Nukusda «QR Gastronomic Quality - 2026» festivali yuqori saviyada oʻtkazildi

Qoraqalpogʻiston Respublikasi oʻzining boy tarixi, betakror madaniyati va jozibador tabiati bilan sayyohlarni oʻziga jalb etib kelayotgan maskanlardan hisoblanadi. Endilikda bu zamin nafaqat tarixiy yodgorliklari, balki oʻziga xos milliy taomlari bilan ham jahon turizm xaritasida mustahkam oʻrin egallashga intilmoqda. 9-iyul kuni Nukus shahrida joylashgan «Qaraqalpaq Etno Awıl» turistik majmuasi hududida oʻtkazilgan «QR Gastronomic Quality - 2026» festivali fikrimizning yorqin dalilidir. Ushbu keng koʻlamli tadbir professional oshpazlar, restoran biznesi vakillari, turizm sohasi mutaxassislari, ekspertlar hamda koʻplab mehmonlarni yagona maqsad yoʻlida birlashtirdi.

Mazkur yirik loyiha Oʻzbekiston Respublikasi Oliy Majlisi huzuridagi Jamoat fondining ijtimoiy buyurtmasi asosida moliyalashtirildi. Tashabbus Qoraqalpogʻiston Respublikasi Joʻqorgʻi Kengesi va Vazirlar Kengashining bevosita qoʻllab-quvvatlashida «DMO Karakalpakstan» jamoat tashkiloti tomonidan amalga oshirildi. Loyihaning bosh maqsadi – mintaqadagi umumiy ovqatlanish sohasini yangi sifat bosqichiga olib chiqish, mahalliy gastronomiyani hududning asosiy turistik brendlaridan biriga aylantirish va xizmat koʻrsatish tizimiga zamonaviy xalqaro standartlarni keng joriy etishdan iboratdir.

Ushbu ulkan natijaga erishish yoʻlida davlat, jamoatchilik va tadbirkorlik sektorlari vakillarini oʻzida jamlagan juda keng koʻlamli tayyorgarlik ishlari amalga oshirildi. Xususan, tadbirga qadar jami 6 ta seminar-trening tashkil etilib, ularda gastronomik biznes egalari, turistik kompaniyalar vakillari, hunarmandlar va yoshlardan iborat 213 nafar ishtirokchi qatnashdi. Ahamiyatlisi, ularning 117 nafarini xotin-qizlar tashkil etdi. Shuningdek, qoʻshimcha 122 nafar ishtirokchi loyihaning maxsus taqdimotlarida qatnashdi. Bu jarayonda Qoraqalpogʻiston Respublikasida turizmni rivojlantirish boʻyicha Muvofiqlashtiruvchi kengashning 3 ta yigʻilishi oʻtkazilib, davlat va xususiy sektor vakillari mavjud muammolar hamda ularning yechimlarini oʻzaro muhokama qildilar. Taʼlim yoʻnalishida 151 nafar yosh ishtirokchi jalb qilingan boʻlsa, sohaning 47 nafar vakili xorijiy ekspertlar tomonidan oʻtilgan mahorat darslarida oʻz malakalarini oshirishga muvaffaq boʻldi.

Loyihaning muhim natijalaridan yana biri zamonaviy taʼlim va axborot bazasining yaratilganidir. Yetakchi mahalliy mutaxassislar ishtirokida tayyorlangan gastronomik xizmatlar sifat standartlarini joriy etish boʻyicha amaliy qoʻllanma qoraqalpoq, oʻzbek va rus tillarida chop etildi hamda hududdagi barcha umumiy ovqatlanish korxonalariga yetkazib berildi. Sohani raqamlashtirish maqsadida ishga tushirilgan maxsus elektron platforma va mobil ilova xizmat koʻrsatish sohasida yangi sahifa ochdi. Endilikda mijozlar QR-kod orqali 4 tilda taqdim etilgan raqamli menyuni zudlik bilan ochib, taomlarning fotosuratlari, tarkibi, vazni va narxlari bilan tanishishi, xizmat darajasini baholab, oʻz fikr-mulohazalarini qoldirishi mumkin.

