Xitoylik ishbilarmonlar Amudaryo tumaniga tashrif buyurib, hamkorlik istiqbollarini muhokama qildi

Yaqinda Xitoy Xalq Respublikasidan ishbilarmonlar delegatsiyasi Amudaryo tumaniga tashrif buyurib, hududning iqtisodiy va investitsiyaviy imkoniyatlari bilan tanishdi. Mazkur tashrif tumanda yangi sarmoyaviy loyihalarni amalga oshirish, tumanning turistik salohiyatini rivojlantirish va sanoat tarmoqlarini kengaytirish uchun muhim asos yaratib, keng imkoniyatlar eshigini ochishi koʻzda tutilmoqda.

Tashrif davomida mehmonlar tuman hokimi Sobir Xoʻjametov hamrohligida “Chilpiq” tarixiy yodgorligiga borib, sayyohlik imkoniyatlarini oʻrgandi. Shuningdek, obʼekt atrofida zamonaviy mehmonxonalar, turistik xizmatlar markazlari va infratuzilma obʼektlarini barpo etish boʻyicha takliflar bildirildi. 

Turizm nafaqat madaniy, balki iqtisodiy rivojlanishda ham muhim ahamiyatga ega. Jahonda koʻplab davlatlar ushbu soha orqali xorijiy investitsiyalarni jalb etib, yangi ish oʻrinlari yaratmoqda. Amudaryo tumani boy tarixiy va madaniy merosi bilan bu yoʻnalishda ulkan salohiyatga ega. 

Ishbilarmonlar tashrif davomida Beshtom mahallasida joylashgan “VORIS CHINA” MChJ faoliyati va korxonada kaolin qazib olishni kengaytirish loyihalari bilan ham tanishdi. 

Kaolin – yuqori sifatli oq gil boʻlib, keramika, qogʻoz, kosmetika, farmatsevtika va qurilish materiallari sanoatida keng qoʻllaniladi. Ushbu mineraldan tayyorlangan mahsulotlar qurilish va sanoatda muhim resurs sanaladi. Kaolin ishlab chiqarish hajmini oshirish tuman iqtisodiyotiga salmoqli hissa qoʻshib, eksport hajmini kengaytirishga ham xizmat qiladi. 

Soʻnggi yillarda Amudaryo tumani iqtisodiy rivojlanishning yangi bosqichiga kirib, xorijiy sarmoyadorlar uchun keng imkoniyatlar yaratmoqda. 2024-yil davomida qiymati 2,2 trln soʻmlik 37 investitsiya loyihasi amalga oshirilib, 811 ta ish oʻrni yaratildi. 2025-yilda esa 317,8 mlrd soʻmlik 39 loyiha doirasida 732 ta yangi ish oʻrni tashkil etilishi rejalashtirilgan. 

Prezidentimizning tegishli Farmoni doirasida 2022-2025-yillarda umumiy qiymati 120,3 mlrd soʻmlik 40 ta loyiha amalga oshirilishi va 267 ta ish oʻrni yaratilishi belgilangan. Hozirgacha 85,1 mlrd soʻmlik 34 ta loyiha amaliyotga tatbiq etilib, 201 ta ish oʻrni tashkil etildi. 

2025-yilda 24,2 mln dollarlik eksport prognoz qilingan boʻlib, shundan 18,8 mln dollari sanoat mahsulotlari, 5,4 mln dollari esa meva-sabzavot mahsulotlari hissasiga toʻgʻri keladi. Shuningdek, xorijiy investitsiyalar doirasida 25 mln dollarlik 4 ta loyiha amalga oshirilishi rejalashtirilgan.

Prezidentimizning “Qoraqalpogʻiston Respublikasida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida”gi Farmoni asosida 920,7 mlrd soʻmlik 25 ta loyiha uchun toʻgʻridan-toʻgʻri yer ajratilib, 976 ta yangi ish oʻrni yaratilishi koʻzda tutilgan. Jumladan, 2025-yilda 493,3 mlrd soʻmlik 16 ta, 2026-2029-yillarda 402,3 mlrd soʻmlik 6 ta loyiha amalga oshirilishi belgilangan. 

Xitoylik ishbilarmonlarning tashrifi tumanning iqtisodiy rivoji va investitsiya muhitini yanada jozibador qilishda muhim ahamiyat kasb etadi. Turizm va sanoat sohalaridagi hamkorlik, kaolin ishlab chiqarishni kengaytirish, yangi mehmonxonalar va infratuzilma obʼektlarini barpo etish loyihalari esa hududning investitsiya salohiyatini yanada yuksaltirishga xizmat qiladi.

Shohzod Qurbonboyev