Муборак Рамазон ойи муносабати билан ифторлик дастурхони ташкил этилди

Муборак Рамазон ойи юртимизда доимо меҳр-оқибат, саховат ва ҳамжиҳатлик фазилатларини янада кучайтириб, инсонларни бир-бирига яқинлаштирадиган улуғ айём сифатида қадрланади. Ушбу муқаддас ойда юртдошларимиз қалбида шукроналик, бағрикенглик ва эзгулик туйғулари янада мустаҳкамланиб, жамиятда ўзаро ҳурмат ва бирдамлик муҳити ҳукм суради.

Амударё туманида ҳам муборак Рамазон ойи ва халқимизнинг неча минг йиллик анъаналарини ўзида мужассам этган Наврўз байрами арафасида турли хайрия ва саховат тадбирлари изчил давом этмоқда. Ана шундай эзгу тадбирлардан бири тумандаги “Олтин сарой” тўйхонасида ташкил этилган ифторлик дастурхони бўлди.

Мазкур ифторлик тадбирида туман фаоллари, нуронийлар, кенг жамоатчилик вакиллари ҳамда ёшлар бир дастурхон атрофида жам бўлиб, муборак ой баракасидан баҳраманд бўлдилар. Самимий ва илиқ муҳитда ўтган ушбу учрашув давомида иштирокчилар ўзаро мулоқот қилиб, юртимизда ҳукм сураётган тинчлик-осойишталик, халқимиз фаровонлиги ва мамлакатимиз тараққиёти учун шукроналик изҳор этдилар.

Айниқса, нуронийлар томонидан қилинган дуолар тадбирга алоҳида файз бағишлади. Уларда юртимиз тинчлиги, халқимизнинг фаровон ҳаёти, ёшларимизнинг порлоқ келажаги ҳамда ҳар бир хонадонга файз-у барака тилаб эзгу тилаклар билдирилди. Бундай давралар нафақат ифторлик қилиш, балки инсонлар қалбини яқинлаштириш, ўзаро ҳурмат ва эҳтиромни мустаҳкамлашга хизмат қилаётгани билан ҳам аҳамиятлидир.

Мамлакатимизда муборак Рамазон ойини муносиб нишонлаш, аҳоли ўртасида меҳр-оқибат ва саховат муҳитини кучайтириш борасида кенг кўламли ишлар амалга оширилмоқда. Айниқса, Президентимиз ташаббуси билан эҳтиёжманд оилаларни қўллаб-қувватлаш, кексалар ҳолидан хабар олиш, кам таъминланган оилаларга моддий ва маънавий ёрдам кўрсатиш каби хайрли ишлар изчил давом эттирилмоқда.

Бу каби хайрия тадбирлари Ислом цивилизацияси марказининг расмий очилиш маросими кунида бутун мамлакатимиз бўйлаб ўтказилгани ўзига хос рамзий маънога эга. Давлатимиз раҳбарининг мазкур очилиш маросимидаги нутқида таъкидланганидек, мамлакатимизнинг уч минг йиллик шонли тарихи ва бой маданиятининг, Янги Ўзбекистон имкониятларининг ёрқин кўзгуси бўлган ушбу бетакрор ва буюк мажмуанинг очилиши не-не аждодларимизнинг орзу-ниятлари, армонлари рўёбга чиққан унутилмас кун, чинакам илм-маърифат байрами бўлди.

Бу каби хайрли ишларнинг барчаси жамиятимизда инсон қадрини улуғлаш, тинчлик ва умуммиллий бирлик муҳитини мустаҳкамлашга хизмат қилмоқда.

Ижтимоий ҳимояга муҳтож фуқаролар, нуронийлар, имконияти чекланган инсонлар ҳамда ёш оилаларни қўллаб-қувватлаш борасида олиб борилаётган бундай эзгу ташаббуслар халқимиз томонидан катта мамнуният билан қарши олинмоқда.

Амударё туманида ташкил этилган мазкур ифторлик дастурхони ҳам ана шундай хайрли ишлардан бири сифатида барчанинг қалбида илиқ таассурот қолдирди. Бир дастурхон атрофида йиғилган инсонлар ўзаро самимий суҳбатлар қуриб, Рамазон ойининг маънавий-руҳий файзидан баҳраманд бўлдилар.

Шубҳасиз, бундай эзгу тадбирлар жамиятимизда меҳр-оқибат, саховат, ўзаро ҳурмат ва ҳамжиҳатлик туйғуларини янада мустаҳкамлаб, халқимизни янада жипслаштиришга хизмат қилади. Рамазон ойининг файзи билан амалга оширилаётган ана шундай хайрли ишлар юртимизда инсон қадрини улуғлаш, эзгулик ва бағрикенглик муҳитини қарор топтириш йўлида яна бир муҳим қадам бўлди, десак асло муболаға бўлмайди.