Xalq deputatlari tuman Kengashining birinchi sessiyasi boʻlib oʻtdi

2024-yil 8-noyabr kuni Amudaryo tumani hokimligining majlislar zalida yettinchi chaqiriq Xalq deputatlari tuman Kengashining birinchi sessiyasi boʻlib oʻtdi.

Sessiyada tuman hokimi Sobir Xoʻjametov, sektorlar rahbarlari, Qoraqalpogʻiston Respublikasi Joʻqorgʻi Kengesiga tumandan saylangan deputatlar, tuman hokimining oʻrinbosarlari, muassasa, korxona va tashkilotlar rahbarlari, OAV vakillari va tuman faollari taklif etildi.

Sessiyani tuman saylov komissiyasi raisi Yalgʻosh Shomurodov ochdi va Xalq deputatlari Amudaryo tuman Kengashiga 2024-yil 27-oktyabrda boʻlib oʻtgan saylov natijalari toʻgʻrisida axborot berdi.

Axborotda qayd qilinganidek, saylovlarga tayyorgarlik koʻrish va uni oʻtkazish bilan bogʻliq barcha tadbirlar Oʻzbekiston Respublikasi Saylov kodeksiga qatʼiy amal qilingan holda ochiq va oshkora tarzda amalga oshirilgan. Xalq deputatlari tuman Kengashiga saylov oʻtkazuvchi 64 ta saylov uchastkalarida oʻtkazilgan ovoz berish yakunlariga koʻra 125 nafar nomzoddan okruglar boʻyicha saylovchilarning eng koʻp ovozini olgan 25 nafari deputat qilib saylangan va roʻyxatga olingan. Ularning 11 nafari ayollar, 12 nafari esa birinchi marta deputatlikka saylangan nomzodlardir.

Deputatlar orasida muhandis-mexaniklar 3 nafarni, oʻqituvchilar 10 nafarni, shifokorlar 3 nafarni, agronomlar 5 nafarni va boshqa soha mutaxassislari 4 nafarni tashkil qiladi.

Sohalar boʻyicha esa qishloq xoʻjaligi xodimlari 2 nafar, sanoat xodimlari 2 nafar, siyosiy partiyalar va jamoat tashkilotlari vakillari 3 nafar, xalq taʼlimi sohasi xodimlari 8 nafar, sogʻliqni saqlash sohasi xodimlari 2 nafar, hokimlik xodimlari 2 nafar va fuqarolar yigʻinlari xodimlari 6 nafarni tashkil qiladi.

Saylanganlarning barchasi oliy maʼlumotli mutaxassislardir. Deputatlar orasida 30 yoshgacha boʻlganlar 1 nafarni, 30-40 yoshgacha boʻlganlar 4 nafarni, 40-50 yoshgacha boʻlganlar 5 nafarni, 50-60 yoshgacha boʻlganlar 11 nafarni va 60 yoshdan oshganlar 4 nafarni tashkil qiladi.

Shundan keyin “Xalq deputatlari tuman Kengashiga saylangan deputatlarning partiya guruhlarini roʻyxatga olish toʻgʻrisida”gi masala muhokama qilindi. Kengash qarori bilan Oʻzbekiston Liberal-demokratik partiyasidan saylangan 7 nafar, “Adolat” sotsial-demokratik partiyasidan saylangan 6 nafar, “Milliy tiklanish” demokratik partiyasidan saylangan 3 nafar, Xalq demokratik partiyasidan saylangan 6 nafar va Ekologik partiyadan saylangan 3 nafar deputatdan iborat partiya guruhlari roʻyxatga olindi.

Deputatlar shuningdek, Xalq deputatlari Amudaryo tumani Kengashining Reglamenti va doimiy komissiyalar toʻgʻrisidagi Nizomni ham tasdiqladilar.

Sessiyada keyin “Amudaryo tumani hokimini tayinlash toʻgʻrisida”gi Qoraqalpogʻiston Respublikasi Joʻqorgʻi Kengesining farmoyishini tasdiqlash haqida”gi masala koʻrib chiqildi.

Deputatlar eʼtiboriga Qoraqalpogʻiston Respublikasi Joʻqorgʻi Kengesi Raisining 2024-yil 6-noyabrda qabul qilingan “Xoʻjametov Sobir Jabbarberganovichni Amudaryo tumani hokimi etib tayinlash toʻgʻrisida”gi farmoyishi taqdim qilindi. Soʻngra nomzod boʻyicha deputatlarning fikr-mulohazalari tinglandi. Soʻzga chiqqanlar Sobir Xoʻjametovning koʻp yillar davomida Amudaryo tumani va Qoraqalpogʻiston Respublikasi miqyosida turli tashkilotlarda, vazirlik va idoralarda samarali faoliyat yuritgan katta tajribaga ega rahbar ekanligini qayd qilib, uning kelgusidagi faoliyatiga muvaffaqiyatlar tiladi.

