KEChA KIM EDIG-U BUGUN KIM BOʻLDIK?

Har bir davlatning oʻz oʻtmishi, kechmishi, tarixi mavjud. Aynan oʻsha tariximiz asosida biz kelajakni koʻra boshlaymiz. Kelajak sari olgʻa qadam tashlaymiz. Azal-azaldan ota-bobolarimiz shu muqaddas tuprogʻimizni koʻzlariga toʻtiyo qilib, asrab-avaylab kelmoqda. Bu makon, bu ona tuproq bizlarga ota-bobolarimizdan qolgan merosdir. Meros esa azaliy qadriyat darajasida ulugʻlanmogʻi darkor. Bizning ajdodlarimiz buyuk insonlar boʻlishgan. Ularning Vatanimiz uchun qilgan jasoratlari yosh avlodga ibrat boʻla oladi. Ularning Vatan oldida qilgan jasoratlari haqida oʻylagan har bir insonning qalbida Vatanparvarlik tuygʻusi tugʻyon ura boshlaydi. Bizning ham Vatanimiz uchun biror buyuk ish qilgimiz kelib qoladi. Bolalik chogʻimizdan ong-u shuurimizga singgan, nomi tarix zarvaraqlaridan oʻchmas joy olgan Jaloliddin Manguberdi, Shiroq, Toʻmarislar jasorati qalbimizga hamisha kuch bagʻishlaydi. Ular Vatanimizni yov zulmidan asraganlar. Uning ertasi uchun kurashganlar va kerak boʻlsa, bu yoʻlda jon fido qilganlar.

Xalqimiz, ota-bobolarimiz chekkan azob-uqubatlar sobiq ittifoq davrida yanada ogʻir boʻlganini bobo va buvilarimiz tilidan eshitib, bugungi farovon va ozod hayotimizga shukronalar aytamiz.

Biz – mustaqillik bolalarimiz, bobomiz, buvimiz, ota-onalarimiz koʻrgan qiyinchiliklar bizga tamoman  begona. Faqat ana shu aziz insonlarimizning kechagi kun haqidagi iztirobli hikoyalarini eshitib, telefilmlar orqali koʻrib, Yurtboshimizning Oʻzbekiston davlatini jahonga tanitish, yosh avlod tarbiyasi yoʻlida olib borayotgan izchil siyosatidan har lahza baxtiyorlik hissini tuyib yashaymiz. Kechagi oʻzgalarga mute boʻlgan xalqimiz bugun ozod. Biz ana shu ozod xalq farzandlarimiz.

Yurtimizda yuksak salohiyatli yoshlarni voyaga yetkazish uchun zarur shart-sharoitlar yaratib berilmoqda. Yurtboshimiz har chiqishlarida biz yoshlarga: "Bolalarim!” – deya murojaat qiladilar. Mamlakatimizning kelajagi, ishonchi biz yoshlar ekanligini koʻp bora taʼkidlaydilar.

Har bir inson oʻz Vatanini tiliga olib maqtangisi keladi. Shu jumladan men ham Vatanim bilan faxrlanaman. Bizning Oʻzbekistonimizdek yurt hech qayerda yoʻq. Chunki uning har bir qarich yeri mening yuragimga tutash.

Bizning ajdodlarimiz buyuk insonlar boʻlishgan. Biz avlodlar ham oʻzimizni shunga yarasha tutmogʻimiz darkor. Zero, ajdodlari, avlodlari buyuk yurtning kelajagi ham buyukdir!