillarda jami 15 ta maktabgacha taʼlim muassasasida, shundan 10 tasida kapital rekonstruktsiya qilish va 5 tasida kapital taʼmirlash ishlari amalga oshirilishi rejalashtirilgan. Ushbu maqsadlar uchun jami 11 mlrd. 600 mln. soʻm mablagʻ ajratilishi nazarda tutilmoqda.

Yurtimizda tibbiyot sohasiga berilayotgan eʼtibor va soha xodimlarining fidoyi mehnatlari natijasida aholining salomatlik koʻrsatkichlari yil sayin yaxshilanib bormoqda. Tumanimiz aholisining 56163 nafarini 14 yoshgacha boʻlgan bolalar tashkil qilib, ularning barchasi dispanser koʻrigidan oʻtkazildi. Koʻrik natijasida ularning 70 foizdan ortigʻi sogʻlom, salkam 30 foizida esa turli darajadagi kasalliklar aniqlandi. Amalga oshirilgan davolash va muolaja ishlari natijasida kasallik aniqlangan bolalar sogʻlomlashtirildi.

Tumanda bugungi kunda 19 ta qishloq vrachlik punktlarida 74 nafar oliy maʼlumotli shifokorlar faoliyat olib bormoqda.

Tibbiyot birlashmasi moddiy texnik bazasini rivojlantirish uchun 2016-yil davomida jami 137,2 mln. soʻmlik tibbiy uskunalar va mebel jihozlari bilan taʼminlandi.

Salomatlik - 3 loyihasi doirasida qiymati 51,8 mln. soʻmlik jihozlar (Digitayzer) va dekabr oyida 95,3 mln. soʻmlik 1 dona "Nissan” rusumli tez yordam avtomashinasi hamda 8,8 mln. soʻmlik stomatologiya yigʻma komplekti, 8,5 mln. soʻmlik 2 dona agregat eletronasos va 67,9 mln. soʻmlik mebel jihozlari, 9,6 mln. soʻmlik 4 dona muzlatgichlar va boshqa jihozlar bilan taʼminlandi.

Jismoniy va yuridik shaxslar murojaatlarini hal etishda yuzaga kelayotgan norozichilik va sansolarchiliklarni keskin cheklash, oʻz vazifasiga masʼuliyatsizlik bilan yondoshgan hamda yuqoridagi holatlarning sunʼiy yaratilishiga sababchi boʻlgan rahbarlarga taʼsirchan choralar koʻrish, Oʻzbekiston Respublikasi Bosh vaziri nomiga aholi va tadbirkorlik subʼektlari tomonidan yuborilayotgan murojaatlardagi masalalarni oʻz vaqtida hal etish boʻyicha ham amaliy ishlar olib borilmoqda.

Hokimning qabul kunlari ham haftada bir kun emas, yakshanba kunidan tashqari har kuni soat 10-00 dan 13-00 gacha muntazam ravishda oʻtkazib kelinmoqda. Bugungi kunda tuman hokimining virtual qabulxonasi ham ish boshlash arafasida.

Shuningdek, 2016-yilning 4-choragida tumanning barcha hududlarida sayyor qabullar tashkil etildi. Fuqarolarni koʻproq qiziqtirayotgan masalalar boʻyicha "Taraqqiyot koʻzgusi” va "Mening oilam” gazetalarida, Amudaryo televideniyesida "Savol bering, javob beramiz” rukni va koʻrsatuvlar tashkil etildi, "amunews.uz” va tuman hokimligi veb-saytlarida maqolalar berib borildi.

Hurmatli deputatlar va sessiya ishtirokchilari!

Eʼtiboringizni 2017-yilda tumanni ijtimoiy-iqtisodiy rivojlantirish boʻyicha amalga oshiriladigan asosiy yoʻnalishlarga qaratmoqchiman.

1. 2017-yilda 215,5 mlrd. soʻmlik (120,3 foiz) sanoat mahsulotlari ishlab chiqariladi. Bu sohada 29,2 mlrd. soʻmlik mablagʻlar hisobiga 37 ta loyihaning ishga tushirilishi natijasida 526 taga yaqin yangi ish oʻrinlari yaratilishiga erishiladi.

2. Tumanda mahalliy ishlab chiqarishni rivojlantirish maqsadida halq isteʼmol tovarlari hamda elektr montaj oʻtkazgichlarini (kabel) ishlab chiqarishni yoʻlga qoʻyish uchun 400 ming AQSh dollarlik 2 ta ("Amudaryo suv qurilish boshqarmasi” MChJ, "304-KMK” MChJ) loyihani 2017-2021-yillarga moʻljallangan dasturga kiritish boʻyicha amaliy ishlar olib borilmoqda.

