9-sonli Bolalar musiqa va sanʼat maktabida “Mumtoz navolar” nomli kontsert dasturi boʻlib oʻtdi

Sanʼat — xalq qalbining teran qatlamlaridan suv ichgan holda, uning orzu-umidlari, milliy qadriyatlari va turmush tarzini oʻzida aks ettiradigan betakror hodisadir. Ayniqsa, musiqa inson tuygʻularini eng samimiy va taʼsirchan tarzda ifoda etadigan sanʼat turidir. Milliy musiqa esa avloddan avlodga oʻtuvchi maʼnaviy boylik, xalq qalbini yuksaltiruvchi ruhiy manba hisoblanadi. Shu maʼnoda, sanʼat va musiqa tarbiyasi taʼlim tizimida alohida oʻrin tutadi va yosh avlodni vatanparvarlik, milliy gʻurur ruhida tarbiyalashda muhim ahamiyat kasb etadi.

Yaqinda Amudaryo tumanidagi 9-sonli Bolalar musiqa va sanʼat maktabida joriy oʻquv yili yakunlanishi munosabati bilan “Mumtoz navolar” nomli sinf kontserti boʻlib oʻtdi. Ushbu tadbir maktabning anʼanaviy xonandalik yoʻnalishi oʻqituvchisi Sayfulla Gulmanov tashabbusi bilan tashkil etildi. Kontsert nafaqat oʻquvchilarning bir yil davomida olgan bilim va koʻnikmalarini namoyon etish, balki milliy musiqa merosini keng targʻib etishga ham xizmat qildi.

Tadbirda Oʻzbekiston Davlat konservatoriyasining Nukus filialida maqom tarixi fanidan dars beruvchi Muyassar Madaminova, tuman Maʼnaviyat va maʼrifat boʻlimi boshligʻi Islom Matkarimov, faxriy ustozlar, maktab oʻqituvchilari, oʻquvchilar va ularning ota-onalari ishtirok etdilar.

Dastur davomida milliy Xorazm maqomlari, shashmaqomning oʻziga xos namunalari hamda oʻzbek xalq bastakorlarining asarlari jonli ijro etildi. Har bir kuyda xalqimiz madaniyati, oʻziga xos zavqi va ruhiyati aks etdi. Sayfulla Gulmanov tomonidan mahorat bilan ijro etilgan yakkaxon qoʻshiqlar esa kontsertga alohida fayz bagʻishladi. Uning ijrosidagi qoʻshiqlar tinglovchilar qalbida unutilmas taassurot qoldirdi.

Kontsert davomida oʻquvchilarning musiqaga boʻlgan ijodiy salohiyati, sahna madaniyati va mahoratlari yaqqol namoyon boʻldi. Bu esa ustoz va shogird oʻrtasidagi samarali hamkorlik natijasida qoʻlga kiritilgan muvaffaqiyatning yorqin dalilidir.

Sayfulla Gulmanov 2009-yilda Matyusup Xorratov nomidagi Urganch musiqa va sanʼat kollejini anʼanaviy xonandalik yoʻnalishi boʻyicha tamomlab, shu yildan boshlab Amudaryo tumanidagi 9-sonli Bolalar musiqa va sanʼat maktabida mehnat faoliyatini boshlagan. U oʻz pedagogik faoliyati davomida Respublika miqyosidagi qator musiqiy koʻrik-tanlovlarda, jumladan, Muhiddin Qori Yoqubov nomidagi koʻrik-tanlov va “Yoshlar ovozi” kabi loyihalarda oʻquvchilari bilan faol ishtirok etib, koʻplab mukofotlarga sazovor boʻlgan.

Hozirgi kunda maktabda 11 ta yoʻnalish boʻyicha 200 nafarga yaqin oʻquvchi taʼlim olmoqda. Ushbu dargohda ular nafaqat musiqa va sanʼat bilimlarini, balki insonparvarlik, Vatanga muhabbat va milliy iftixor tuygʻularini ham oʻz qalblariga singdirib borishmoqda.

Milliy musiqaga boʻlgan muhabbatni yosh avlod qalbiga singdirish, ularni milliylik ruhida tarbiyalashda Sayfulla Gulmanovning fidokorona mehnati alohida eʼtirofga loyiq. Uning saʼy-harakatlari Amudaryo tuman hokimligi hamda tuman Madaniyat boʻlimi tomonidan Tashakkurnomalar bilan taqdirlandi.

Musiqiy tarbiya — bu faqatgina kuy-qoʻshiq oʻrgatish emas, balki maʼnaviy yuksalish, milliy oʻzligimizni anglash va qalbda xalq merosini yuksaltirishning muhim yoʻlidir. “Mumtoz navolar” nomli kontsert dasturi ham yoshlarda milliy musiqaga muhabbat uygʻotib, ijodiy izlanishlarga ilhom bagʻishladi.

Nigora Usmonova, 9-sonli Bolalar musiqa va sanʼat maktabi direktorining oʻquv-maʼrifiy ishlar boʻyicha oʻrinbosari.