55-maktabning “Gʻuncha” jamoasi “Iqtidor maktab ansambli” tanlovining Respublika bosqichida faxrli 2-oʻrinni egalladi

Xabaringiz bor, joriy yilning 24-aprel kuni “Iqtidor maktab ansambli” tanlovining Amudaryo tuman bosqichi yuqori saviyada tashkil etilib, unda tumandagi umumtaʼlim muassasalaridan jami 55 ta maktab jamoalari oʻzlarining rang-barang chiqishlari va musiqiy dasturlari bilan faol ishtirok etishgan edi.

Oʻquvchi yoshlar tomonidan mahorat bilan ijro qilingan kuy va musiqalarni, ayniqsa, oʻzbek milliy cholgʻu asboblarida chalingan betakror navolarni xolis hamda professional darajada baholab borish uchun musiqa va sanʼat maktabining eng tajribali oʻqituvchilaridan iborat hakamlar hayʼati jalb qilindi. Iqtidorli yoshlar oʻrtasida kechgan murosasiz va qizgʻin bellashuvlar yakuniga koʻra, hakamlar hayʼatining yakuniy xulosasi bilan 1-oʻrinni 55-sonli maktabning “Gʻuncha” jamoasi egallagan edi. Oʻz tengqurlari orasida eng yaxshi natija qayd etgan gʻolib jamoa 1-darajali diplom hamda esdalik sovgʻalari bilan taqdirlanib, musobaqaning Respublika bosqichida ishtirok etish uchun yoʻllanmani qoʻlga kiritdi.

Isteʼdodli yoshlarni qoʻllab-quvvatlashga qaratilgan mazkur nufuzli tanlovning Respublika bosqichi 5-may kuni Nukus shahridagi Oʻzbekiston Respublikasi Konservatoriyasining Nukus filiali binosida katta tantana va bayramona shukuh bilan boʻlib oʻtdi.

Ushbu yirik madaniy tadbirda Respublika “Kelajak” markazi direktori Indira Xoldarova qatnashib, yosh ijrochilarning isteʼdodi va sahna madaniyatini kuzatib bordi. Bundan tashqari, ishtirokchilarning ijro mahorati va milliy cholgʻularda chalish qobiliyatini munosib hamda adolatli baholab borish uchun hakamlar hayʼati tarkibida Oʻzbekiston xalq artisti Munojot Yoʻlchiyeva ishtirok etdi.

Tanlovning yakuniy natijalariga koʻra, tumanimiz sharafini munosib himoya qilgan 55-sonli maktabning “Gʻuncha” jamoasi ushbu bosqichda faxrli 2-oʻrinni egallashga muvaffaq boʻldi. Yosh sozandalar va ijrochilar oʻzlarining mashaqqatli mehnati va munosib gʻalabasi uchun diplom va qimmatbaho esdalik sovgʻalarini bevosita Oʻzbekiston xalq artisti Munojot Yoʻlchiyeva hamda Respublika “Kelajak” markazi direktori Indira Xoldarovalarning qoʻllaridan qabul qilib oldilar.

Bunday yuksak eʼtirof va yutuq nafaqat “Gʻuncha” jamoasi aʼzolari, balki butun tumanimiz yoshlari uchun katta motivatsiya boʻlib xizmat qiladi. Bu kabi koʻrik-tanlovlar esa oʻsib kelayotgan yosh avlod qalbida milliy sanʼatimizga boʻlgan muhabbatni yanada mustahkamlashga, ularning ijodiy salohiyatini yuzaga chiqarishga hamda maktabdan tashqari taʼlim tizimining samaradorligini oshirishga oʻzining beqiyos hissasini qoʻshadi.