Butunjahon mehnat muhofazasi kuni munosabati bilan oʻquv seminari oʻtkazildi

Har bir fuqaroning munosib va barcha xavflardan xoli boʻlgan sharoitlarda mehnat qilishi, oʻz kasbiy faoliyatini xotirjamlik hamda yuqori unumdorlik bilan amalga oshirishi nafaqat uning shaxsiy va oilaviy farovonligi, balki butun mamlakatning barqaror iqtisodiy oʻsishi hamda ijtimoiy taraqqiyotining asosiy garovidir. Shu sababli ham turli sohalarda mehnat qilayotgan ishchi-xodimlarning mehnat muhofazasini taʼminlash, ishlab chiqarish jarayonidagi turli baxtsiz hodisalar va kasb kasalliklarining oldini olish eng dolzarb vazifalaridan biriga aylangan. Dunyo miqyosida har yili 28-aprel sanasining "Butunjahon mehnat muhofazasi kuni" sifatida nishonlanishi ham bejiz emas, albatta. Bu kun dunyo boʻylab yirik korporatsiyalardan tortib kichik korxonalargacha boʻlgan barcha tuzilmalarning eʼtiborini ish joylarida sogʻlom va xavfsiz muhitni yaratishga, mehnat xavfsizligi qoidalariga qatʼiy amal qilishga qaratish uchun berilgan muhim imkoniyatdir.

Amudaryo tumanida ham ushbu muhim sanaga bagʻishlangan tadbir oʻtkazildi. Tuman Madaniyat boʻlimining majlislar zalida "Xavfsiz mehnat asoslari" mavzusida tashkil etilgan oʻquv seminarining kirish qismida Oʻzbekiston kasaba uyushmalari Federatsiyasi raisi oʻrinbosari, Qoraqalpogʻiston kengashi raisi Ulugʻbek Jalmenov soʻzga chiqib, "Mehnatni muhofaza qilishning yangi bosqichi" mavzusida maʼruza qildi. U oʻz nutqida bugungi kunda mehnat qonunchiligi va xavfsizligi borasida davlatimiz tomonidan amalga oshirilayotgan keng koʻlamli islohotlar, xodimlarning huquq va qonuniy manfaatlarini himoya qilishda kasaba uyushmalarining roli haqida atroflicha toʻxtalib oʻtdi.

Shundan soʻng, Qoraqalpogʻiston Respublikasi Kambagʻallikni qisqartirish va bandlik vazirligining Davlat mehnat inspektsiyasi inspektori Mamanbiy Seydullayev soʻzga chiqib, "Mehnatni muhofaza qilish boʻyicha ishlarni tashkil etish" mavzusida batafsil soʻz yuritdi. U oʻz nutqida har bir korxona va tashkilotda xavfsizlik tizimini qanday qilib huquqiy va texnik jihatdan toʻgʻri, eng asosiysi, samarali yoʻlga qoʻyish, ish joylaridagi ehtimoliy xavf-xatarlarni oldindan baholash va ularni zudlik bilan bartaraf etishning zamonaviy usullari haqida yigʻilganlarga zarur maʼlumotlarni taqdim etdi.

Bundan tashqari, oʻquv seminari davomida tashkilotlarda bevosita mazkur yoʻnalishga masʼul boʻlgan shaxslarning qonuniy maqomi, vazifalari va masʼuliyati ham keng muhokama qilindi. Oʻzbekiston kasaba uyushmalari Federatsiyasining Qoraqalpogʻiston kengashi Mehnat texnik inspektori Bekpolat Utepbergenov yigʻilganlar eʼtiboriga "Mehnatni muhofaza qilish boʻyicha mutaxassis va vakil toʻgʻrisida tushunchalar" mavzusida soʻzga chiqib, bu boradagi savollarga toʻliq javob berdi.

Seminarda Qoraqalpogʻiston Respublikasi Kambagʻallikni qisqartirish va bandlik vazirligining Davlat mehnat inspektsiyasi inspektori Rahmon Shomuratov "Mehnat va mehnat qonunchiligiga doir masalalar" toʻgʻrisida soʻz yuritar ekan, xodimlar bilan ish beruvchilar oʻrtasidagi mehnatga oid munosabatlarni huquqiy jihatdan toʻgʻri va adolatli shakllantirish, tuzilayotgan mehnat shartnomalarining bandlariga har ikki tomondan qatʼiy rioya etish hamda ish vaqti va dam olish vaqtlarini qonun doirasida aniq belgilash kabi jihatlarni sodda va tushunarli tarzda bayon etdi.

Tadbirda, shuningdek, oʻziga xos, murakkab va sogʻliq uchun xavf tugʻdirishi mumkin boʻlgan sharoitlarda mehnat qilayotgan fuqarolarni ijtimoiy va huquqiy qoʻllab-quvvatlash masalasi ham muhokamalar markazida boʻldi. Oʻzbekiston sogʻliqni saqlash xodimlari kasaba uyushmasi Respublika Kengashining Qoraqalpogʻiston Respublikasi boʻyicha texnik inspektori Polat Abdiyazov "Zararli va xavfli ish sharoitida ishlovchi xodimlarga yaratilgan imtiyozlar" toʻgʻrisida maʼlumotlr berib oʻtdi.

Seminarning yakuniy qismi oʻzaro erkin muloqot, qizgʻin fikr almashinuv va ochiq savol-javoblar ruhida oʻtdi. Yigʻilish ishtirokchilari, jumladan, tashkilot rahbarlari va mehnat muhofazasi vakillari oʻzlarining kundalik ish faoliyatida, ishlab chiqarish jarayonlarida bevosita duch kelayotgan turli muammoli vaziyatlar, yechimini kutayotgan murakkab masalalar hamda oʻzlarini qiziqtirgan barcha huquqiy va texnik savollar bilan soha mutaxassislariga murojaat qildilar. Sohaning haqiqiy bilimdonlari boʻlgan inspektor va rahbarlar esa har bir berilgan murojaatga aniq va asosli javoblar qaytardilar.

Bu kabi maʼrifiy tadbirlar mehnat muhofazasi yoʻnalishidagi bilim va koʻnikmalarni yanada mustahkamlashga, jamiyatda mehnat madaniyatini yuksaltirishga va eng asosiysi, har bir ish joyida inson hayoti hamda sogʻligʻini ishonchli asrashdek ezgu va ulugʻvor maqsadga xizmat qilishi shubhasizdir.