AHIL VA INTILUVChAN PEDAGOGIKA JAMOASI
Inson umrining eng aziz, shu bilan birga oʻta muhim damlari maktab hayoti bilan bogʻliq. Chunki maktab taʼlim-tarbiyasi jarayoni uning xulqini mukammallashtiradi, shaxs sifatida shakllanishi uchun imkon yaratadi. Shuning uchun hayotda yuksak obroʻ-eʼtibor qozonib, xalq hurmatiga sazovor boʻlgan insonlar haqida gap ketganida, eng avvalo, u oʻqigan muqaddas dargoh—maktab va taʼlim-tarbiya bergan ustozlari tilga olinadi. Agar taʼbir joiz boʻlsa, sobiq 8-sonli maxsus iqtidorli bolalar litsey-internati negizida tashkil etilgan Amudaryo tuman Maktabgacha va maktab taʼlimi boʻlimi tasarrufidagi 87-sonli umumtaʼlim maktabining sobiq oʻquvchilari orasida ham el-yurt eʼtiborini qozongan fidoyi insonlar talaygina. Ular orasida ishbilarmon tadbirkorlar, mamlakatimizdagi nufuzli OTMlar pedagog-olimlari, xorijiy ishbilarmonlar bilan hamkorlikdagi korxonalar rahbarlari, shifokorlar va taʼlim tizimi rahbar xodimlari, taniqli huquqshunoslar bor.
Tashqi koʻrinishidan oddiy va kamtaringina koʻringan mazkur maktab binosi 1989-yilda maktabgacha taʼlim muassasasi sifatida bunyod etilgan va 1993-yilda maktab taʼlimi uchun moslashtirilib, bir necha yil davomida 8-sonli maxsus iqtidorli bolalar litsey-internati sifatida faoliyat olib borgan. Hududi salkam 1 gektarga yaqin boʻlgan muassasa 2007-yilda davlat dasturi asosida joriy taʼmirlanib, oʻqituvchilar va oʻquvchilar uchun maʼlum darajada taʼlimiy sharoitlar yaratilgan. 300 oʻquvchi oʻrniga moʻljallangan maktabda ayni paytda 233 nafar yoshlar taʼlim-tarbiya olishadi. 2021-yildan boshlab oʻzaro ahil va biri-biriga hamkor pedagogika jamoasiga Samad Djallayev rahbarlik qilib kelmoqda.
Oʻquv ishlari bir navbat asosida olib boriladigan muassasada 28 nafar oliy maʼlumotli, oʻz kasbining bilimdonlari boʻlgan oʻqituvchilar faoliyat yuritishadi. Ulardan 3 nafari oliy, 7 nafari 1- va 8 nafari 2-toifaga ega pedagoglar boʻlib, 5 nafar oʻqituvchi xalqaro va milliy darajadagi sertifikat sohiblaridir.
Oʻtgan 2023-2024 oʻquv yilida maktabning 11-sinfini 20 nafar oʻquvchi bitirib, ularning 18 nafari mamlakatimizdagi nufuzli OTMlarga oʻqishga qabul qilindilar va bitiruvchilarning OTMlarga kirish koʻrsatkichi 90 foizni tashkil etdi. Maktabdagi mavjud 12 ta sinf xonasidan faqat bittasi maxsus informatika fani xonasi boʻlib, 12 ta kompyuter bilan jihozlangan va toʻliq internet tarmogʻiga ulangan.
– Sharoitlarimiz juda zamonaviy koʻrinishda boʻlmasa-da, oʻqituvchilar darslarni qiziqarli tarzda olib borishadi, – deydi maktab direktori Samad Djallayev. – Oʻquvchilarimiz ham intiluvchan, faol.
Darvoqe, maktabda maxsus fan xonalari (informatika fanidan tashqari) yoʻq hisobi. Fizika, kimyo, biologiya, mehnat darslarini fan oʻqituvchilari oʻz tashabbuslari bilan qiziqarli tarzda oʻtkazishga harakat qilishadi va oʻquvchilarning nazariy bilimlarini boyitish maqsadida ularni “ZiyoNet” internet tarmogʻi orqali amaliy tajribalar jarayoni bilan tanishtirib borishadi. Shu bilan birga ushbu fanlar boʻyicha tashkil etilgan toʻgaraklar faoliyatiga alohida eʼtibor qaratishadi.
Maktabda zamonaviy sport zali, faollar zali, oshxonaning yoʻqligi, kutubxonaning taʼmirtalab holatdaligi doimiy va jiddiy muammo boʻlishiga qaramay, pedagogika jamoasi ham, oʻquvchilar ham taʼlim-tarbiya sohasida yuqori natijalarga erishayotgan maktablardan qolishmaslik maqsadida hamjihatlik bilan harakat qilayotganlaridan, mukammal sharoitlar mavjud boʻlmagan vaziyatda ham yaxshi natijalarga erishayotganlaridan mamnunliklarini yashirishmaydi.
87-sonli maktabning bilimdon va tashabbuskor oʻqituvchilari tahsilini olgan sobiq zukko oʻquvchilar bugungi kunda jamiyatda yuksak mavqega ega insonlar boʻlib yetishdilar. Bugungi kunda ulardan Nurbek Darvishev Toshkent Investitsiya fondining xorijiy kompaniyasida, Dilmurod Rustamov BMTning Sogʻlikni saqlash tashkilotida, Ulugʻbek Xudoyberganov, Mohira Eshmurodova, Ulugʻbek Poʻlatovlar Ichki ishlar sohasida, Otabek Yeshchanov Bolgariyaning “PRIMA TEXTIL” kompaniyasiga qarashli korxona rahbari vazifasida faoliyat yuritishmoqda.
Shuningdek, maktabning sobiq bitiruvchisi Ravshan Toʻrayev Nukus Tibbiyot birlashmasining tez tibbiy yordam boʻlimi rahbari, Asadbek Yoʻldoshev Amudaryo tumanidagi “Advance” oʻquv markazi direktori, Botirjon Sultonov Oʻzbekiston oliy Harbiy aviatsiya bilim yurti katta oʻqituvchisi, Nurbek Yoʻldoshev va Davron Roʻzmetovlar umumtaʼlim maktabi direktorlari, Nilufar Jumaniyozova hamda Jahongir Roʻzmetovlar advokat... Bu roʻyxat juda uzun. “Men 87-sonli maktabda oʻqiganman”, deya faxrlanib yurguvchilar bisyor.
– Sharoitlari zamon talablari darajasida boʻlgan maktablardan qolishmaslik uchun intilamiz, – deyishadi maktab oʻqituvchilari samimiyat bilan.
Maktab pedagogika jamoasining 2024-2025 oʻquv yilidagi rejalari, orzu-niyatlari yanada ezgu: mazkur oʻquv yilida bitiruvchilarning OTMlarga kirish koʻrsatkichini yuz foizga yetkazishga erishish. Buning uchun, garchi maktabda zamonaviy shart-sharoitlar boʻlmasa-da, oʻqituvchilarda ham, oʻquvchilarda ham kuchli intilish, ishtiyoq bor. Intilish va ishtiyoq bor joyda ezgu orzular roʻyobi uchun imkoniyatlar sari yoʻl ochiladi. Biz ishchan va tashabbuskor, ahil pedagogika jamoasiga bu borada muvaffaqiyatlar yor boʻlishini tilaymiz!
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
