EʼTIBOR, GʻAMXOʻRLIK VA RAGʻBAT ijodkorni yangi marralar sari chorlaydi

Bugun biz yashayotgan globallashuv davrida taraqqiyotni, hayotimizni axborotsiz tasavvur qila olmaymiz. «Axborot asri» deya nom olgan asrimizda ommaviy axborot vositalari kishilar ong-shuuri, dunyoqarashi, siyosiy saviyasiga hamda fuqarolik jamiyatini shakllantirishga hissa qoʻshayotgan eng asosiy va taʼsirchan vositalardan biridir. Shu bilan birga, bugun ommaviy axborot vositalari shunchaki axborotni yetkazuvchi vosita emas, yurtdoshlarimizning siyosiy  va  huquqiy ongi, fuqarolik faolligi oshishiga taʼsir koʻrsatuvchi kuchga aylanmoqda.

Jamiyatda roʻy berayotgan oʻzgarish va yangilanishlar aynan ommaviy axborot vositalari orqali keng ommaga yetib boradi. Qolaversa, fuqarolarimizning islohotlardagi faol ishtirokini, ularga nisbatan munosabatini bildirishda ham ommaviy axborot vositalari asosiy minbar vazifasini oʻtaydi.

Shuni taʼkidlash kerakki, yurtimizda ushbu sohani isloh qilish maqsadida zarur qonunchilik bazasi yaratildi va yildan-yilga takomillashib bormoqda. «Ommaviy axborot vositalari toʻgʻrisida»gi, «Telekommunikatsiya toʻgʻrisida»gi, «Reklama toʻgʻrisida»gi, «Mualliflik huquqi va turdosh huquqlar toʻgʻrisida»gi qonunlar shular jumlasidandir. Shuningdek, sohani yanada rivojlantirish maqsadida bugungi kunda «Ommaviy axborot vositalari faoliyatining iqtisodiy asoslari toʻgʻrisida»gi va «Ommaviy axborot vositalarini davlat tomonidan qoʻllab-quvvatlash kafolatlari toʻgʻrisida»gi Qonun loyihalari koʻrib chiqilayotgani bu fikrimizning isbotidir.

Davlatimiz rahbari tomonidan taqdim etilgan «Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish kontseptsiyasi»da axborot sohasini isloh qilish, axborot va soʻz erkinligini taʼminlash masalasining eng muhim ustuvor vazifalardan biri sifatida tilga olingani ham soha rivojiga katta turtki boʻlmoqda.

Ommaviy axborot vositalarini yanada rivojlantirish borasida tumanimizda ham qator amaliy ishlar qilinmoqda. Tumanimizda matbuot va ommaviy axborot vositalarining 3 ta vakili – «Taraqqiyot koʻzgusi» gazetasi, Amudaryo televideniyesi va OAV shaklidagi    www.amunews.uz veb-sayti faoliyat koʻrsatmoqda.

«Taraqqiyot koʻzgusi» gazetasi tumanimiz ommaviy axborot vositalarining eng keksa vakilidir. Salkam 80 yillik faoliyati davomida gazetamiz tumanimiz aholisining yaqin maslakdoshi boʻlib qolgan, desak yanglishmaymiz. Tuman hokimligi va xalq deputatlari tuman Kengashining nashri boʻlmish «Taraqqiyot koʻzgusi» gazetasi mustaqillik yillarida yangicha mazmun va mohiyat kasb etib, xalqimiz orasiga kirib bordi.

Tuman hokimligining amaliy yordamlari bilan gazeta tahririyatining moliyaviy ahvoli ancha yaxshilandi, moddiy-texnika bazasi kuchaydi, oʻz balansidagi binoga va xizmat avtomashinasiga ega boʻldi. Gazetamizning adadi sezilarli darajada oshib, davriyligi oyiga 3-martaga yetkazildi va qamrov hududi kengayib, tumanimizning barcha ovul va mahallalariga yetib bordi.

Gazeta tahririyati faoliyati davomida koʻplab yutuqlarga erishib kelmoqda. Yaqinda Oʻzbekiston Respublikasi Oliy Majlisi huzuridagi Nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash jamoat fondi tomonidan eʼlon qilingan tanlovda tahririyat taqdim qilgan «Aholining ekologik va tibbiy madaniyatini yanada yaxshilashda, aholi orasida, ayniqsa yoshlarga sogʻlom turmush tarzini targʻib qilishda OAVlarning rolini oshirish» nomli loyihaning gʻolibi deb topilgani ham shunday yutuqlardan biri boʻldi. Jamoat fondi mablagʻlarini boshqarish boʻyicha Parlament komissiyasining qarori bilan gazetamiz tahririyatiga 14 million soʻm miqdoridagi davlat granti ajratildi.

Tahririyat xodimlarining tashabbusi bilan Internet jurnalistika yoʻlga qoʻyildi va Qoraqalpogʻistonda birinchi boʻlib Internet orqali tarqatiladigan mustaqil ommaviy axborot vositasi – www.amunews.uz veb-sayti roʻyxatdan oʻtkazildi. «Taraqqiyot koʻzgusi» gazetasi tahririyati» Davlat korxonasining tarkibiy boʻlinmasi boʻlmish ushbu veb-sayt tahririyati tumanimizning barcha sohalarida boʻlayotgan yangilik va oʻzgarishlarni Internet sahifalarida tezkor yoritib bormoqda.

Tuman hokimligining katta amaliy yordami bilan tashkil qilingan va ish boshlagan Amudaryo televideniyesi koʻrsatuvlari  salkam 3-yildan beri efirga uzatib kelinmoqda. Oʻtgan davr mobaynida tahririyat tomonidan har birining davomiyligi 2,5-4 soat boʻlgan 440 dan ortiq teleefir materiallari tayyorlandi va efirga uzatildi.

Bu jarayonda tumanimizning deyarli barcha jabhalari qamrab olindi va sohalarda amalga oshirilayotgan islohotlar mazmun-mohiyati aholiga keng yetkazib borilmoqda. Koʻpchilik koʻrsatuvlarning har bir sonini teletomoshabinlar kutadigan va sevib tomosha qiladigan boʻldi.

«Amudaryo televideniyesi» MChJ muassislari va tahririyatimiz teledasturlarning tarqalish hududini kengaytirish, tahririyatning moddiy-texnika bazasini va xodimlar sifat tarkibini yaxshilash, koʻrsatuvlarning rang-barangligini oshirish va efir vaqtini uzaytirish kabi masalalarni ham ijobiy hal qilib, telekanal faoliyatini yanada yaxshilash ustida ish olib bormoqdalar.

Sohaga qaratilayotgan katta eʼtibor, jurnalistlarga koʻrsatilayotgan gʻamxoʻrlik va ragʻbat, berilayotgan amaliy yordam bizning zimmamizga yanada katta masʼuliyat yuklaydi va kelgusida bundan ham samarali mehnat qilib, tumanimiz hayotining barcha jabhalarini tezkor va xolis yoritib borish uchun kuch-quvvat bagʻishlaydi.

Yuksak eʼtibor va gʻamxoʻrlikni his qilib, masʼuliyatli vazifalarni yelkasiga olib mehnat qilayotgan barcha hamkasblarimizni Matbuot va ommaviy axborot vositalari xodimlari kuni bilan chin yurakdan tabriklab, ularning faoliyatiga rivoj tilaymiz.

 Gʻulomjon YeShNIYoZOV,

«Taraqqiyot koʻzgusi» gazetasi va Amudaryo televideniyesi Bosh muharriri.