Muborak Ramazon oyi munosabati bilan iftorlik dasturxoni tashkil etildi

Muborak Ramazon oyi yurtimizda doimo mehr-oqibat, saxovat va hamjihatlik fazilatlarini yanada kuchaytirib, insonlarni bir-biriga yaqinlashtiradigan ulugʻ ayyom sifatida qadrlanadi. Ushbu muqaddas oyda yurtdoshlarimiz qalbida shukronalik, bagʻrikenglik va ezgulik tuygʻulari yanada mustahkamlanib, jamiyatda oʻzaro hurmat va birdamlik muhiti hukm suradi.

Amudaryo tumanida ham muborak Ramazon oyi va xalqimizning necha ming yillik anʼanalarini oʻzida mujassam etgan Navroʻz bayrami arafasida turli xayriya va saxovat tadbirlari izchil davom etmoqda. Ana shunday ezgu tadbirlardan biri tumandagi “Oltin saroy” toʻyxonasida tashkil etilgan iftorlik dasturxoni boʻldi.

Mazkur iftorlik tadbirida tuman faollari, nuroniylar, keng jamoatchilik vakillari hamda yoshlar bir dasturxon atrofida jam boʻlib, muborak oy barakasidan bahramand boʻldilar. Samimiy va iliq muhitda oʻtgan ushbu uchrashuv davomida ishtirokchilar oʻzaro muloqot qilib, yurtimizda hukm surayotgan tinchlik-osoyishtalik, xalqimiz farovonligi va mamlakatimiz taraqqiyoti uchun shukronalik izhor etdilar.

Ayniqsa, nuroniylar tomonidan qilingan duolar tadbirga alohida fayz bagʻishladi. Ularda yurtimiz tinchligi, xalqimizning farovon hayoti, yoshlarimizning porloq kelajagi hamda har bir xonadonga fayz-u baraka tilab ezgu tilaklar bildirildi. Bunday davralar nafaqat iftorlik qilish, balki insonlar qalbini yaqinlashtirish, oʻzaro hurmat va ehtiromni mustahkamlashga xizmat qilayotgani bilan ham ahamiyatlidir.

Mamlakatimizda muborak Ramazon oyini munosib nishonlash, aholi oʻrtasida mehr-oqibat va saxovat muhitini kuchaytirish borasida keng koʻlamli ishlar amalga oshirilmoqda. Ayniqsa, Prezidentimiz tashabbusi bilan ehtiyojmand oilalarni qoʻllab-quvvatlash, keksalar holidan xabar olish, kam taʼminlangan oilalarga moddiy va maʼnaviy yordam koʻrsatish kabi xayrli ishlar izchil davom ettirilmoqda.

Bu kabi xayriya tadbirlari Islom tsivilizatsiyasi markazining rasmiy ochilish marosimi kunida butun mamlakatimiz boʻylab oʻtkazilgani oʻziga xos ramziy maʼnoga ega. Davlatimiz rahbarining mazkur ochilish marosimidagi nutqida taʼkidlanganidek, mamlakatimizning uch ming yillik shonli tarixi va boy madaniyatining, Yangi Oʻzbekiston imkoniyatlarining yorqin koʻzgusi boʻlgan ushbu betakror va buyuk majmuaning ochilishi ne-ne ajdodlarimizning orzu-niyatlari, armonlari roʻyobga chiqqan unutilmas kun, chinakam ilm-maʼrifat bayrami boʻldi.

Bu kabi xayrli ishlarning barchasi jamiyatimizda inson qadrini ulugʻlash, tinchlik va umummilliy birlik muhitini mustahkamlashga xizmat qilmoqda.

Ijtimoiy himoyaga muhtoj fuqarolar, nuroniylar, imkoniyati cheklangan insonlar hamda yosh oilalarni qoʻllab-quvvatlash borasida olib borilayotgan bunday ezgu tashabbuslar xalqimiz tomonidan katta mamnuniyat bilan qarshi olinmoqda.

Amudaryo tumanida tashkil etilgan mazkur iftorlik dasturxoni ham ana shunday xayrli ishlardan biri sifatida barchaning qalbida iliq taassurot qoldirdi. Bir dasturxon atrofida yigʻilgan insonlar oʻzaro samimiy suhbatlar qurib, Ramazon oyining maʼnaviy-ruhiy fayzidan bahramand boʻldilar.

Shubhasiz, bunday ezgu tadbirlar jamiyatimizda mehr-oqibat, saxovat, oʻzaro hurmat va hamjihatlik tuygʻularini yanada mustahkamlab, xalqimizni yanada jipslashtirishga xizmat qiladi. Ramazon oyining fayzi bilan amalga oshirilayotgan ana shunday xayrli ishlar yurtimizda inson qadrini ulugʻlash, ezgulik va bagʻrikenglik muhitini qaror toptirish yoʻlida yana bir muhim qadam boʻldi, desak aslo mubolagʻa boʻlmaydi.