Kartoshkachilikda yangi bosqich - Amudaryoda urugʻchilik yoʻlga qoʻyilmoqda

Soʻnggi yillarda mamlakatimiz qishloq xoʻjaligi sohasida sifatli va mahalliy iqlimga mos ekin urugʻchiligi tizimini yoʻlga qoʻyish boʻyicha bir qator islohotlar amalga oshirilmoqda. Ayniqsa, aholi tomorqalaridan oqilona va samarali foydalanish yurtimizda oziq-ovqat xavfsizligini taʼminlashda muhim ahamiyat kasb etmoqda.

Shu maqsadda Amudaryo tumanida ham ijobiy tajribalar yoʻlga qoʻyilmoqda. Jumladan, Xolimbeg ovulida istiqomat qiluvchi ilgʻor tomorqa yer egasi Erkin Qoʻshayev tashabbusi bilan tumanda ilk bor kartoshka urugʻchiligi amaliyotga tatbiq qilina boshladi. Unga Qishloq xoʻjaligi vazirligi va boshqa masʼul tashkilotlar koʻmagida 300 kilogramm “Toshkent” navi kartoshka urugʻligi yetkazib berildi. Ushbu urugʻliklar 10 sotix yer maydoniga ekilib, natijada 3,4 tonnagacha yuqori hosil olindi. Bu esa birgina tomorqada qisqa muddatda yuqori hosildorlikka erishish mumkinligini yana bir bor isbotladi.

Erkin Qoʻshayevning saʼy-harakatlari nafaqat oʻz tomorqasining hosildorligini oshirdi, balki tuman miqyosida yangi yoʻnalishni boshlab berdi. U yaratgan bu tajriba hozirda tuman aholisida katta qiziqish uygʻotmoqda. Bundan ruhlangan mutasaddi tashkilotlar tomonidan endilikda Amudaryo tumani misolida kartoshka urugʻchiligini rivojlantirish boʻyicha maxsus chora-tadbirlar rejasi ishlab chiqilmoqda. Xususan, bosqichma-bosqich boshqa mahallalardagi tomorqa yer egalari hamda fermer xoʻjaliklari rahbarlari ushbu tajribani oʻz faoliyatlariga tatbiq etishlari rejalashtirilmoqda.

Respublika miqyosida esa bu tajriba nafaqat Amudaryo tumanida, balki boshqa hududlarda ham amaliyotga joriy qilinishi moʻljallanmoqda. Mutaxassislarning taʼkidlashicha, “Toshkent” navli kartoshka urugʻligi iqlim oʻzgarishlariga bardoshli, kasalliklarga chidamli va serhosil boʻlib, Qoraqalpogʻiston iqlim sharoitiga ham mos kelganligi respublika qishloq xoʻjaligida yangi bosqichni boshlab berishi kutilmoqda.

“Toshkent” navli kartoshka urugʻchiligi yurtimizda istiqbolga ega. U tez pishuvchi, kasalliklarga chidamli boʻlsa-da, unumdorligi yuqori va agrotexnika jihatdan samarali. Ushbu navli kartoshkachilikni yanada rivojlantirish maqsadida davlat tomonidan tadqiqotlar, infratuzilma, xalqaro tajribalar yordamida kartoshkachilikni ommalashtirish boʻyicha kompleks chora-tadbirlar rejalashtirilgan.

Amudaryo tumani hokimligi, tuman qishloq xoʻjaligi boʻlimi hamda tajribali agronomlar hamkorligida mazkur tashabbusni kengaytirish, urugʻchilikni ilmiy yondashuv asosida yoʻlga qoʻyish, zarur agrotexnik tadbirlar va oʻquv-seminarlar tashkil etish orqali bu sohada yangi yutuqlarga erishish maqsad qilingan.

Bu kabi tashabbuslar shubhasiz, nafaqat tuman iqtisodiyotiga, balki butun respublika miqyosida oziq-ovqat taʼminoti barqarorligiga ham katta hissa qoʻshadi. Eng muhimi, oddiy tomorqa egasining gʻayrati va mehnatiga asoslangan bunday tajribalar boshqa yurtdoshlarimizga ham ibrat boʻlib xizmat qilmoqda.

Charos Arslonova, tuman hokimligining Axborot xizmati rahbari.