Asosiy bayram kunida esa «Qaraqalpaq Etno Awıl» majmuasi haqiqiy maʼnodagi ulkan gastronomik maydonga aylandi. Mehmonlar kun davomida professional oshpazlarning qizgʻin musobaqasiga guvoh boʻldilar. Maydonda nafaqat mahalliy, balki Xorazm viloyatidan tashrif buyurgan mohir oshpazlar ham pazandalik sirlarini namoyish etishdi. Shuningdek, turli millat vakillarining milliy oshxonalari namoyishi, mavzuli koʻrgazma pavilonlari, qiziqarli viktorinalar hamda milliy liboslar va anʼanaviy taomlar uygʻunlashgan oʻziga xos muhit barchaga unutilmas taassurot bagʻishladi. Sanʼatkorlarning kontsert dasturlari esa bayram shukuhini yanada oshirdi.

Tadbirning eng hayajonli qismi umumiy ovqatlanish korxonalari va professional oshpazlar oʻrtasidagi bellashuvlar boʻldi. Ishtirokchilar mualliflik taomlari, zamonaviy tayyorlash texnologiyalari va taqdimotning oʻziga xosligini yuqori darajada namoyish etdilar. Hakamlar hayʼati taomlarning taʼmiga qoʻshimcha ravishda ularning xalqaro standartlarga nechogʻliq mos kelishini ham baholadilar. Restoran va kafelar oʻrtasidagi bellashuvda 1-oʻrin «Caravan» restoraniga nasib etdi. 2-oʻrinni «MJ Family» restorani egallagan boʻlsa, 3-oʻringa «Qaraqalpaq asxanasi» restorani munosib deb topildi. Gʻoliblar gastronomiya industriyasini yangi bosqichga olib chiqish maqsadida xorijda tajriba almashish va malaka oshirish yoʻllanmasi bilan taqdirlandilar.

Professional oshpazlar bellashuvi ham qizgʻin bahslarga boy boʻldi. Unda Nukus shahridagi «LasVegas» restorani bosh oshpazi Madina Davletmuratova 1-oʻrinni qoʻlga kiritib, tengsiz ekanini isbotladi. Xorazm oshpazlar sanʼati akademiyasi vakili Sarabibi Oʻrozmetova 2-oʻringa, Moʻynoq tumanidagi «ANISA» restorani bosh oshpazi Gulmira Batirbayeva esa 3-oʻringa loyiq deb topildi. Gʻoliblarga diplom, maxsus statuetka va pul mukofotlari topshirildi. Shuningdek, turli millatlarning milliy taomlari koʻrgazmasida Rus milliy madaniy markazi 1-oʻrinni, ukrain milliy madaniy markazi 2-oʻrinni va Koreys milliy madaniy markazi 3-oʻrinni egalladi. Festivalning eng kreativ oshpazi nominatsiyasida esa «MJ Family» restorani bosh oshpazi Andrey Grachyov mutlaq gʻolib deb topildi.

Gʻoliblarni taqdirlash marosimida Oʻzbekiston Nodavlat notijorat tashkilotlari milliy assotsiatsiyasi Qoraqalpogʻiston Respublikasi hududiy boʻlimi rahbari Quoʻatbay Karimxodjayev, Oʻzbekiston Oshpazlar uyushmasining Qoraqalpogʻiston Respublikasi boshqarmasi raisi Gulmirza Yoʻldoshev hamda «DMO Karakalpakstan» jamoat birlashmasi direktori Mels Qosnazarovlar ishtirok etib, gʻoliblarga diplom va esdalik sovgʻalarini topshirdilar.

Xulosa qilib aytganda, mazkur loyiha shunchaki bayram yoki tanlov doirasidan chiqib, taʼlim, raqamli texnologiyalar, xalqaro hamkorlik va tadbirkorlikni qoʻllab-quvvatlashni oʻzida mujassam etgan yaxlit kompleks tashabbusga aylandi. Ushbu festival gastronomiya nafaqat boy madaniy merosning muhim boʻlagi, balki turizm, barqaror iqtisodiyot va Qoraqalpogʻiston Respublikasining jahon maydonidagi ijobiy imijini shakllantirishda eng kuchli vositalardan ekanligini yana bir bor isbotladi. Bu esa kelajakda Qoraqalpogʻiston Respublikasining jahon sayyohlari uchun eng sevimli gastronomik manzillardan biriga aylanishiga xizmat qilishi shubhasiz.