МАҚСАДИМИЗ –АМУДАРЁ ТУМАНИ НОМИНИ ДУНЁГА ТАНИТИШ

Амударё тумани Спорт мактабининг ҳудудларда 3та базаси мавжуд бўлиб, барча спорт иншоотлари ҳозирги замон талабларига мувофиқ жиҳозланган.

1-асосий база – Марказий ўйингоҳ Манғит шаҳрининг Олмазор маҳалласида жойлашган. Бу ерда футбол стадиони, 3000 ўринга мўлжалланган трибуна, спорт зал, волейбол, баскетбол майдончалари, сузиш бассейни мавжуд.

2-база эса Манғит шаҳрининг Дўстлик маҳалласи ҳудудида жойлашган. Мазкур спорт базасида 100х70 ўлчамдаги футбол стадиони, 850 ўринга мўлжалланган трибуна, 2та кураш ва стол теннис зали, 1та бадиий гимнастика зали мавжуд.

Манғит шаҳрининг Чордара маҳалласи ҳудудида жойлашган 3-спорт базасида 12х24 ўлчамдаги кураш ва бокс спорти замонавий спорт зали, стол теннис зали мавжуд.

Айни пайтда спорт мактабида жами 19та спорт турлари бўйича машғулотлар ўтказиш йўлга қўйилган.

Шунингдек, паралимпия спорт турларидан таэквандо, пара стол тенниси, пара дзюдо турлари бўйича ҳам қизиқувчилар учун зарур шароитлар яратилган. Жами 141та гуруҳда 1304 нафар спортсевар ёшлар ўзлари қизиққан йўналишлар бўйича машғулотларда шуғулланишади. Улардан 337 нафари қиз болаларни ташкил этади. 62 нафар спорт мураббийларининг 18 нафари аёл-қизлар бўлиб, олий маълумотли мураббийлар 36 нафар, ўрта махсус маълумотга эга мураббийлар эса 26 нафар бўлиб, уларнинг барчаси ўз ишининг усталаридир.

Спортчилардан 2 нафари спорт устаси, 17 нафари  спорт усталигига номзод, жами 630 нафар спортчиларимиз эса 1-, 2-, 3-тоифаларга эга. 12 нафар спортчи Ўзбекистон терма жамоаси асосий таркибига, 2 нафар спортчи эса захира таркибга қабул қилиндилар.

Спорт мактабининг 3та базасидан ташқари, умумтаълим мактабларида ҳам уч томонлама шартнома асосида спорт мактабининг тажрибали 16 нафар тренерлари томонидан спорт тўгаракларида машғулотлар ўтказилади.

Спорт мактабида 2023 йил давомида барча спорт турлари бўйича 37 марта спорт мусобақалари ўтказилди. Ушбу мусобақаларда 834 нафар шуғулланувчилар қатнашди, шулардан 317 нафари қиз болалардир. Спортчиларимиз 2023 йил давомида Ўзбекистон чемпионати ва кубокларида 6та олтин, 12та кумуш, 33та бронза медаль, Жаҳон кубоги мусобақаларида 2та кумуш ва 2та бронза, Халқаро турнирларда 2та олтин, 3та кумуш, 1та бронза медалларини қўлга киритдилар.           

Мақсадимиз эса битта – туманимиз номини дунёга танитиш, Ўзбекистон байроғини бошимиз узра баланд кўтариш. Амударёлик спортчилар янги 2024 йилга ана шундай эзгу, улуғвор ниятлар билан қадам қўймоқда.

Ч.ТАЖИМУРАДОВ, туман Спорт мактаби директори.