36-sonli umumtaʼlim maktabida “Kasbiy rivojlanish soati” mashgʻulotlari yuqori saviyada tashkil etilyapti

Oʻqituvchilarning bilim va mahoratini doimiy ravishda oshirish, ularni zamonaviy pedagogik yondashuvlar asosida qayta tayyorlash — taʼlim sifati yuksalishining muhim omili hisoblanadi. Bugungi kunda mamlakatimizda taʼlim sohasini isloh qilish, pedagoglar malakasini rivojlantirishga qaratilgan qator amaliy chora-tadbirlar izchil tatbiq etilmoqda.

Jumladan, Prezidentimizning 2024-yil 21-iyun kungi “Maktabgacha va maktab taʼlimi tashkilotlari xodimlarini uzluksiz kasbiy rivojlantirish tizimini takomillashtirish boʻyicha qoʻshimcha chora-tadbirlar toʻgʻrisida”gi Qaroriga muvofiq, umumiy oʻrta taʼlim muassasalarida “Kasbiy rivojlanish soati” va “Kasbiy rivojlanish kuni” amaliyoti joriy etildi.

Amudaryo tumani Maktabgacha va maktab taʼlimi boʻlimi tasarrufidagi 36-sonli umumtaʼlim maktabida ham ushbu jarayon samarali yoʻlga qoʻyilgan. Har haftaning shanba kuni tashkil etilayotgan “Kasbiy rivojlanish soati” mashgʻulotlari boshlangʻich sinf oʻqituvchilari uchun zamonaviy pedagogik bilim va koʻnikmalarni oshirishga xizmat qiluvchi foydali platformaga aylandi. Ushbu mashgʻulotlarga maktabning yetakchi oʻqituvchisi, oliy toifali pedagog Saragul Yusupova rahbarlik qilmoqda.

Saragul Yusupova 1993-yildan buyon pedagogik faoliyat yuritib kelmoqda. Uning 32 yillik boy tajribasi va yuqori saviyadagi bilimlari bugungi yosh oʻqituvchilar uchun amaliyotga asoslangan namuna sifatida xizmat qilmoqda. Jonkuyar ustozning ochiq darslari, maʼnaviy-maʼrifiy tadbirlari nafaqat oʻquvchilar, balki hamkasblari uchun ham ibrat maktabiga aylangan. U oʻz bilim va tajribasini yosh pedagoglar bilan doimiy ravishda oʻrtoqlashib kelmoqda.

“Kasbiy rivojlanish soati” doirasidagi mashgʻulotlar boshlangʻich sinf oʻqituvchilariga zamonaviy pedagogik yondashuvlar, yangi metodlar bilan tanishish, tajriba almashish va shaxsiy pedagogik mahoratni rivojlantirish imkoniyatini yaratadi.

Yaqinda tashkil etilgan mashgʻulotlarda maktabning maʼnaviy-maʼrifiy ishlar boʻyicha direktor oʻrinbosari Sarvar Qutlimurodov, metod birlashma rahbari Nasiba Bobojonova hamda boshlangʻich sinf oʻqituvchilari faol ishtirok etdi. Mashgʻulotlarda amaliy dars tahlili, metodik koʻmak, dars kuzatuvi va refleksiya, shuningdek, malaka oshirish kabi faoliyatlar ustuvor ahamiyat kasb etdi.

Ustozning mehnat samaralari oʻquvchilarining yutuqlarida ham yaqqol koʻzga tashlanmoqda. Xususan, mental arifmetika boʻyicha oʻtkazilgan xalqaro tanlovlarda yuqori natijalar qoʻlga kiritildi. Saragul Yusupovaning eng bilimdon oʻquvchilari Turkiya va Birlashgan Arab amirliklari kabi davlatlarida boʻlib oʻtgan nufuzli bellashuvlarda muvaffaqiyatli ishtirok etishdi. Bu esa ustozning bilimga boʻlgan intilishi, zamonaviy yondashuvlari va oʻz kasbiga boʻlgan yuksak masʼuliyati samarasidir.

Jonkuyar ustoz Saragul Yusupova fidoyi xizmatlari va yuqori pedagogik salohiyati uchun Qoraqalpogʻiston Respublikasi Xalq taʼlimi vazirligining “Faxriy yorligʻi” hamda tuman Maktabgacha va maktab taʼlimi boʻlimining “Tashakkurnoma”lari bilan taqdirlangan.

Oʻqituvchilarning kasbiy rivojlanishi — taʼlim sifati va samaradorligini oshirishda muhim ahamiyat kasb etadi. “Kasbiy rivojlanish soati” va “Kasbiy rivojlanish kuni” amaliyoti esa bu boradagi yutuqlarning mustahkam asosiga aylanmoqda. Mazkur jarayonda bilimdon, tashabbuskor va fidoyi pedagoglarning ishtiroki ayniqsa muhim.

Shohzod Qurbonboyev.