USTOZNING ShUKRONASI

Har bir hunarning, har bir kasbning hayotimizda tutgan oʻrni beqiyos, ana shunday kasblarning ichida eng ahamiyatlisi, insondan fidoyilikni talab qiladigani bu – oʻqituvchilik kasbi.

Mana shunday fidoyi kasb sohiblaridan biri – el ardogʻidagi inson, koʻplab shogirdlar yetishtirgan Mingturgʻan ogʻa Kaziyevdir.

Mingturgʻan Kaziyev 1936 yilda Kuyuk koʻpir ovulida dunyoga kelgan. Avval oʻz ovulidagi boshlangʻich maktabda, keyinchalik ovuldan ancha yiroq boʻlgan Xitoy ovulidagi hozirgi 2-sonli maktabda oʻqishni davom ettiradi. U maktabda barcha fanlardan aʼlo baholarga oʻqidi, ayniqsa matematika faniga boshqacha mehr qoʻydi. 1954-yilda maktabni tugatgan Mingturgʻan ogʻa Nukus Davlat pedagogika institutinining fizika-matematika fakultetiga oʻqishga kirib, bu ilm dargohini 1959-yilda tugatdi. Shu yili 2-sonli maktabga fizika-matematika fani oʻqituvchisi boʻlib ishga kirdi. Jonkuyar oʻqituvchi 1961-yildan ilmiy ishlar boʻyicha direktor oʻrinbosari lavozimida xizmat qildi. 1963-yilda 19-sonli maktab direktori qilib tayinlandi. 1965-yilgacha direktor lavozimida xizmat qildi. 1965-yildan 1992-yilgacha shu maktabda  oʻquv ishlari boʻyicha direktor oʻrinbosari lavozimida ishlab, to 1994-yili, nafaqaga chiqquniga qadar oʻquvchilarga fizika-matematika fanidan saboq berdi.

Mingturgʻan ogʻa Kaziyevning oilasida tarbiya topgan 7 nafar farzandlari ham oʻqimishli, kasb-korli, el-yurt xizmatiga kamarbasta insonlar boʻlib voyaga yetdilar. Farzandlarining 4 nafari oliy maʼlumotli, nabiralari ilmga intiluvchan, odobli.

- Zamonamizga shukur, - deydi. Mingturgʻan ogʻa, - Shunday dorilomon, farovon kunlarga yetkazganiga shukur. Oʻgʻil-qizlarim, nabiralarim yayrab oʻqishayotir. Maktab va kollejlardagi sharoitlarni aytmaysizmi? Oʻquv xonalari, darsliklar, zamonaviy taʼlim jihozlari – bularni biz tushimizda ham koʻrmaganmiz. Maktab va kollej, akademik litsey oʻqituvchisining bugungi taʼlim tizimi taraqqiyotidan nolishiga aslo haqqi yoʻq. Biz bir zamonlar oylab maoshsiz ham ishlaganmiz. Bugungi muallim el ardogʻida, maktab va kollej, akademik litsey toʻliq davlat nazoratida va himoyasida. Ana shunday ezguliklar davrida ishlayotgan yoshlarga havasim keladi.

Mingturgʻan ogʻa Kaziyevning yuzlab shogirdlari taʼlim tizimi, sogʻlikni saqlash, madaniyat va agrar sohaning fidoyilari boʻlib yetishdilar. Shogirdlari kamolidan koʻksi togʻday yuksalgan ustozning tilidan aslo shukronalar tushmaydi.

Yulduz YuSUPOVA, Amudaryo melioratsiya va suv xoʻjaligi kasb-hunar kolleji oʻquvchisi.  

(Foto - http://uza.uz)