“Xoʻjametov Sobir Jabbarberganovichni Amudaryo tumani hokimi etib tayinlash toʻgʻrisida”gi Qoraqalpogʻiston Respublikasi Joʻqorgʻi Kengesi Raisining farmoyishi deputatlar tomonidan bir ovozdan tasdiqlandi.

Shundan keyin Amudaryo tumani hokimi Sobir Xoʻjametov tumanni kelgusi 5-yil davomida iqtisodiy-ijtimoiy rivojlantirish boʻyicha dasturini taqdim qildi.

Taqdimotda taʼkidlanganidek, 2024–2029-yillarda tumanni har tomonlama rivojlantirish uchun qabul qilingan dasturning asosiy maqsadi aholi farovonligini oshirish va barqaror iqtisodiy rivojlanishni taʼminlashdir. Tuman hokimi oʻz maʼruzasida asosiy eʼtiborni iqtisodiyot, sanoat, qishloq xoʻjaligi, tadbirkorlik, taʼlim va tibbiyot sohalarini rivojlantirish masalalariga qaratdi.

Dasturda tumanning iqtisodiy oʻsishini yanada yaxshilash maqsadida sanoat, qishloq xoʻjaligi va xizmatlar sohalarini rivojlantirish boʻyicha aniq chora-tadbirlar belgilangan. Masalan, sanoat hajmi 2024-yil yakuni boʻyicha 1,6 trln. soʻmni tashkil qilishi kutilayotgan boʻlsa, 2029-yilga kelib bu koʻrsatkichni 2,9 trln soʻmga yetkazish rejalashtirilmoqda. Shuningdek, qishloq xoʻjaligini yanada rivojlantirish maqsadida yerdan samarali foydalanish, hosildorlikni oshirish, suv tejovchi texnologiyalarni joriy qilish, intensiv bogʻ va tokzorlar barpo qilish koʻzda tutilmoqda.

2025-2029-yillar davomida tumanda umumiy qiymati 130 mln dollarga teng boʻlgan 345ta yangi investitsion loyihalarni ishga tushirish va 2 684ta yangi ish oʻrinlari tashkil etish, 250 mln dollar miqdorida toʻgʻridan-toʻgʻri xorijiy investitsiya va kreditlarni oʻzlashtirish, shu bilan birga tovarlar va xizmatlar eksporti hajmini 83,9 mln dollarga yetkazish, bunda, eksportchi korxonalar sonini 20taga yetkazib, eksport geografiyasini 10ta davlatga, eksport qilinadigan yangi mahsulotlar turlarini esa 20taga yetkazish reja qilinmoqda.

Ijtimoiy yoʻnalishda esa ishsizlikni 4,4 foizga tushirish, taʼlim tizimini takomillashtirish va maktabgacha taʼlim bilan qamrab olish darajasini 82,2 foizga yetkazish, tibbiyot sohasini yanada rivojlantirish boʻyicha aniq chora-tadbirlar belgilangan. 2025-2029-yillarda tuman hududida qoʻshimcha 2ta yangi umumtaʼlim maktabi qurish, 5ta umumtaʼlim maktablarini mukammal taʼmirlash hamda 2ta maktabda rekonstruktsiya ishlarini amalga oshirish orqali qoʻshimcha 1 880 nafar yangi oʻquvchi oʻrni yaratilishi koʻzda tutilgan.

Shuningdek, aholiga qulayliklar yaratish maqsadida infratuzilmani yaxshilash, aholini toza ichimlik suvi bilan taʼminlash, yoʻl va koʻpriklarni taʼmirlash, yashil maydonlar yaratish va boshqa yoʻnalishlarda ham tegishli chora-tadbirlar amalga oshirilishi koʻzda tutilgan.

Dastur kelgusi 5-yil davomida tumanning iqtisodiy rivojlanishini taʼminlashga, aholining turmush darajasini yanada oshirishga qaratilgan aniq va manzilli chora-tadbirlarni oʻz ichiga olgan.

Taqdimotdan keyin sessiyani tuman hokimi – xalq deputatlari Amudaryo tuman Kengashi raisi Sobir Xoʻjametov olib bordi.

Sessiya kun tartibidagi soʻnggi masala muhokamasidan keyin Qoraqalpogʻiston Respublikasi Joʻqorgʻi Kengesi, xalq deputatlari tuman va shahar Kengashlarining Qoʻshma majlisi Maslahat kengashiga 21-Choykoʻl saylov okrugidan tuman Kengashi deputati Yaxshimurat Axmedovning nomzodi tavsiya etildi.

Kun tartibiga kiritilgan barcha masalalar boʻyicha Kengash qarorlari qabul qilinib, shuning bilan sessiya oʻz ishini yakunladi.

amunews.uz veb-sayti tahririyati