3. Eksport prognoz koʻrsatkichlari ijrosini taʼminlash boʻyicha hududiy korxonalari, sanoat hamda meva-sabzavot mahsulotlariga belgilangan prognoz koʻrsatkichlari ijrosini taʼminlash hamda eksportbop mahsulot chiqarayotgan korxonalarni eksportga jalb etish choralari koʻriladi.

4. Xususiy tadbirkorlik va kichik biznesni rivojlantirish boʻyicha tumanda 2017-yil 1-yanvar holatiga faoliyat yuritmayotgan 22 ta kichik biznes subʼektlarini tuman hokimligi, tuman davlat soliq inspektsiyalari bilan birgalikda qisqartirish talab etiladi.

2017-yil davomida 140 ta kichik biznes subʼektlarini tashkil etish prognozi belgilab olingan boʻlib, shundan 1-chorak davomida 30 ta hamda 1-yarim yillikda 102 ta kichik biznes subʼektlar yaratilishi rejalashtirilgan.

5. Ijtimoiy soha, muhandislik-kommunikatsiya obʼektlarini oʻz vaqtida foydalanishga topshirish boʻyicha:

2017-yilgi Investitsiya dasturiga asosan tumanda umumiy qiymati 60 mlrd. 791,3 mln. soʻmlik qurilish-montaj ishlarini olib borish belgilangan.

Jumladan, 122 ta namunaviy uy-joy qurilishi, 11,9 km. suv tarmogʻi tortilishi, 6 ta umumtaʼlim maktabi rekonstruktsiya va kapital taʼmirlanishi, 2 ta maktabgacha taʼlim muassasasi kapital taʼmirlanishi hamda 1 ta sport zal obʼektlari qurilishi rejalashtirilgan.

Yil davomida smeta bahosi 1 mlrd. 410 mln. soʻm boʻlgan FHDYo boʻlimi binosi, smeta bahosi 450,0 mln. soʻm boʻlgan notarial idorasi binosi, ichki ishlar boʻlimi xodimlari uchun 7 ta xizmat turar joylari, qiymati 6 mlrd. 951 mln. soʻmlik uzunligi 7,0 km. boʻlgan 4k6 "Mangʻit aylanma yoʻli” mahalliy ahamiyatdagi avtomobil yoʻlini toʻla taʼmirlash, 1 mlrd. 872 mln. soʻmlik uzunligi 13,2 km. boʻlgan ichki xoʻjalik yoʻllariga tosh yotqizish, qiymati 11 mlrd. soʻm boʻlgan yangi toʻquv fabrikasi qurilishi, 450 mln. soʻmlik koʻmir saqlash ombori va briket ishlab chiqarish tsexi binosi qurilishi, qiymati 3,5 mlrd. soʻmlik Mangʻit podstantsiyasi rekonstruktsiya qilinishi, 12 ta elektr tarmoqlari obʼektlarida 1 mlrd. 744,3 mln. soʻmlik rekonstruktsiya ishlari rejalashtirilgan.

Muhandislik-kommunikatsiya tarmoqlari qurilishi boʻyicha qoʻshimcha 2017-2021-yillarda 47 ta mahallalardagi 53 ta transformatorlarni mukammal taʼmirdan chiqarish, almashtirish va 164,7 km. havo liniyalarini rekonstruktsiya qilish, kapital taʼmirlash ishlari koʻzda tutilgan.

Hurmatli deputatlar va sessiya ishtirokchilari!

Fursatdan foydalanib, Siz – aziz deputatlarni, tumanimiz faollarini xalqimizning hayot darajasi va sifatini yanada oshirishga qaratilgan 2017-yilga belgilangan iqtisodiy va ijtimoiy dasturlarni amalga oshirishda fidoyilik bilan, faol ishtirok etgan holda tumanimiz va mamlakatimizning iqtisodiy rivojiga, aholi turmush farovonligining yanada yaxshilanishiga hissa qoʻshishga chaqiraman. Bu yoʻlda barchangizga sogʻlik, oilalaringizga baxt, ishlaringizga muvaffaqiyatlar tilayman!

Eʼtiboringiz uchun rahmat!

Mangʻit shahri,

26  yanvar, 2017-yil.