VII chaqiriq Xalq deputatlari Amudaryo tuman Kengashining 2-sessiyasi toʻgʻrisida axborot

Joriy yilning 6-dekabr kuni Amudaryo tumani hokimligining majlislar zalida VII chaqiriq Xalq deputatlari tuman Kengashining navbatdagi 2-sessiyasi boʻlib oʻtdi.

Sessiyada deputatlar, sektorlar rahbarlari, hokim oʻrinbosarlari, tegishli tashkilotlar rahbarlari hamda ommaviy axborot vositalari vakillari ishtirok etdi. Sessiyani “3-Doʻstlik” saylov okrugidan deputat Madamin Kazakov ochib berdi. Sessiya kotibligiga “1-Navoiy” saylov okrugidan deputat Gulshod Yusupova saylandi.

Sessiya kun tartibidagi dastlabki masala Xalq deputatlari Amudaryo tumani Kengashi Raisini saylash toʻgʻrisida boʻlib, Oʻzbekiston Respublikasining “Mahalliy davlat hokimiyati toʻgʻrisida”gi Qonuni hamda siyosiy partiya guruhlarining Qoʻshma yigʻilishi taklifi asosida Xalq deputatlari Amudaryo tuman Kengashi Raisi lavozimiga 20-Toʻlqin saylov okrugidan deputat Xojametov Sabir Jabbarberganovich nomzodi taklif qilindi hamda deputatlar tomonidan maʼqullandi.

Shundan soʻng sessiyani Xalq deputatlari Amudaryo tuman Kengashi Raisi Sabir Xojametov boshqarib bordi.

Sessiya kun tartibidagi navbatdagi – “Xalq deputatlari Amudaryo tuman Kengashi Raisi oʻrinbosarini va kotibiyati mudirini tayinlash toʻgʻrisida”gi masala muhokamasida tuman Kengashi Raisi oʻrinbosari lavozimiga “3-Doʻstlik” saylov okrugidan deputat Kazakov Madamin Rajapovich nomzodi hamda tuman Kengashi kotibiyati mudiri lavozimiga “16-Kuyuk koʻpir” saylov okrugidan deputat Oʻrazbayev Mansur Axmadjanovich nomzodi taklif qilindi va deputatlar tomonidan maʼqullandi.

Sessiya kun tartibidagi navbatdagi – “Mahalliy byudjetning 2024-yil davomida elektron savdo maydonchasida yer uchastkalariga boʻlgan huquqlarni sotishdan tushgan mablagʻlar hisobidan ajratiladigan mablagʻlar toʻgʻrisida”gi masala yuzasidan tuman hokimining birinchi oʻrinbosari Fahriddin Yusupov hisobot berdi. Hisobot deputatlar tomonidan maʼqullandi hamda tegishli qaror qabul qilindi.

Deputatlar “Kengash doimiy komissiyalarini tuzish va shaxsiy tarkibini tasdiqlash toʻgʻrisida”gi masalani ham muhokama qildilar. Ushbu masala yuzasidan “6-Boʻston” saylov okrugidan deputat Maxsud Sadullayev axborot berdi. Qayd etilganidek, qonunchilikda Xalq deputatlari Amudaryo tuman Kengashining Reglamentiga asosan Kengash sessiyasi muhokamasiga kiritiladigan masalalarni dastlabki tarzda koʻrib chiqish va tayyorlash hamda vakolatlari doirasida nazorat oʻrnatish maqsadida Kengash oʻz vakolati muddatiga doimiy komissiyalar tuzishi belgilangan. Kengash qarori bilan Xalq deputatlari Amudaryo tuman Kengashining 5 ta doimiy komissiyalari tuzilib, deputatlar mutaxassisliklaridan kelib chiqqan holda tegishli komissiyalarga biriktirildi.

Sessiya kun tartibiga kiritilgan barcha masalalar atroflicha muhokama etildi, deputatlar har bir masalalar yuzasidan oʻz fikr-mulohazalarini bildirdilar. Faol muhokamalar va savol-javoblardan keyin har bir masala boʻyicha xalq deputatlari tuman Kengashining tegishli qarorlari qabul qilindi. Shu bilan sessiya oʻz ishini yakunladi.

Tuman hokimligining Axborot xizmati.