Qumyop MFYda aholi chuqurlashtirilgan tibbiy koʻrikdan oʻtkazildi

Jamiyat farovonligi va barqaror taraqqiyoti, avvalo, aholi salomatligini muhofaza qilish, kasalliklarni barvaqt aniqlash va oldini olish bilan chambarchas bogʻliq. Ayniqsa, joylardagi tibbiy xizmatlar sifatini oshirish, sogʻlom turmush tarzi madaniyatini keng targʻib etish borasida amalga oshirilayotgan chora-tadbirlar aholi oʻrtasida salomatlikka boʻlgan eʼtiborni yanada oshirmoqda. Shu maqsadda 7-may kuni Qangli oilaviy shifokorlik punktiga qarashli Qumyop mahalla tibbiyot punktida “Sogʻlomlashtirish oyligi” doirasida chuqurlashtirilgan tibbiy koʻrik tashkil etildi.

Mazkur tadbir Amudaryo tuman Tibbiyot birlashmasining Koʻp tarmoqli markaziy poliklinikasi mutaxassislari — kardiolog, endokrinolog va terapevtlar, shuningdek, Qangli oilaviy shifokorlik punkti shifokorlari, patronaj hamshiralar, doyalar, laboratoriya hamshiralari hamkorligida amalga oshirildi. Koʻrik davomida aholi UZI, EKG va klinik laboratoriya tekshiruvlaridan oʻtkazilib, ularning umumiy salomatlik holati oʻrganildi.

Jami 212 nafar aholi vakillari tibbiy koʻrikdan oʻtkazilib, 18 nafar shaxsda turli salomatlik muammolari aniqlandi va ularga ambulator tartibda davolanish uchun yoʻllanmalar berildi. Shu bilan birga, toʻshakka mixlanib qolgan 5 nafar bemor shifokorlar tomonidan uy sharoitida koʻrikdan oʻtkazildi. Kasalliklar boʻyicha davolash jarayonlarini samarali tashkil etish maqsadida 12 turdagi dori vositalarga ehtiyoj aniqlanib, shundan 18 nafar bemorga bepul dori-darmon tarqatildi.

Tadbir doirasida tibbiy koʻrikdan tashqari aholini sogʻlom turmush tarziga yoʻnaltirishga qaratilgan tashabbuslar ham amalga oshirildi. Jumladan, “Toʻgʻri ovqatlanish va sogʻlom turmush tarzi” umummilliy harakati doirasida “Sogʻlom ovqatlanish yarmarkalari” hamda “Salomatlik maydonchalari” tashkil etildi. Maxsus tayyorlangan savolnoma orqali 48 nafar fuqaroning ovqatlanish odatlari oʻrganilib, ularga ekspert xulosalari berildi.

Shuningdek, Qumyop mahalla fuqarolar yigʻini hududidagi “Salomatlik maktabi” aʼzolari va hamkor tashkilotlar bilan hamjihatlikda “Sogʻlom hayot uchun 5000 qadam” shiori ostida ommaviy piyoda yurish tadbiri oʻtkazildi. Bu tashabbus nafaqat jismoniy faollikni ommalashtirish, balki aholi orasida faol va sogʻlom hayot tarziga qiziqishni kuchaytirishga xizmat qildi.

Bundan tashqari, “Issiq iqlimda toʻgʻri ovqatlanish va toʻgʻri kiyinish”, “Jismoniy faollik — bu salomatlik”, “Zararli odatlarning oldini olish” kabi mavzularda sogʻlomlashtiruvchi suhbatlar tashkil etildi. Mavsumiy va yuqumli boʻlmagan kasalliklarning oldini olish maqsadida aholiga 62 dan ziyod tarqatma materiallar ulashildi.

Qangli oilaviy shifokorlik punktida tashkil etilgan mazkur tadbir joylarda tibbiy xizmat sifatini oshirish, aholining salomatlik holatini muntazam monitoring qilish, kasalliklarni erta aniqlash va ularning oldini olishga xizmat qildi. Eng muhimi, bunday amaliy choralar orqali aholi turmush tarzida tibbiy madaniyatni shakllantirish, profilaktikaga oid bilimlarni mustahkamlash imkoni yaratildi.

Z. Saparova, Qangli OShP mudirasi.

S. Muratboyeva, katta hamshira.