Amudaryoda jinoyatchilikka qarshi kurash, mahallalarda xavfsiz muhit yaratish masalasi kun tartibida

Qoraqalpogʻiston Respublikasi prokurori Shohruh Aminov tomonidan Amudaryo tumanida Oʻzbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi 1-sonli Qarori ijrosi yuzasidan amalga oshirilayotgan ishlar chuqur va tanqidiy muhokama qilindi.

Tuman prokuraturasi hamda huquq-tartibot idoralari rahbarlari ishtirokida oʻtkazilgan yigʻilishda hududda jinoyatchilik holati, ayniqsa, mahallalarda profilaktika ishlarining samaradorligi atroflicha tahlil qilindi. Muhokamalar davomida tumanda sodir etilgan umumiy jinoyatlarning 74 foizi oldini olish mumkin boʻlgan jinoyatlar ekani alohida qayd etilib, bu holat masʼullar tomonidan olib borilayotgan profilaktik ishlar yetarli darajada yoʻlga qoʻyilmaganidan dalolat berishi keskin tanqid qilindi.

Yigʻilishda, ayniqsa, oilaviy zoʻravonlik holatlarining keskin oshib borayotgani jiddiy tashvish uygʻotdi. Ushbu salbiy holatlarning asosiy sababi sifatida masʼul idoralar hamda mahallalarda faoliyat yurituvchi “mahalla yettiligi” oʻrtasida samarali hamkorlikning yoʻqligi, masalalarga yuzaki yondashuv va muammolarni barvaqt aniqlamaslik holatlari koʻrsatib oʻtildi. Prokuror tomonidan bunday loqaydlikka mutlaqo yoʻl qoʻyib boʻlmasligi qatʼiy taʼkidlandi.

Masʼullarga ijtimoiy profilaktika ishlarini tubdan kuchaytirish, oila-turmush munosabatlari doirasida sodir etilayotgan huquqbuzarlik va jinoyatlarning oldini olish boʻyicha keskin va manzilli choralar koʻrish, jinoyatlarning kelib chiqish sabablari va omillarini chuqur oʻrganib, ularni barvaqt bartaraf etish yuzasidan aniq vazifalar belgilab berildi. Shuningdek, har bir mahalla kesimida jinoyatchilikka qarshi ishlashning yangi mexanizmlarini joriy etish zarurligi qayd etildi.

Muhokama jarayonida huquq-tartibot idoralari va mutasaddi tashkilotlar rahbarlarining axborot va tushuntirishlari tinglanib, belgilangan vazifalar ijrosini samarali taʼminlash yuzasidan tegishli koʻrsatmalar berildi. Har bir rahbar oʻz yoʻnalishi boʻyicha shaxsiy masʼuliyatni chuqur his etishi lozimligi yana bir bor eslatib oʻtildi.

Shundan soʻng, tuman prokuraturasida huquqni muhofaza qiluvchi organlarning tezkor xizmat xodimlari ishtirokida Prezidentimiz tomonidan joriy yil 27-yanvar kuni oʻtkazilgan yigʻilishda berilgan topshiriqlar ijrosi yuzasidan alohida muhokama boʻlib oʻtdi. Unda uyushgan jinoyatchilik, kiberjinoyatlar va yashirin iqtisodiyotga qarshi kurashish borasidagi ishlar yetarli darajada tashkil etilmagani keskin tanqid qilindi.

Xususan, sintetik va psixotrop dori vositalarining noqonuniy muomalaga kiritilishi bilan bogʻliq holatlar umuman aniqlanmagani, giyohvand moddalar noqonuniy muomalasi boʻyicha esa juda kam holatlar fosh etilgani masʼul idoralar faoliyatidagi jiddiy kamchilik sifatida baholandi. Bu yoʻnalishlarda ishlarni faqat statistik koʻrsatkichlar uchun emas, balki real xavf-xatarlarni bartaraf etish maqsadida olib borish lozimligi taʼkidlandi.

Qoraqalpogʻiston Respublikasi prokurori Shohruh Aminov tomonidan jinoyatchilik va huquqbuzarliklarning oldini olish borasidagi ishlar holati mahallalarga bevosita chiqilgan holda joyida oʻrganildi. Aholi bilan muloqotlar oʻtkazilib, mavjud muammolar, ularning sabab va omillari yuzasidan masʼullarga aniq topshiriqlar berildi.

Xulosa oʻrnida aytish joizki, mahallalarda xavfsiz muhitni taʼminlash, jinoyatchilikka qarshi kurashish faqat huquq-tartibot idoralarining vazifasi emas, balki barcha masʼul tashkilotlar, mahalla faollari va jamoatchilikning hamkorlikdagi saʼy-harakatlarini talab etadi.

Bu borada tanqidiy tahlil va qatʼiy nazorat esa natijadorlikni taʼminlashning eng muhim omillaridan biri boʻlib qolmoqda.